గురువారం 03 డిసెంబర్ 2020
National - Nov 10, 2020 , 18:55:36

మహారాష్ట్రలోని కేంద్ర కార్యాలయాల్లో మరాఠీ తప్పనిసరి

మహారాష్ట్రలోని కేంద్ర కార్యాలయాల్లో మరాఠీ తప్పనిసరి

ముంబై: రాష్ట్రంలోని కేంద్ర ప్రభుత్వ కార్యాలయాల్లో మరాఠీ భాషను మహారాష్ట్ర ప్రభుత్వం తప్పనిసరి చేసింది. ఈ మేరకు అక్కడి ప్రభుత్వం మంగళవారం ఉత్తర్వులు జారీ చేసింది. ప్రభుత్వ కార్యాలయాల్లో మరాఠీని అధికారిక భాషగా ఉపయోగించాలని ముఖ్యమంత్రి ఉద్దవ్ ఠాక్రే అన్ని విభాగాలకు సూచనలు జారీ చేశారు. విభాగాల మధ్య వ్రాతపూర్వక సంభాషణ కోసం ఉపయోగించాల్సిన భాషగా మరాఠీని ప్రతిపాదించారు. మరాఠీని అధికారిక పనులకు ఉపయోగించని అధికారులపై క్రమశిక్షణా చర్యలు తీసుకోవాలన్నారు. ప్రభుత్వం చేసిన సూచనలను పాటించడంలో విఫలమైతే అధికారుల వార్షిక జీతాల పెంపును రద్దు చేయడంతోపాటు వారి సర్వీస్‌ రిజిస్టర్‌లో రిమార్క్స్‌ ఎంట్రీ చేయనున్నారు.

మహారాష్ట్రలో అధికారిక పత్రాలు, ఉత్తర్వులను ఆంగ్ల భాషలో విడుదల చేయడాన్ని ప్రజలు చాలా మంది శివసేన ప్రభుత్వానికి ఫిర్యాదు చేశారు. కేంద్ర ప్రభుత్వ కార్యాలయాల్లో ఇంగ్లిష్‌ భాషలో వస్తున్న ఉత్తర్వుల వల్ల పౌరులు, ప్రభుత్వం మధ్య సంబంధాల్లో అంతరం ఏర్పడిందని రాష్ట్ర ప్రభుత్వం భావించింది. దాంతో రాష్ట్రంలోని అన్ని కేంద్ర ప్రభుత్వ కార్యాలయాల్లో తప్పనిసరిగా మరాఠీ భాషను వాడాలని మహారాష్ట్రలోని శివసేన ప్రభుత్వం ఉత్తర్వులు జారీ చేసింది. ఇలాఉండగా, క్రీమ్ పోస్టుల బదిలీ సమయంలో రాష్ట్ర పోలీసు సర్వీస్ అధికారులను ఎలా తప్పించాలో, ఉత్తర భారత లేదా మరాఠీయేతర ఐపీఎస్ అధికారులకు ప్రాధాన్యత ఇచ్చిన విషయంపై ఈ సంవత్సరం ప్రారంభంలో శివసేనకు చెందిన పత్రిక 'సామ్న'లో ఒక కథనం ప్రచురించింది. అనంతరం 10 మంది డీసీపీ ర్యాంక్ అధికారుల బదిలీలను ముంబై పోలీసు కమిషనర్ కార్యాలయం రద్దు చేసింది. గత నెలలో, రాజ్ ఠాక్రే నేతృత్వంలోని మహారాష్ట్ర నవనిర్మాన్ సేన (ఎంఎన్ఎస్) అమెజాన్, ఫ్లిప్‌కార్ట్‌ల సంస్థలను కూడా హెచ్చరించింది. మరాఠీని గౌరవించడం విశేషమని ఎంఎన్ఎస్ నాయకుడు అఖిల్ చిత్రే.. అమెజాన్, ఫ్లిప్‌కార్ట్ ఉన్నతాధికారులకు లేఖలు అందించారు. మరాఠీ భాషను పక్కన పెట్టడానికి ఎంఎన్ఎస్ అనుమతించదని ఆయన చెప్పారు. ఈ-కామర్స్ కంపెనీలు మరాఠీ ప్రజలకు క్షమాపణ చెప్పాలని, మరాఠీని 'మీకు ఇష్టమైన భాషను ఎన్నుకోండి' ఐచ్చికంలో భాగం చేయాలని ఆయన సూచించారు.

లోక‌ల్ టు గ్లోబ‌ల్‌.. వార్త ఏదైనా.. అన్నీ ఒకే యాప్‌లో. న‌మ‌స్తే తెలంగాణ ఆండ్రాయిడ్ యాప్ డౌన్‌లోడ్ చేసుకోండి.