ఆకాశం, గ్రహాలు, నక్షత్రాలు.. ఇవన్నీ కొన్నిసార్లు ఆశ్చర్యం కలిగిస్తాయి!
ఆ ఆశ్చర్యమే ఒక కుర్రాడిని పరిశోధనలవైపు మళ్లించింది.
రాకెట్లు, విమానాల పనితీరును పరిశీలించేలా చేసింది.
చరిత్ర సృష్టించాలనే లక్ష్యం వైపు తీసుకెళ్లింది.
ఆ లక్ష్యమే అంగారకుడు.
ఆ కుర్రాడే సంకర్ష్ చందా.
హైదరాబాద్కు చెందిన సంకర్ష్ చందా స్టాక్ మార్కెట్ సర్కిల్స్లో సుపరిచితుడు. ‘సావర్ట్’ స్టార్టప్ద్వారా 19 ఏండ్ల వయసులోనే దలాల్ స్ట్రీట్ నిపుణుడిగా చరిత్ర సృష్టించాడు. స్టాక్ మార్కెట్ అంటే కూరగాయల మార్కెట్ లాంటిదే అనుకునే దోస్తులతో తిరిగినా, తాను మాత్రం లక్ష్యాన్ని మరువలేదు. సావర్ట్ లాంచ్ చేసిన నాలుగు నెలలకే ‘స్టార్డర్ ఏరోస్పేస్’ (Stardour Aerospace) ను స్థాపించి స్టార్టప్ రంగంలో సంచలనం సృష్టించాడు.
భిన్న ఆలోచనలు
సంకర్ష్ తెలివైన విద్యార్థే. కానీ ఈ గ్రేడ్లూ, ర్యాంక్లూ అంటే పెద్దగా ఇష్టం ఉండేది కాదు. భిన్నంగా ఆలోచించాడు. అదే అతడిని పుస్తకాలకు దగ్గర చేసింది. తెలియని విషయాన్ని శోధించి సాధించేంత మొండిపట్టు అతడిది. ఏడో తరగతిలో ఉన్నప్పుడే ‘బెంజిమెన్ గ్రాహం’ రాసిన ఆర్టికల్స్ చదివి తల్లిదండ్రులను ఆశ్చర్యానికి గురిచేశాడు. పైగా అది స్టాక్మార్కెట్కు సంబంధించిన అంశం. అసలు మార్కెట్లో వస్తురూపంలో లేనిదానిపై పెట్టుబడి పెట్టడమేంటి? దానిద్వారా డబ్బులు సంపాదించడమేంటి? అన్న ప్రశ్నలు సంకర్ష్ మదిలో మెదిలాయి. ఆ ప్రశ్నలకు జవాబు తెలుసుకునే క్రమంలో ‘మార్కెట్ గురు’గా మారిపోయాడు.
అంగారకుడే లక్ష్యం
సంకర్ష్ది మధ్యతరగతి కుటుంబం. నాన్న చంద్రశేఖర్ ఓ ప్రైవేటు కంపెనీలో ఉద్యోగి. ‘చదువులపై ఫోకస్ చేయలేకపోతున్నా’ అని ఇంట్లోవాళ్లను ఒప్పించి పాఠ్య పుస్తకాలను పక్కనపెట్టాడు సంకర్ష్. ‘నీకు ఏది చేయాలనిపిస్తే అది చేయి’ అని అమ్మానాన్న ధైర్యం ఇవ్వడంతో స్టాక్
మార్కెట్, ఏరోస్పేస్ వంటి అంశాలపై పరిశోధనలు మొదలుపెట్టాడు. సాధించాలనే పట్టుదల, గురి
తప్పని లక్ష్యంతో ‘స్టార్డర్ ఏరోస్పేస్’ను స్థాపించాడు. 2026 జూన్ 1 నాటికి అంగారకుడిపై భారతీయుడిని పంపడమే లక్ష్యంగా ఈ సంస్థ పనిచేస్తున్నది. దీనికోసం రాకెట్ను పోలిన ఒక ప్రత్యేకమైన వెహికిల్ను తయారుచేస్తున్నారు. దాన్ని పునర్వినియోగించవచ్చు. దీనికి పేటెంట్కూడా పొందారు. ఇది రాకెట్ను పోలి ఉంటుంది. అవసరమైతే నీటిలోనూ ల్యాండ్ అవుతుంది. ఇంధన సమస్య లేకుండానే అంగారకుడిపైకి చేరుకోవడమే దీని ప్రత్యేకత. ఈ ప్రాజెక్టుకు ఇస్రో సహకారం కూడా లభించింది.
