పెద్దవారిలోకంటే పిల్లల్లో బ్రెయిన్ ట్యూమర్స్ ఎక్కువని చెప్పుకోవచ్చు. పొద్దున లేవగానే తీవ్రమైన తలనొప్పి, వికారం, వాంతులు, ప్రవర్తించే తీరు మారటం, ఆందోళన, ఫిట్స్, చూపు- మాట మందగించటం వంటి లక్షణాలను మెదడు కణితిగా అనుమానించాల్సి ఉంటుంది. ‘క్యాన్సర్ కణితి’ అయినా, కాకపోయినా రెండూ ప్రమాదకరమే. మెదడులో కణితి వచ్చిన ప్రదేశాన్నిబట్టి సర్జరీ చేయాలా లేదా ఇతర ట్రీట్మెంట్ చేస్తే మంచిదా అని నిర్ణయిస్తారు. ఒక్కోసారి మెదడు కణితిని రేడియో సర్జరీతో తొలగిస్తారు.
ఆడుకునే పసిప్రాయం, అభం శుభం తెలియని అమాయకత్వం, క్యాన్సర్ అనే పదానికి అర్థమే తెలియని బాల్యం. కానీ, ఇదేమీ క్యాన్సర్కు అడ్డుకాదు. పెద్దవారిలో వచ్చే అన్ని క్యాన్సర్లు పిల్లల్లో వచ్చే ప్రమాదం ఉన్నా కొన్ని క్యాన్సర్స్ పిల్లల్లో ఎక్కువగా ఉంటాయి. అవి రక్త సంబంధిత క్యాన్సర్ (లుకేమియా), మెదడులో వచ్చే కణితులు (బ్రెయిన్ ట్యూమర్) లింఫొమా, సాఫ్ట్ టిష్యూ సార్కోమా. పిల్లల్లో క్యాన్సర్ ఎటువంటి లక్షణాలు కలిగించకుండానే సడన్గా జ్వరం వంటి లక్షణాలతో బయటపడవచ్చు. ఎన్నో విధాలుగా ఆలోచించి ప్రెగ్నెన్సీ ప్లాన్ చేసుకొని, ఒకరిని లేదా ఇద్దరిని అపురూపంగా పెంచుకొనే తల్లిదండ్రులు పాపకో, బాబుకో క్యాన్సర్ అని తెలియగానే ఎంతో తల్లడిల్లి పోతారు. తీవ్రమైన మానసిక కుంగుబాటుకు గురవుతారు. కానీ, కొంత ఉపశమనం కలిగించే విషయం ఏమిటంటే పిల్లల్లో క్యాన్సర్లు చాలావరకూ పూర్తిగా నయం చేయదగినవే. మన ముందు కనిపించే చాలామంది సెలబ్రెటీలు, సినిమా తారలు చిన్నప్పుడు క్యాన్సర్కు గురయినా, ట్రీట్మెంట్ తీసుకొని అందరిలాగానే సాధారణ జీవితం గడుపుతూ వారు ఎంచుకున్న రంగంలో ముందుకు వెళ్తున్నారు.
మన దేశంలో పిల్లల్లో క్యాన్సర్స్ పెద్దవారితో పోలిస్తే ఐదు శాతం వరకూ ఉంటాయి. ప్రతి సంవత్సరం దాదాపు 45 వేల మంది పిల్లలు క్యాన్సర్కు గురవుతున్నారు. వీరిలో 70 శాతం మందికి పూర్తిగా నయం చేయగలుగుతున్నారు. కానీ, 30 శాతం మందిలో వారి జీవితకాలంలో ఎప్పుడో ఒకప్పుడు తిరగబెట్టే ప్రమాదం ఉంటుంది. చిన్నప్పుడు 20 గ్రే (Gray) లకంటే అధిక రేడియేషన్కు గురయినా, క్యాన్సర్ వచ్చే ప్రమాదం పెరుగుతుంది. గ్రే (Gray) అంటే శరీరం గ్రహించిన రేడియేషన్ అని అర్థం. మామెగ్రామ్ వంటి పరీక్షలు మరీ చిన్న వయసులో చేయించుకోవడం కూడా అంత మంచిది కాదు. 30 ఏళ్లు పైబడ్డాక డాక్టర్ సలహా మేరకు చేయించుకుంటే మంచిది. పీడియాట్రిక్ క్యాన్సర్స్ చాలావరకూ కీమో, రేడియేషన్కు స్పందిస్తాయి. పిల్లలు రేడియేషన్ తీసుకునేటప్పుడు ఒంటరిగా ఉండటానికి భయపడి థెరపీకి సహకరించకపోతే ఒక్కోసారి వారికి మత్తు ఇవ్వటం జరుగుతుంది. 12 ఏండ్లు పైబడ్డాక అమ్మాయికిగాని అబ్బాయికికాని క్యాన్సర్ ట్రీట్మెంట్వల్ల పునరుత్పత్తి వ్యవస్థమీద ప్రభావం పడుతుందని అనుకుంటే ముందుగానే వారి అండాలను వీర్యకణాలను తీసి భద్రపరుస్తుంటారు.
