ముంబై: హిందీ బిగ్బాస్-13 విజేత, ప్రముఖ టీవీ నటుడు సిద్ధార్థ్ శుక్లా గురువారం చనిపోయారు. ఆయన మరణానికి కారణం ఏమిటన్నది తెలియలేదు. సిద్ధార్థ్ వయసు 40 ఏండ్లు. ‘చిన్నారి పెళ్లికూతురు’ సీరియల్లో ‘శివ్’ పాత్ర ద్వారా ఆయన ప్రేక్షకులకు బాగా చేరువయ్యారు. టీవీ షోలతో పాటు అనేక రియాలిటీ షోల్లో కనిపించారు. పలు బాలీవుడ్ సినిమాల్లోనూ నటించారు. గురువారం వేకువజామున సిద్ధార్థ్కు ఛాతిలో నొప్పి వచ్చినట్టు తెలిసింది. 10.20 గంటల సమయంలో ఆయనను దవాఖానకు తరలించారు. సిద్ధార్థ్ శుక్లాను దవాఖానకు తీసుకువచ్చే సరికే ఆయన చనిపోయారని కూపర్ దవాఖాన డీన్ శైలేష్ చెప్పారు. ‘సిద్ధార్థ్ ఆకస్మిక మరణానికి గల కారణం ఏమిటన్నది పోస్టుమార్టం తర్వాత తెలుస్తుంది’ అన్నారు. గురువారం పోస్టుమార్టం నిర్వహించారు. పోస్టుమార్టం నివేదికను శుక్రవారం విడుదల చేస్తామని వైద్యులు తెలిపారు. భౌతిక కాయాన్ని కూడా కుటుంబసభ్యులకు శుక్రవారం ఉదయమే అప్పగించనున్నారు. అయితే, సిద్ధార్థ్ గుండెపోటుతోనే చనిపోయినట్టు వార్తలు వచ్చాయి. సిద్ధార్థ్ మృతి పట్ల పలువురు బాలీవుడ్ ప్రముఖులు సంతాపం వ్యక్తం చేశారు.