చెన్నై: మీరు చదివింది నిజమే. వచ్చే ఆదివారం సోషలిజాన్ని పెళ్లి చేసుకోబోతోంది మమతా బెనర్జీ. తమిళనాడులోని సేలం జిల్లాలో ఈ పెళ్లి జరగబోతోంది. దీనికి సంబంధించి తమిళంలో ఉన్న ఇన్విటేషన్ కార్డ్ వైరల్గా మారింది. ఇదేదో తమాషాకు ప్రింట్ చేయించిన ఇన్విటేషన్ కార్డు కాదు. ఇది నిజమైన పెళ్లే. సోషలిజం వరుడి పేరు కాగా.. మమతా బెనర్జీ వధువు పేరు. తమిళనాడుకు చెందిన సేలం కమ్యూనిస్ట్ పార్టీ ఆఫ్ ఇండియా (సీపీఐ) జిల్లా కార్యదర్శి మోహన్ కుమారుడే ఈ సోషలిజం.
ఎన్నాళ్లుగానో కమ్యూనిజాన్ని ఫాలో అవుతున్న మోహన్ కుటుంబం.. తన మరో ఇద్దరు కొడుకులకు కమ్యూనిజం, లెనినిజం అనే పేర్లు పెట్టారు. 2016లో ఈయన వీరపాండి నియోజకవర్గం నుంచి పీపుల్స్ వెల్ఫేర్ అలయెన్స్ తరఫున పోటీ చేశారు.
ఇక్కడ విచిత్రమేమిటంటే వరుడి కుటుంబం కమ్యూనిజానికి వీరాభిమానులు కాగా.. వధువు కుటుంబం మాత్రం కాంగ్రెస్ విధేయులు. చాన్నాళ్లుగా ఆ పార్టీ మద్దతుదారులుగా ఉన్నారు. అందుకే తమ కూతురికి కూడా ఒకప్పుడు కాంగ్రెస్లో ఉండి, ఇప్పుడు పశ్చిమ బెంగాల్ ముఖ్యమంత్రిగా ఉన్న మమతా బెనర్జీ పేరు పెట్టారు.