హిందీ చిత్రసీమలో మహిళా ప్రధాన కథాంశాల్ని ఎంచుకొని సత్తా చాటుతోంది సీనియర్ కథానాయిక తాప్సీ. అదే సమయంలో వ్యక్తిగత జీవితాన్ని కూడా పరిపూర్ణంగా ఆస్వాదిస్తోంది. బ్యాడ్మింటన్ క్రీడాకారుడు మాథిస్బోతో ఈ సుందరి గత కొన్నేళ్లుగా ప్రేమాయణాన్ని నడుపుతున్న విషయం తెలిసిందే. అయితే తమ బంధం గురించి తాప్సీ ఎప్పుడూ పెదవి విప్పలేదు. వివిధ సందర్భాల్లో ఈ జంట కలిసి తీయించుకున్న ఫొటోలు సోషల్మీడియాలో దర్శనమిచ్చాయి. దీంతో తన లవ్ఎఫైర్ గురించి తాప్సీ చెప్పకనే చెబుతోందని అభిమానులు నిర్ణయించుకున్నారు. పెద్దలను ఒప్పించే తాను పెళ్లాడుతానని ఇటీవల ఓ ఇంటర్వ్యూలో తాప్సీ చెప్పడంతో ఆమె పెళ్లి గురించి ఊహాగానాలు మొదలయ్యాయి. సోమవారం బాయ్ఫ్రెండ్ మాథిస్బో జన్మదినం సందర్భంగా తన కుటుంబ సభ్యులతో కలిసి విందులో పాల్గొన్న ఓ ఫొటోను తాప్సీ సోదరి షగుణ్ ఇన్స్టాగ్రామ్లో పోస్ట్ చేశారు. ఇందులో మాథిస్బోతో కలిసి తాప్సీ చిరునవ్వులు చిందిస్తోంది. ‘నాకెంతో ఇష్టమైన వ్యక్తుల సాంగత్యాన్ని ఆస్వాదిస్తున్నా’ అంటూ ఈ ఫొటోపై మాథిస్యే వ్యాఖ్యానించారు. ఇద్దరి జంట చూడముచ్చటగా ఉందని తాప్సీ అభిమానులు ప్రశంసిస్తున్నారు. ఇటీవలే ‘హసీనా దిల్రుబా’ చిత్రంతో తాప్సీ ప్రేక్షకులముందుకొచ్చింది.