స్టార్ హీరోలు ఏడాదికి ఒక సినిమా చేస్తే గొప్ప అన్నట్లుంది ఇప్పటి పరిస్థితి. టెక్నాలజీ పెరిగాక కూడా ఇంత ఆలస్యమెందుకంటే..మెరుగైన సినిమాల కోసమే అంటారు హీరోలు. ఇలాంటి టైమ్లో క్యాలెండర్ మారేలోగా నాలుగు నుంచి ఐదు సినిమాల్లో నటిస్తూ వచ్చారు బాలీవుడ్ హీరో అక్షయ్ కుమార్. ఇవన్నీ మూస చిత్రాలేమీ కాదు. యాక్షన్, కామెడీ, పేట్రియాటిక్, హారర్, హిస్టారికల్…ఇలా భిన్నమైన జానర్ సినిమాలున్నాయి.
2012 నుంచి ఇప్పటిదాకా అక్షయ్ జోరుకు మిగతా హీరోలంతా ఆలోచనల్లో పడ్డారు. స్టార్డమ్ పరిమితుల్లో బందీ అయిన షారుఖ్తో చూస్తే ఒక ఇమేజ్కు కట్టుబడకుండా ఉండటం వల్లే అక్షయ్ ఇన్ని వైవిధ్యమైన చిత్రాల్లో నటించగలిగాడు. ఈ పదేండ్ల స్వర్ణయుగం తర్వాత ప్రస్తుతం అక్షయ్కు కొంత ఎదురుగాలి వీస్తున్నది.
ఆయన గత మూడు చిత్రాలు ‘బచ్చన్ పాండే’, ‘సమ్రాట్ పృథ్వీరాజ్’, ‘రక్షా బంధన్’ ఆశించిన ఫలితాల్ని అందించలేదు. ప్రస్తుతం ఆయన చేస్తున్న ఐదు చిత్రాలు అక్షయ్ స్టార్డమ్పై గత ఫ్లాప్స్ ప్రభావం లేదని చెబుతున్నాయి. శుక్రవారం ఆయన పుట్టినరోజు సందర్భంగా సెలబ్రిటీలు, అభిమానులు ఆయనకు శుభాకాంక్షలు తెలిపారు. మరిన్ని బాక్సాఫీస్ విజయాలు సాధించాలని విష్ చేశారు.