పిల్లల్లో సాధారణంగా కనిపించే క్యాన్సర్ లుకేమియా. ఇన్ఫెక్షన్స్ నుంచి కాపాడే తెల్లరక్త కణాలు అపరిమితంగా పెరిగి పోవటమే లుకేమియా. అధికంగా పెరిగిన తెల్ల రక్తకణాలు ఎర్రరక్త కణాలను అడ్డుకొని రక్తాన్ని సరిగ్గా సరఫరా కానివ్వవు. ఇలా ఒక్కసారిగా జరగటం కానీ లేదా దీర్ఘకాలికంగా కాని జరుగవచ్చు. చాలావరకు నయం చేయగలిగే ఈ క్యాన్సర్కు ట్రీట్మెంట్స్ కీమో, రేడియోథెరపీలతో ఉంటాయి. బోన్మ్యారో ట్రాన్స్ప్లాంటేషన్, స్టెమ్సెల్ ట్రాన్స్ప్లాంటేషన్ ఈ క్యాన్సర్కు బాగా పనిచేస్తాయి. మొదటి బిడ్డకు రక్త సంబంధిత క్యాన్సర్ ఉంటే, రెండో బిడ్డ విషయంలో కూడా జాగ్రత్త పడాల్సి ఉంటుంది. పిల్లలు పాలిపోయినట్లు ఉండటం, ఆకలి, బరువు తగ్గటం, నీరసం, అలసట ఎక్కువగా ఉండటం, త్వరగా చర్మం కమిలి పోవటం, మచ్చలు మచ్చలుగా ఉండటం, తీవ్ర రక్తస్రావం, ఒళ్లు నొప్పులు వంటి లక్షణాలు కనిపిస్తే అనుమానించాల్సి ఉంటుంది. రక్త పరీక్షలు, తుంటి లేదా ఇతర పెద్ద ఎముకలనుంచి తీసిన మూలగ (బోన్మ్యారో)ను పరీక్షించటం ద్వారా ఈ క్యాన్సర్ను కనుక్కోవచ్చు.
రోగ నిరోధక వ్యవస్థలో ప్రధాన పాత్ర పోషించే లింఫ్ నాళాలకు సంబంధించిన క్యాన్సర్స్లో హాడ్జ్కిన్స్, నాన్ హాడ్జ్ కిన్స్ అనే రకాలుంటాయి. మెడ, చంకల్లో, గజ్జల్లో లింఫ్ నాళాలు వాయటం, జ్వరం, చలి, ఆకలి తగ్గటం, రాత్రిళ్లు చెమట్లు, దగ్గు, ఊపిరి తీసుకోవడం కష్టంగా కావడం మొదలైన లక్షణాలతో లింఫొమాలు బయట పడుతుంటాయి. ఇతర టిష్యూలతో కలిపే సాఫ్ట్ టిష్యులలో వచ్చే క్యాన్సర్స్ను ‘సాఫ్ట్ టిష్యూ సార్కోమా’ అంటారు. ఎముకలను, కండరాలను కలిపే ఈ ‘సాఫ్ట్ టిష్యూ క్యాన్సర్స్’ లక్షణాలు వచ్చిన ప్రదేశం మీద ఆధారపడి ఉంటాయి. ఈ టిష్యూలకు సాగే గుణం ఉండటం వల్ల తొలిదశలో లక్షణాలు బయటపడవు. ‘సాఫ్ట్ టిష్యూ’ల్లో వచ్చే క్యాన్సర్కు ప్రధానంగా సర్జరీ తర్వాత లేదా ముందు అవసరాన్నిబట్టి రేడియో, కీమో థెరపిలుంటాయి. అండాలలో, టెస్టిస్లలో వచ్చే జెర్మ్సెల్ ట్యూమర్స్కూడా పిల్లల్లో ఎక్కువ.
రెండేండ్లకంటే వయసు తక్కువున్న పిల్లల్లో అడ్రినల్ గ్రంథిలో, మెడ, ఛాతి, పొట్ట, పెల్విస్లలో వచ్చే కణితులు (న్యూరో) బ్లాస్టోమాలు, ఎముకలు, టిష్యూల్లో వచ్చే ఈవింగ్ సర్కోమా, మూత్రపిండాల్లో వచ్చే నెఫ్రోబ్లాస్టోమా పిల్లల్లో ఎక్కువగా కనిపించే క్యాన్సర్స్. పిల్లల్లో పూర్తిగా నయం చేయగలిగిన ఈ క్యాన్సర్స్ పెద్దవాళ్లలో కనిపిస్తే మాత్రం నయం చేయటం కష్టతరం అవచ్చు. పిల్లల్లో అరుదుగా కనిపించే మిగతా క్యాన్సర్స్ అదుపులోకి రావటం కష్టం కావటం, ఎంత ప్రయత్నించిన చికిత్సకు లొంగక పోవటం జరుగవచ్చు. పుట్టుకతో వచ్చే లోపాలు, జన్యు సంబంధ కారణాలు పిల్లల్లో క్యాన్సర్స్కు దారితీయవచ్చు. కాబట్టి, ముందు పుట్టిన బిడ్డకు క్యాన్సర్ ఉంటే రెండోవారి విషయంలో జాగ్రత్తగా ఉండటం, లక్షణాలను గుర్తించి సరైన ట్రీట్మెంట్ అందించటం, పోషకాహార లోపాలు లేకుండా జాగ్రత్త పడటం, ట్రీట్మెంట్ అయిన తర్వాతకూడా కొన్ని సంవత్సరాలపాటు డాక్టర్ సలహా మేరకు అవసరమైన పరీక్షలు చేయించుకోవటం తప్పనిసరి.
డాక్టర్ మోహనవంశీ
చీఫ్ సర్జికల్ ఆంకాలజిస్ట్, ఒమేగా హాస్పిటల్స్
హైదరాబాద్: 9848011421
కర్నూల్: 08518-273001
గుంటూర్: 0863-2223300