పని ఒత్తిడి, మారుతున్న జీవనశైలి, ఆహారపు అలవాట్లు కారణాలేవైనా గతంతో పోలిస్తే తక్కువ బరువుతో, నెలలు నిండకుండా పుట్టే పిల్లల సంఖ్య రోజురోజుకూ పెరుగుతున్నది. ఆరోగ్యవంతమైన శిశువులు సాధారణంగా రెండు కిలోలూ, ఆపైన బరువుతో పుడతారు. కానీ, ఇప్పుడు ఆరొందల గ్రాముల నుంచి ఎనిమిదొందల గ్రాముల బరువుతో పుడుతున్న సందర్భాలూ ఉన్నాయి. ఇలా తక్కువ బరువుతో పుట్టిన పిల్లలకు రోగ నిరోధక శక్తి తక్కువ. వాతావరణ పరిస్థితులను తట్టుకొనే సామర్థ్యమూ ఉండదు. అందుకే, ఆ బిడ్డలను ఇన్క్యుబేటర్లలో పెట్టి సంరక్షిస్తారు. అయితే, అప్పుడే పుట్టిన పిల్లలకు అమ్మ ఒడి కంటే సురక్షితమైన ప్రదేశం ఎక్కడా ఉండదు. అమ్మ ఒడి వెచ్చదనాన్ని ఏ ఇన్క్యుబేటర్లూ ఇవ్వలేవు. అందుకే, బిడ్డను తల్లి తన పొత్తిళ్లలో హత్తుకునేలా ప్రత్యేకమైన దుస్తులు రూపొందించాలనే ఆలోచన వచ్చింది పరిశోధకులకు. తన శరీరంలోని సంచిలాంటి నిర్మాణంలో పిల్లల్ని సంరక్షించే కంగారూను ఆదర్శంగా తీసుకున్నారు వరల్డ్ యూనివర్సిటీ ఆఫ్ డిజైన్ పరిశోధకులు, ఎయిమ్స్ చిన్నపిల్లల వైద్యనిపుణులు. ఆ స్ఫూర్తితో బాలింతలకు కొత్తరకం దుస్తులను డిజైన్ చేశారు. వాటికి ‘కంగారూ మదర్ కేర్’ అని నామకరణం చేశారు. ఈ జాకెట్ ధరిస్తే బాలింతలు తమ బిడ్డలను గుండెలకు హత్తుకొని ఎంత సమయమైనా ఉండొచ్చు. ఈ అరుదైన ఆవిష్కరణ ఇటీవలే ప్రపంచ ఆరోగ్య సంస్థ (వరల్డ్ హెల్త్ ఆర్గనైజేషన్) ఆమోదం పొందింది. ఇక నుంచీ తల్లులు, తక్కువ బరువుతో పుట్టిన శిశువులు సాధారణ స్థితికి వచ్చేంతవరకూ ఈ దుస్తుల్లో కంటికి రెప్పలా కాచుకోవచ్చు.