స్టాక్మార్కెట్పై దృష్టి
‘స్టార్డర్ ఏరోస్పేస్’ కంటే ముందు 2017లో సంకర్ష్ ‘సావర్ట్’ అనే స్టార్టప్ను ప్రారంభించాడు. స్టాక్ మార్కెట్లోకి రావడానికి ఉద్ధండులే భయపడుతుంటారు. అలాంటిది, ఓ ఇరవై ఏండ్ల కుర్రాడిగా ఎంత తెగువ, సాహసం ఉంటే సంకర్ష్ ఈ నిర్ణయం తీసుకుంటాడు? ‘సావర్ట్’ ఒక స్టాక్ మార్కెట్ అడ్వయిజరీ కంపెనీ. ఇన్వెస్టర్లకు స్టాక్ మార్కెట్ పెట్టుబడులపై సలహాలు ఇస్తుంటాడు. పాకెట్ మనీ కోసం ఇంట్లో ఆధారపడటం ఎందుకు? అనే ప్రశ్నలోంచి పుట్టిందే స్టాక్ బిజినెస్ ఆలోచన. మొదటగా వాళ్లక్క డీమాట్ అకౌంట్ తీసుకొని, అతి తక్కువ ధర ఉన్న షేర్లు కొనుక్కున్నాడు. ఆ ప్లాన్ ఎందుకో బెడిసి
కొట్టింది. పైసలు పోగొట్టుకున్నాడు. అలా అని వెనకడుగు వేయలేదు. షేర్మార్కెట్ ఒక మహా
సముద్రమని తెలుసుకున్నాడు. పదేండ్ల స్టాక్మార్కెట్ స్థితిగతుల రిపోర్టులను పరిశీలించి కొత్త మెళకువలు గ్రహించాడు. సొంతంగా ఏదైనా కంపెనీ పెట్టాలనే నిర్ణయానికి వచ్చాడు. ఇప్పుడు అతడి వయసు 22 సంవత్సరాలు. ఇంత చిన్న వయసులో 14 కంపెనీలకు స్టాక్ మార్కెట్ సలహాదారుడిగా వ్యవహరిస్తూనే, అంగారకుడిపైకి భారతీయుడిని పంపేందుకు కృషి చేస్తున్నాడు. తనని ఇంతదాకా తీసుకొచ్చింది పరిశోధనే. ఈ కుర్రాడు చాలా పుస్తకాలు చదివాడు. అవే అతడిలో ఆత్మవిశ్వాసాన్ని పెంపొందించాయి. అనుభవం వచ్చేలా దోహదపడ్డాయి. ‘నేర్చుకుంటూ పోవడమే నా విజయ రహస్యం’ అంటాడు సంకర్ష్.
విజయం సాధిస్తా : సంకర్ష్ చందా
తెలియని దాని గురించి తెలుసుకోవడంలో కిక్ ఉంటుంది. తొలుత నాకు స్టాక్ మార్కెట్ గురించి ఏమీ తెలియదు. శోధించి తెలుసుకున్నా. ఒక సగటు వ్యక్తికి కూడా స్టాక్ మార్కెట్ను ఆదాయ వనరుగా మార్చాలన్నది ఒక లక్ష్యం అయితే, అంగారకుడిపైకి భారతీయుడిని పంపించాలన్నది మరో లక్ష్యం. రెండిట్లోనూ చిత్తశుద్ధితో పనిచేస్తున్నా. తప్పకుండా విజయం సాధిస్తా. ఆత్మవిశ్వాసమే సగం విజయం.