మీకు ఫొటోలో కనిపిస్తున్నది సర్ఫ్బోర్డు అనుకుంటే మీరు పప్పులో కాలేసినట్లే. అది వందేళ్ల వయస్సున్న లైవ్ ఫిష్. కెనడాలో ఇటీవల మొదటసారిగా దొరికింది. ఈ భారీ చేపను బ్రిటీష్ కొలంబియాలో మత్స్యకారులు మొదటిసారిగా పట్టుకున్నారు. దీని పొడవు పది అడుగుల కంటే ఎక్కువగా ఉంది. దీని చుట్టుకొలత 57 అంగుళాలు. దీని వయస్సు వందేళ్ల ఉంటుందని వారు అంచనా వేశారు. ఈ భారీ చేప ఫొటో నెట్టింట వైరల్ అవుతోంది.
ఈ చేపను లిలూయెట్, బీసీ సమీపంలో స్టీవ్ ఎక్లండ్, మార్క్ బోయిస్ అనే మత్స్యకారులు పట్టుకున్నారు. ఈ చేపను తమ పడవలోకి ఎక్కించేందుకు వారు దాదాపు రెండు గంటలు కుస్తీపట్టారు. ఇది దాదాపు 317 కిలోలు ఉంటుందని స్టీవ్ ఎక్లండ్ పేర్కొన్నాడు.
ఈ చేప పేరు స్టర్జన్. అసిపెన్సెరిడే కుటుంబానికి చెందిన 27 జాతుల చేపలకు స్టర్జన్ అనేది సాధారణ పేరు. వైట్ స్టర్జన్ ఉత్తర అమెరికాలో అతిపెద్ద మంచినీటి చేప. 14 అడుగుల పొడవు, 1,500 పౌండ్ల వరకు బరువుంటుంది. ఈ చేపలు 150 ఏళ్ల వరకు జీవించగలవని ఫ్రేజర్ రివర్ స్టర్జన్ కన్జర్వేషన్ సొసైటీ పేర్కొంది.