న్యూఢిల్లీ: ఈ సోషల్ మీడియా యుగంలో ఏ వీడియో వైరల్ ( Viral Video ) కావాలన్న క్షణం కూడా పట్టదు. అలాగే అలాంటి వీడియోల్లో ఉన్న లొసుగులను పట్టుకోవడంలోనూ నెటిజన్లను మించిన వాళ్లు లేరు. అలాంటిదే ఓ వీడియోపై ఇప్పుడు ట్విటర్లో చర్చ జరుగుతోంది. కింద మంట, దానిపై ఓ పెద్ద కడాయి.. అందులో సల సల కాగుతున్న నీళ్లు.. వాటి మధ్యలో ఏదో తపస్సు చేస్తున్నట్లు ఓ బాలుడు.. అతడే వెనుకే ప్రహ్లాద్ అనే పేరుతో ఓ బ్యానర్.. ఇదీ ఆ వీడియో. మంగళవారం ఉదయం సందీప్ బిష్త్ అనే వ్యక్తి ట్విటర్లో పోస్ట్ చేసిన ఈ వీడియోకు ఇప్పటికే 10 లక్షలకుపైగా వ్యూస్ వచ్చాయి.
దీని వెనుక సీక్రెట్ ఏంటి?
ఆ వీడియోను చూసి ఎవరూ నోరెళ్లబెట్టలేదు సరి కదా.. దాని వెనుక ఉన్న కిటుకును, ఇలాంటి వాళ్లు జనాలను మోసం చేస్తున్న తీరును బయటపెట్టడానికి నెటిజన్లు ప్రయత్నించారు. అసలు ఈ వీడియో ఇప్పటిది కాదని, 2019లోనే వచ్చిందని ఒకరు బయటపెట్టగా.. మరికొందరు అసలు ఇలా ఎలా చేస్తారో, దాని వెనుక ఉన్న సైన్స్ ఏంటో వివరించే ప్రయత్నం చేశారు. ఇది చాలా పాత ట్రిక్. ఆ కడాయి ఇన్సులేట్ చేసినది. అందువల్ల వేడి పైకి రాదు. నీటిలో కనిపిస్తున్న బుడగలు.. ఓ పంప్ ద్వారా క్రియేట్ చేస్తారు. గతంలో ఓ బౌద్ధ బిక్షువు ఇలాగే చేస్తే.. దాని వెనుక ఉన్న అసలు భండారం బయటపడింది అని ఓ యూజర్ ట్వీట్ చేశాడు.
ఇదొక డబుల్ లేయర్ కలిగిన, ఇన్సులేటెడ్ కడాయి అని, అందువల్ల నీళ్లయినా, నూనె అయినా వేడెక్కదని మరో యూజర్ తన ట్వీట్లో చెప్పాడు. నీళ్లు మరుగుతున్నట్లుగా క్రియేట్ చేయడానికి ఓ ట్యూబ్ సాయంతో గాలిని పంప్ చేస్తారని, ఎవరినీ ఆ నీటిని ముట్టుకోవడానికి అనుమతించరని చెప్పాడు. ఒకవేళ నీళ్లు మరుగుతుంటే కేవలం ముందు భాగంలో మాత్రమే బుడగలు కనిపించవు. కడాయి మొత్తం అవి వ్యాపించాలి. మరి మిగతా భాగంలో ఉన్న పూల రెక్కలు ఎందుకు కదలడం లేదు అని ఇంకొందరు ప్రశ్నించారు.