శుక్రవారం 05 మార్చి 2021
National - Jan 20, 2021 , 10:48:16

కప్పేసిన పొగమంచు.. పలు రైళ్లు ఆలస్యం

కప్పేసిన పొగమంచు.. పలు రైళ్లు ఆలస్యం

న్యూఢిల్లీ : ఉత్తర భారతదేశంలోని వివిధ ప్రాంతాల్లో బుధవారం దట్టమైన పొగమంచు కమ్మేసింది. భారత వాతావరణశాఖ తెలిపిన ప్రకారం.. ఢిల్లీలోని పాలంలో బుధవారం తెల్లవారు జామున 200 మీటర్ల దృశ్యమానత నమోదైంది. పాలంతో పాటు సఫ్దర్‌జంగ్‌లో వరుసగా ఉష్ణోగ్రత 9.4, 9.8 డిగ్రీల ఉష్ణోగ్రత నమోదైందని ఐఎండీ పేర్కొంది. దట్టమైన పొగమంచు కారణంగా 13 రైళ్లు ఆలస్యంగా నడుస్తున్నాయని ఉత్తర రైల్వే చీఫ్‌ పబ్లిక్‌ రిలేషన్‌ ఆఫీసర్‌ తెలిపారు. పాలం, అమృత్‌సర్‌, లక్నో, వారణాసి, పాట్నా విమానాశ్రయాల్లోనూ తక్కువ దృశ్యమానత నమోదైందని అధికారులు పేర్కొన్నారు. ఇదిలా ఉండగా.. రాబోయే రెండు రోజుల్లో వాయువ్య భారతంలోని పలు ప్రాంతాల్లో ఉష్ణోగ్రతలు 2-3 డిగ్రీలు తగ్గుతాయని ఐఎండీ పేర్కొంది. ఉత్తరాఖండ్‌, పంజాబ్‌, హర్యానా, చండీగఢ్‌, ఢిల్లీలో కోల్డ్‌వేవ్‌ పరిస్థితులు నెలకొనే అవకాశం ఉందని పేర్కొంది. పశ్చిమ హిమాలయ ప్రాంతంలో ఈ నెల 22 నుంచి విస్తృతంగా మంచు కురిసే అవకాశం ఉందని తెలిపింది. రాబోయే 24 గంటల్లో పంజాబ్, హర్యానా, చండీగఢ్‌, ఢిల్లీ, ఉత్తర ప్రదేశ్, బీహార్, రాజస్థాన్ దట్టమైన పొగమంచు ఉండే అవకాశం ఉందని, బిహార్‌లోనూ రాబోయే రెండు రోజుల్లో చలి తీవ్రత పెరిగే అవకాశం ఉందని వాతావరణశాఖ తెలిపింది. 

VIDEOS

logo