ఇంజినీరింగ్, ఫుడ్ ప్రాసెసింగ్పైనే నజర్
వ్యవసాయాధార, నిర్మాణరంగంపైనా ఆసక్తి
అగ్రస్థానంలో మేడ్చల్ మల్కాజిగిరి జిల్లా
సొంతంగా పరిశ్రమలు స్థాపించేవారు ఎక్కువగా ఇంజినీరింగ్, ఫుడ్ ప్రాసెసింగ్పైనే నజర్ పెడుతున్నారు. ఆ తర్వాత వ్యవసాయాధార పరిశ్రమలు, నిర్మాణరంగంలో ఉపయోగించే బ్రిక్స్ తయారీ, ప్లాస్టిక్, రబ్బర్ వంటి పరిశ్రమలవైపు ఆసక్తి చూపుతున్నారు. తెలంగాణలో గత ఆరేండ్లలో 14,960 పరిశ్రమలు ఏర్పాటుకాగా.. అందులో 75 శాతం ఈ రంగాలకు చెందినవే ఉన్నాయి.
హైదరాబాద్, మార్చి 25 (నమస్తే తెలంగాణ): మార్కెట్లో డిమాండ్ ఉండి.. పెట్టుబడి, శ్రమ తక్కువగా ఉండే పరిశ్రమలవైపే ఔత్సాహికులు మొగ్గుచూపుతున్నారు. దీంతో ఇంజినీరింగ్, ఫుడ్ ప్రాసెసింగ్ పరిశ్రమలపై ఎక్కువగా నజర్ పెడుతున్నారు. రాష్ట్ర ప్రభుత్వం టీఎస్ ఐపాస్ ద్వారా పరిశ్రమలకు అత్యంత సులభం గా అనుమతులు మంజూరుచేస్తున్న విషయం విధితమే. గత ఆరేండ్లలో రాష్ట్రవ్యాప్తంగా 14,960 పరిశ్రమలు ఏర్పాటయ్యాయి. వాటి లో ఇంజినీరింగ్కు సంబంధించిన ఫ్యాబ్రికేషన్, వివిధ రకాల వస్తు తయారీ పరిశ్రమలు, బిస్కెట్లు, నూడుల్స్, వంట నూనెలు తదితర ఆహారపదార్థాల ఉత్పత్తికి సంబంధించినవి, నిర్మాణరంగంలో ఉపయోగించే బ్రిక్స్, స్టోన్ క్రషింగ్ పరిశ్రమలు, రబ్బర్, ప్లాస్టిక్ తదితర పరిశ్రమలు ఉన్నాయి.
మొత్తం పరిశ్రమల్లో 75 శాతం ఈ రంగాలకు చెందినవే ఉన్నాయి. వీటి ఉత్పత్తులకు మార్కెట్లో ఎక్కువ గిరాకీ ఉండ టం, తక్కువ పెట్టుబడి, తక్కువ శ్రమ, లేబర్ సులువుగా దొరకడం, ముడిసరుకు ఎక్కువ లభించడంతో ఈ పరిశ్రమలవైపు ఆసక్తి చూపు తున్నారు. ఫార్మాసూటికల్స్, కెమికల్స్కు సంబంధించిన పరిశ్రమలూ గణనీయసంఖ్యలో ఏర్పాటయ్యాయి. ఎయిరోస్పేస్ అండ్ డిఫెన్స్, ఐటీ సేవలు, థర్మల్ పవర్ ప్లాంట్లు, ఆటోమోబైల్, రక్షణ రంగ ఉత్పత్తుల పరిశ్రమలు తక్కువ సంఖ్యలో వచ్చాయి. సాంకేతిక పరమైన అంశా లు, ముడి సరుకు లభ్యతలో సమస్యలు, నైపుణ్యంగల ఉద్యోగుల కొరత తదితర అంశాలు ఇందుకు కారణమని, అంతేకాకుండా వీటికి కేంద్రం నుంచి పర్యావరణ అనుమతులు, ఇండస్ట్రీ లైసెన్సులు తీసుకోవాల్సి రావడం జాప్యంతో కూడుకున్నది కావడం మరో కారణంగా అధికారవర్గాలు చెప్తున్నాయి. మొత్తం 14,960 పరిశ్రమలకు రూ. 2,07,423.38 కోట్ల మేర పెట్టుబడులు రాగా, 15,13,071 మందికి ఉద్యోగాలు లభించాయి.
అగ్రస్థానంలో మేడ్చల్ మల్కాజిగిరి
పరిశ్రమల స్థాపనలో మేడ్చల్ మల్కాజిగిరి జిల్లా అగ్రస్థానంలో నిలిచింది. ఈ జిల్లాలో అత్యధికంగా 3,461 పరిశ్రమలు ఏర్పాటయ్యాయి. 1,194 పరిశ్రమలతో సంగారెడ్డి, 1,130 పరిశ్రమలతో రంగారెడ్డి జిల్లాలు రెండు, మూడు స్థానాల్లో నిలిచాయి. నారాయణపేటలో అతి తక్కువగా 12, ములుగులో 18, హైదరాబాద్లో 44, వనపర్తిలో 61 పరిశ్రమలు ఉన్నాయి.