మంగళవారం 01 డిసెంబర్ 2020
National - Nov 22, 2020 , 17:43:21

ఆ శున‌కం అస‌లు య‌జ‌మాని ఎవ‌రు?

ఆ శున‌కం అస‌లు య‌జ‌మాని ఎవ‌రు?

భోపాల్‌: మ‌ధ్య‌ప్ర‌దేశ్ రాష్ట్రం హోషంగాబాద్ జిల్లాలో స్థానిక పోలీసులకు ఒక విచిత్ర‌క‌ర పరిస్థితి ఎదురైంది. ఒక శున‌కం విషయంలో ఏర్ప‌డిన వివాదాన్ని ప‌రిష్క‌రించుకునేందుకు ఇద్ద‌రు వ్య‌క్తులు పోలీసులను ఆశ్ర‌యించారు. ఆ శున‌కం త‌న‌దంటే త‌న‌దంటూ ఇద్ద‌రూ పోటాపోటీగా ఫిర్యాదులు చేసుకున్నారు. అయితే, ఆ వివాదాన్ని ప‌రిష్కరించ‌డం పోలీసులకు త‌ల‌కు మించిన భారంగా మారింది. చివ‌రికి ఆ శున‌కానికి డీఎన్ఏ ప‌రీక్ష నిర్వ‌హించి దానికి అస‌లు య‌జమాని ఎవ‌రో తేల్చాల్సిన ప‌రిస్థితి ఏర్ప‌డింది. 

వివ‌రాల్లోకి వెళ్తే.. హోషంగాబాద్‌కు చెందిన జర్న‌లిస్ట్‌ షాదాబ్ ఖాన్‌, ఏబీవీపీ నాయ‌కుడు కార్తీక్ శివ్‌హారే మ‌ధ్య ఓ శున‌కం విష‌య‌మై వివాదం ఏర్ప‌డింది. త‌న ఇంటి నుంచి త‌ప్పిపోయిన న‌లుపురంగు లాబ్రాడ‌ర్‌ కూకూను శివ్‌హారే బంధించాడ‌ని, ప్ర‌స్తుతం దాన్ని మ‌రొక‌రికి అమ్మే ప్ర‌య‌త్నం చేస్తున్నాడ‌ని షాదాబ్ ఖాన్ పోలీసుల‌కు ఫిర్యాదు చేశాడు. దాంతో పోలీసులు కార్తీక్‌ శివ్‌హారేను పోలీస్‌స్టేష‌న్‌కు పిలిపించ‌గా, ఆ శున‌కం త‌మ‌దేనని, దాని పేరు కూకూ కాదు టైగ‌ర్ అని చెప్పాడు. 

ఇద్ద‌రి వాద‌న విన్న పోలీసులు ఆ శున‌కాన్ని ఇద్ద‌రి చేత పిలిపించ‌గా.. కూకూ అని పిలువ‌గానే షాదాబ్ ద‌గ్గ‌రికి, టైగర్ అని పిలువ‌గానే కార్తీక్ ద‌గ్గ‌రికి వెళ్లింది. దాంతో ఆ కుక్క ఎవ‌రిదో తేల్చ‌డం పోలీసుల‌కు క్లిష్టంగా మారింది. నిజానికి షాదాబ్ ఖాన్ గ‌త ఆగ‌స్టులో త‌న కుక్క త‌ప్పిపోయింద‌ని పోలీసుల‌కు ఫిర్యాదు చేశాడు. ఆ త‌ర్వాత కార్తీక్ శివ్‌హారే ఇంట్లో దాన్ని గుర్తించి తీసుకునేందుకు వెళ్ల‌గా అత‌డు గొడ‌వ‌కు దిగాడు. దాంతో షాదాబ్ న‌వంబ‌ర్ 18న మ‌ళ్లీ పోలీసుల‌ను ఆశ్ర‌యించాడు. 

ఆ శున‌కాన్ని తాను 2017లో పంచ‌మ‌ర్హి నుంచి తెచ్చుకున్నాన‌ని, కావాలంటే డీఎన్ఏ ప‌రీక్ష నిర్వ‌హించి త‌న శున‌కాన్ని త‌న‌కు అప్ప‌గించాల‌ని షాదాబ్ పోలీసుల‌ను కోరాడు. ఇక‌ శివ్‌హారే కూడా తాను ఆ కుక్క‌ను ఇటార్సిలో కొనుగోలు చేశాన‌ని అది త‌న‌దేన‌ని వాదించాడు. ఈ క్ర‌మంలో పోలీసులు శ‌నివారం (న‌వంబ‌ర్ 21న‌) కుక్క నుంచి శాంపిల్స్ సేకరించి పరీక్ష‌కు పంపించారు. టెస్టు రిపోర్టులు వ‌స్తే అది పంచ‌హ‌ర్షి సంత‌తికి చెందిన‌దా, లేకా ఇటార్సి సంత‌తికి చెందిన‌దా తేలుతుంద‌ని, దాంతో స‌మ‌స్య ప‌రిష్కారం అవుతుంద‌ని పోలీసులు చెప్పారు.   

లోకల్ టు గ్లోబల్.. వార్త ఏదైనా.. అన్నీ ఒకే యాప్లో. నమస్తే తెలంగాణ ఆండ్రాయిడ్ యాప్ డౌన్లోడ్ చేసుకోండి.