హైదరాబాద్: జబ్బుపడ్డప్పుడు ఆత్మీయ కరస్పర్శ ఉంటే బాగుంటుంది. కానీ ఇవి కరోనా రోజులు కదా.. ముట్టుకోవాలంటేనే భయం. శతకోటి కష్టాలకు అనంతకోటి ఉపాయాలు అన్నారు పెద్దలు. అందుకే విడిగా ఉంచిన రోగులకు మానవ స్పర్శ లాంటి అనుభూతి కలిగించే ఓ సాధనాన్ని బ్రెజిల్ నర్సులు కనిపెట్టేశారు. రెండు చేతి గ్లౌజులను తీసుకుని వేళ్ల దగ్గర కలిపి ముడులు వేసి వేడి నీటితో నింపుతారు. రెండు చేతులు తయారు. ఆ సందుల్లో పేషంటు తన చేతిని జొనిపితే చాలు. రెండు చేతుల మధ్య తన చేయి ఉన్న ఫీలింగ్ కలుగుతుందన్న మాట. ఈ గ్లౌజుల ఫొటోలు నెటిజనుల మనసును కదిలించాయి. ఈ సాధనానికి హ్యాండ్ ఆఫ్ గాడ్ అంటే దేవుని చెయ్యి అని పేరు కూడా స్థిరపడింది. చూసినవారందరూ ప్రస్తుత పరీక్షా సమయంలో ఈ ఫొటోలు కదిలించాయని కామెంట్స్ చేశారు.