తెలుగుతనం ఉట్టిపడే బుట్టబొమ్మ అంజలి. పదహారణాల తెలుగందానికి ప్రతీకలా కనిపించే ఈ సొగసరి తనదైన ప్రతిభతో మెప్పిస్తున్నది. పదిహేనేండ్ల కెరీర్లో తెలుగు, తమిళ భాషల్లో అనేక విజయాల్ని తన ఖాతాలో వేసుకుంది. మహిళా ప్రధాన చిత్రాల్లో సత్తా చాటుతూ ప్రత్యేకమైన ఇమేజ్ను సృష్టించుకుంది. తాజాగా పవన్కళ్యాణ్ కథానాయకుడిగా నటిస్తున్న ‘వకీల్ సాబ్’లో అంజలి కీలక పాత్ర పోషిస్తున్నది. ఈ చిత్రం ఈ నెల 9న ప్రేక్షకుల ముందుకు రానుంది. ఈ సందర్భంగా అంజలి ‘జిందగీ’తో పంచుకున్న ముచ్చట్లివి..
‘వకీల్ సాబ్’ చిత్రంలో మీకు అవకాశం ఎలా వచ్చింది?
నేను హిందీ చిత్రం ‘పింక్’ చూశాను. ఈ సినిమా రీమేక్ అనగానే ఓ రకమైన ఆసక్తి ఏర్పడింది. దర్శకుడు శ్రీరామ్ వేణు స్క్రిప్ట్ చెప్పినప్పుడు హిందీ కంటే పూర్తి భిన్నంగా అనిపించింది. కథలోని ఆత్మను మిస్ చేయకుండా తెలుగు నేటివిటీకి అనుగుణంగా చాలా మార్పులు చేశారు. మహిళా సాధికారతతోపాటు అబలలు ప్రతికూల పరిస్థితుల్లో ధైర్యంగా పోరాడాలనే స్ఫూర్తిమంతమైన అంశాలు ఉండటంతో రెండో ఆలోచన లేకుండా సినిమాకు వెంటనే అంగీకరించాను.
పవన్ కళ్యాణ్తో తెర పంచుకోవడం ఎలాంటి అనుభూతినిచ్చింది?
పవన్కళ్యాణ్తో సినిమా అనగానే నా ఆనందానికి హద్దులు లేకుండా పోయాయి. సాధారణంగా అగ్రకథానాయకుల సినిమా అంటే కథ మొత్తం హీరో ప్రధానంగా నడుస్తుంది. కానీ, ఈ సినిమాలో నా పాత్రకు మంచి ప్రాధాన్యం ఉంటుంది. నా క్యారెక్టర్లోని ఎమోషన్ ప్రతి అమ్మాయికీ కనెక్ట్ అవుతుంది. పవన్కళ్యాణ్ సహృదయత, మృదుస్వభావం నన్నెంతగానో ఆకట్టుకున్నాయి. సాధారణంగా ఎవరినీ పెద్దగా పొగడని ఆయన ఓ సీన్ విషయంలో ‘చాలా బాగా చేశారు’ అని నన్ను మెచ్చుకోవడం ఎప్పటికీ మరచిపోలేను.
‘వకీల్ సాబ్’ చిత్రాన్ని ముగ్గురు యువతుల సంఘర్షణ నేపథ్యంలో తెరకెక్కించారు కదా! మీ వ్యక్తిగత జీవితంలో ఎప్పుడైనా వేధింపుల్ని ఎదుర్కొన్నారా?
నా దృష్టిలో వేధింపులకు ఏ రంగం అతీతం కాదు. ఈ విషయంలో సెలబ్రిటీలు, సాధారణ అమ్మాయిలు అనే భేదాలుండవు. మహిళలు ఏ రంగంలో ఉన్నా వేధింపులకు ఆస్కారం ఉంటుంది. సమస్య వచ్చినప్పుడు దృఢచిత్తం, సంకల్పబలంతో పోరాడాలి. ధైర్యంగా ప్రతిఘటిస్తేనే వేధింపుల నుంచి బయటపడతాం.
