గురువారం 28 మే 2020
National - May 07, 2020 , 01:16:12

మద్యం మంట!

మద్యం మంట!

  • ధరల్ని పెంచుతున్న పలు రాష్ర్టాలు
  • యూపీలో రూ. 5 నుంచి రూ. 400 వరకూ పెంపు

చెన్నై/బెంగళూరు/లక్నో: మద్యం ప్రియులకు వివిధ రాష్ర్టాలు షాక్‌ ఇస్తున్నాయి. లాక్‌డౌన్‌ 3.0లో భాగంగా కేంద్రం కొన్ని సడలింపులు ఇవ్వడంతో ఆయా రాష్ట్ర ప్రభుత్వాలు మద్యం దుకాణాలు తెరువడానికి అనుమతులిచ్చాయి. అయితే ఇదే సమయంలో మద్యం ధరల్ని భారీగా పెంచుతున్నాయి. ఈ జాబితాలో తమిళనాడు, ఉత్తరప్రదేశ్‌, ఛండీగఢ్‌ తదితర రాష్ర్టాలు ఉన్నాయి. మద్యం అమ్మకాల ద్వారా మరింత ఆదాయాన్ని గడించడానికి కర్ణాటక ప్రభుత్వం వాటి అమ్మకాలపై ఎక్సైజ్‌ సుంకాన్ని 11% పెంచింది. 2020-21 ఆర్థిక సంవత్సరానికి మద్యం అమ్మకాల ద్వారా రూ. 22,700 కోట్ల ఆదాయం వస్తుందని ఆ ప్రభుత్వ వర్గాలు అంచనా వేస్తున్నాయి. 

ఇంకోవైపు, కోరుకున్న వారికి మద్యాన్ని ఇంటికే సరఫరా చేసేలా పంజాబ్‌ ప్రభుత్వం హోమ్‌ డెలివరీ సేవలకు అనుమతులనిచ్చింది. గురువారం నుంచి ప్రారంభంకానున్న ఈ సేవల్లో వినియోగదారుడికి ఒక్కొక్కరికి గరిష్ఠంగా రెండు లీటర్ల మద్యాన్ని సరఫరా చేస్తారు. కాగా, పెట్రోలు, డీజిల్‌పై కేంద్రం మంగళవారం ఎక్సైజ్‌ సుంకాన్ని పెంచడం తెలిసిందే. తాజాగా ఉత్తరప్రదేశ్‌ ప్రభుత్వం కూడా లీటరు పెట్రోలుపై రూ. 2, లీటరు డీజిల్‌పై రూ.1 పెంచింది.



logo