గురువారం 28 మే 2020
National - May 12, 2020 , 00:39:41

నేడు పట్టాలపైకి రైళ్లు

నేడు పట్టాలపైకి రైళ్లు

న్యూఢిల్లీ: ప్రయాణికుల రైళ్ల పునరుద్ధరణలో భాగంగా మంగళవారం ఎనిమిది ప్రత్యేక రైళ్లను నడుపుతున్నట్లు రైల్వే శాఖ తెలిపింది. ఢిల్లీ నుంచి దిబ్రుగఢ్‌, బెంగళూరు, బిలాస్‌పూర్‌కు ఒక్కోటి చొప్పున మూడు రైళ్లు, హౌరా, రాజేంద్రనగర్‌ (పాట్నా), బెంగళూరు, ముంబై సెంట్రల్‌, అహ్మదాబాద్‌ నుంచి ఢిల్లీకి ఒక్కోటి చొప్పున ఐదు రైళ్లు నడుస్తాయని పేర్కొంది. ఈ రైళ్లలో మొదటి, రెండవ, మూడో తరగతి ఏసీ కోచ్‌లు మాత్రమే ఉంటాయి. అయితే ఎయిర్‌ కండిషన్‌ కోసం ప్రత్యేక నిబంధనలు పాటిస్తారు. కోచ్‌లో స్వచ్ఛమైన గాలి ఉండేలా చూస్తారు. ఈ ప్రత్యేక రైళ్ల వివరాలు, ప్రయాణికులు పాటించాల్సిన నిబంధనలకు సంబంధించిన మార్గదర్శకాలను సోమవారం జారీ చేసింది. కాగా, సాంకేతిక సమస్యవల్ల టికెట్ల బుకింగ్‌ కాస్త ఆలస్యంగా ప్రారంభమైనట్లు ఐఆర్‌సీటీసీ తెలిపింది. 

మార్గదర్శకాలు ఇవే..

  • రాజధాని ఎక్స్‌ప్రెస్‌కు సమానంగా చార్జీలు
  • ఏడు రోజుల ముందుగా టికెట్ల బుకింగ్‌కు అవకాశం
  • ప్రయాణానికి 24 గంటల ముందు టికెట్లు రద్దు చేసుకోవచ్చు
  • టికెట్‌ రద్దు చార్జీలు 50 శాతం
  • తత్కాల్‌, ప్రీమియం తత్కాల్‌, కరెంట్‌ బుకింగ్‌, ఆర్‌ఏసీ, వెయిటింగ్‌ లిస్ట్‌, ఆన్‌బోర్డు బుకింగ్‌లు లేవు 
  • టికెట్లు బుకింగ్‌ చేసుకున్న వారికే ప్రయాణ అనుమతి
  • స్టేషన్‌కు చేర్చే వాహనం డ్రైవర్‌కూ టికెట్‌ ఆధారంగా అనుమతి
  • ఆహారం, తాగునీరు, దుప్పట్లు వంటివి వెంట తెచ్చుకోవాలి
  • ప్రయాణానికి గంటన్నర ముందుగా రైల్వే స్టేషన్‌కు చేరుకోవాలి
  • స్క్రీనింగ్‌ తర్వాత కరోనా లక్షణాలు లేనివారికే రైలులోకి అనుమతి
  • ఆరోగ్యసేతు యాప్‌ డౌన్‌లోడ్‌, మాస్కు, భౌతిక దూరం తప్పనిసరి

సికింద్రాబాద్‌ నుంచి మే 20న తొలి రైలు

మే 17న సాయంత్రం 4 గంటలకు తొలి రైలు ఢిల్లీ నుంచి బయలుదేరి మరుసటి రోజు మధ్యాహ్నం 2 గంటలకు సికింద్రాబాద్‌కు చేరుతుంది. ఇక సికింద్రాబాద్‌ నుంచి తొలి రైలు మే 20న మధ్యాహ్నం 1.15 గంటలకు బయలుదేరి మరుసటి రోజు ఉదయం 10.40 గంటలకు ఢిల్లీ చేరుతుంది. ఈ మార్గంలో నాగ్‌పూర్‌, భోపాల్‌, ఝాన్సీ స్టేషన్లలో మాత్రమే ఈ రైళ్లు ఆగుతాయి. మంగళవారం ప్రారంభమయ్యే బెంగుళూరు-న్యూఢిల్లీ ప్రత్యేక రైలు అనంతపూర్‌, గుంతకల్‌, సికింద్రాబాద్‌, నాగ్‌పూర్‌, భోపాల్‌, ఝాన్సీ స్టేషన్లలో ఆగుతుంది. చన్నై-న్యూఢిల్లీ మధ్య నడిచే రైలు విజయవాడ, వరంగల్‌, నాగ్‌పూర్‌, భోపాల్‌, ఝాన్సీ, ఆగ్రా స్టేషన్లలో నిలుస్తుంది. ఇక వలస కార్మికులను  ఎక్కువగా తరలించాలని రైల్వే నిర్ణయించింది. ప్రస్తుతం ఒక్కో రైలులో 1200 మంది ప్రయాణిస్తుండగా  ఇకపై పూర్తి సామర్థ్యంతో 1700 మందిని తరలించనున్నది. 


logo