శంకర్ – కమల్ హాసన్ కాంబినేషన్లో రూపొందిన క్రేజియెస్ట్ ప్రాజెక్ట్ భారతీయుడు. ఈ చిత్రానికి సీక్వెల్గా భారతీయుడు 2 చిత్రాన్ని మొదలు పెట్టారు. ఈ సినిమా మొదలు పెట్టిన దగ్గర నుండి పనులు నత్తనడకన సాగుతున్నాయి. అనేక సమస్యలు చిత్ర బృందాన్ని వెంటాడుతుండడంతో సినిమా వెనక్కి వెళుతుంది. లైకా ప్రొడక్షన్స్ నిర్మాతలు, దర్శకుడు శంకర్కు మధ్య సఖ్యత లేకపోయే సరికి సినిమా పెండింగ్లో పడింది. దీంతో శంకర్ రామ్ చరణ్, రణ్వీర్ సింగ్లతో తన తదుపరి ప్రాజెక్టులు చేయబోతున్నట్టు ప్రకటించాడు.
భారతీయుడు 2 చిత్రం పూర్తి చేయకుండా శంకర్ కొత్త సినిమాలు ప్రకటించడంపై లైకా సంస్థ ఆగ్రహం వ్యక్తం చేస్తూ కోర్టుకెక్కింది. ఇండియన్ 2 సినిమా పూర్తి చేశాకే శంకర్ వేరే సినిమాలు మొదలు పెట్టేలా ఉత్తర్వులు ఇవ్వాలని హైకోర్టులో పిటీషన్ వేసింది లైకా. ఈ క్రమంలో కోర్టు గొడవను సామరస్యంగా పరిష్కరించుకోవాలని సూచించింది. దీంతో శంకర్ తరపు లాయర్ రీసెంట్గా లైకా నిర్మాతలను కలిసి జూన్ నుండి అక్టోబర్ మధ్యలో శంకర్ ఇండియన్ 2 సినిమాను పూర్తి చేస్తారని అన్నారు. కాని లైకా మాత్రం జూన్ నాటికి సినిమాను ముగించి తీరాలని, ఇందులో ఎలాంటి మార్పు ఉండకూడదని పట్టుబట్టారు. ఈ నేపథ్యంలో ఇద్దరి మధ్య చర్చలు విఫలం కావడంతో కథ మళ్లీ మొదటికి వచ్చింది.