Serum Partner with CII గ్రామీణ ప్రాంతాల్లో కరోనా వ్యాక్సినేషన్ వేగవంతం చేసేందుకు సీరం ఇన్స్టిట్యూట్ ఆఫ్ ఇండియా (ఎస్ఐఐ) కీలక ముందడుగు వేసింది. కాన్ఫిడరేషన్ ఆఫ్ ఇండియన్ ఇండస్ట్రీ (సీఐఐ)తో శుక్రవారం భాగస్వామ్య ఒప్పందం కుదుర్చుకున్నది. కరోనాను నియంత్రించ డానికి దేశంలోని గ్రామీణ ప్రాంతాలు, చిన్న పట్టణాల్లో వ్యాక్సినేషన్ వేగవంతానికి ఈ భాగస్వామ్య ఒప్పందం ఉపకరిస్తుంది.
ఈ సందర్భంగా ఎస్ఐఐ చీఫ్ ఎగ్జిక్యూటివ్ ఆఫీసర్ (సీఈవో) అదార్ పునావాలా మాట్లాడుతూ సీఐఐతో భాగస్వామ్య ఒప్పందం వల్ల దేశవ్యాప్తంగా కొవిషీల్డ్ వ్యాక్సిన్ల సరఫరాలో అంతరాయాలను తొలగించడానికి సరైన మార్గం అని అభిప్రాయ పడ్డారు. వాటాదారులందరితో కలిసి వ్యాక్సినేషన్ను పూర్తి చేయడానికి ఇది అవసరం అని అన్నారు.
సీఐఐ ప్రెసిడెంట్ టీవీ నరేంద్రన్ మాట్లాడుతూ ఫాస్ట్ట్రాక్ వ్యాక్సినేషన్ కోసం ప్రజలను దవాఖానలు, కార్పొరేట్లలో అనుసంధానించాలని తమ లక్ష్యం అని చెప్పారు. పరిశ్రమల సహకారంతో భారీ స్థాయిలో వివిధ సామాజిక వర్గాలకు వ్యాక్సినేషన్ అందుబాటులోకి వచ్చేందుకు తమ భాగస్వామ్యం సహాయ పడుతుందన్నారు.
వివిధ పరిశ్రమల వర్కర్లు, వారి కుటుంబాలకు వ్యాక్సినేషన్ పూర్తి చేయాల్సిన బాధ్యత పరిశ్రమలదే. అత్యవసరంగా వ్యాక్సినేషన్ ప్రక్రియ ముందుకు తీసుకెళ్లాలి. ఈ దిశగా ప్రభుత్వం చేపట్టే చర్యలకు తోడ్పాటునిస్తామని టీవీ నరేంద్రన్ తెలిపారు.
దేశవ్యాప్తంగా 196 నగరాల్లో 3000 పై చిలుకు కంపెనీలు ఉన్నాయి. వీటిలో జరిపిన సర్వే ప్రకారం 70 లక్షలకు పైగా సింగిల్ డోస్ వ్యాక్సిన్లు అవసరం ఉంది. సీఐఐ ఆధ్వర్యంలో దేశవ్యాప్తంగా 430 క్యాంపుల్లో ఈ నెల 23 వరకు 34,75, 301 మందికి సింగిల్ డోస్ అందించడం జరిగింది. ద్వితీయ శ్రేణి, త్రుతీయ శ్రేణి పట్టణాలు, నగరాలతోపాటు గ్రామాల్లో వ్యాక్సినేషన్ క్యాంపులను ఏర్పాటు చేసేందుకు సీఐఐ ప్రణాళిక రూపొందించింది.
ప్రపంచవ్యాప్తంగా అతిపెద్ద వ్యాక్సిన్ తయారీదారుగా సీరం ఇన్స్టిట్యూట్ ఆఫ్ ఇండియా (ఎస్ఐఐ) నిలిచింది. బ్రిటన్ కేంద్రంగా పని చేస్తున్న సంస్థ ఆస్ట్రాజెనెకా, ఆక్స్ఫర్డ్ యూనివర్సిటీలతో కలిసి ఎస్ఐఐ.. తయారు చేసిన వ్యాక్సిన్ను ఇండియాలో కొవిషీల్డ్ అని పిలుస్తారు.
దీంతోపాటు భారత్ బయోటెక్ కొవాగ్జిన్ వ్యాక్సిన్లను ఈ ఏడాది జనవరి 16 నుంచి ఫ్రంట్లైన్ హెల్త్ వర్కర్ల నుంచి ప్రతి ఒక్కరికి వ్యాక్సినేషన్ చేస్తున్నారు.
లోకల్ టు గ్లోబల్ వార్తల కోసం.. నమస్తే తెలంగాణ ఫేస్బుక్, ట్విటర్ పేజీలను ఫాలో అవ్వండి
బంగారానికి ఫుల్ గిరాకీ.. ఎంతంటే?!
సక్సెస్ఫుల్గా ఐటీ ఈ-ఫైలింగ్ పోర్టల్.. 25.82 లక్షల ఐటీఆర్స్ దాఖలు