ఈ సినిమాలో మిమ్మల్ని ఉద్వేగానికి గురిచేసిన సన్నివేశాలున్నాయా?
ఈ సినిమాలో కోర్ట్ రూమ్ డ్రామా ప్రతి ఒక్కరిలోనూ ఉద్వేగాన్ని కలిగిస్తుంది. సంభాషణలు ఆలోచనల్ని రేకెత్తిస్తాయి. సాధారణంగా చిన్న సంఘటనలకే నేను చలించిపోతాను. కోర్ట్ రూమ్ సీన్లలో భావోద్వేగానికి గురయ్యాను. దాంతో సన్నివేశాలు ఎలాంటి కృత్రిమత్వం లేకుండా సహజంగా వచ్చాయి.
‘సీతమ్మ వాకిట్లో సిరిమల్లె చెట్టు’ తర్వాత ప్రకాష్రాజ్తో కలిసి ఈ సినిమాలో నటించారు. ఆ ఎక్స్పీరియన్స్ గురించి..?
ఈ సినిమాలో ప్రకాష్రాజ్కు, నాకు మధ్య రెండు సన్నివేశాలున్నాయి. సహనటులు మన పెర్ఫార్మెన్స్పై తప్పకుండా ప్రభావం చూపిస్తారు. పక్కన టాలెంటెడ్ ఆర్టిస్టు ఉంటే మన ప్రతిభ కూడా మెరుగుపడుతుంది. టైమింగ్ బాగా కుదురుతుంది. ప్రకాష్రాజ్తో పనిచేస్తే ఏదో తెలియని శక్తి వచ్చినట్టు అనిపిస్తుంటుంది.
ప్రస్తుతం పరిశ్రమలో కథానాయికల మధ్య పోటీ వాతావరణం ఉంది. సీనియర్ నాయికగా కాంపిటీషన్ గురించి మీరేమంటారు?
పోటీ గురించి నేను ఎప్పుడూ ఆలోచించను. కథల ఎంపికలోనూ సొంతంగా నిర్ణయం తీసుకుంటా. మన పక్కవారు ఏదో చేస్తున్నారని, వారి పంథాను ఫాలో కావడం నాకు ఇష్టం ఉండదు. ఎందుకంటే, అందరికి అన్ని కథలూ సరిపోవు. కథాపరంగా నా అభిరుచులు, ప్రతిభ ఆధారంగా సినిమాలపై నిర్ణయం తీసుకుంటాను.
ప్రస్తుతం మీ కెరీర్ను ఎలా ప్లాన్ చేసుకుంటున్నారు?
కెరీర్ విషయంలో నేను పూర్తి స్పష్టతతో ఉన్నా. సుదీర్ఘ కెరీర్లో ఎప్పుడూ విరామం రాలేదు. ‘జర్నీ’, ‘సీతమ్మ వాకిట్లో సిరిమల్లె చెట్టు’, ‘గీతాంజలి’ వంటి చిత్రాలు మంచి గుర్తింపును ఇచ్చాయి. తెలుగు, తమిళ భాషల్లో భారీ చిత్రాలు చర్చల దశలో ఉన్నాయి. వాటి వివరాలు త్వరలో తెలియజేస్తా.
ఫెమినిజంను మీరు సమర్థిస్తారా?
ఏ సిద్ధాంతాన్నైనా సానుకూల మార్గంలో ఆచరిస్తే మంచి ఫలితాలొస్తాయి. ఫెమినిజం కూడా అలాంటిదే. పాజిటివ్ పంథాలో ఆలోచిస్తే ఫెమినిజం వల్ల ఉపయోగాలుంటాయి.
ప్రీమారిటల్ సెక్స్ (పెళ్లికి ముందు శృంగారం) విషయంలో మీ అభిప్రాయమేమిటి?
అది పూర్తిగా వ్యక్తిగత విషయంగా భావిస్తాను. వ్యక్తుల అభిరుచులు, ఆలోచనా ధోరణులపై ఆధారపడి ఉంటుంది.