సూర్యాపేట, మార్చి 19 (నమస్తే తెలంగాణ) : ఫ్లడ్ లైట్ల వెలుగుల్లో మెరికల్లాంటి క్రీడాకారులు తొడగొట్టి కబడ్డీ కూత పెడితే ఎలా ఉంటుంది? కొర్రమట్టల్లాంటి రైడర్ను ప్రత్యర్థి జట్టు క్యాచ్ చేసినప్పుడు ఆడియన్స్ ఫీలింగ్ ఎలా ఉంటుంది? అవన్నీ ప్రత్యక్షంగా చూడాలంటే.. చలో సూర్యాపేట. 47వ జాతీయ స్థాయి సబ్ జూనియర్ బాలబాలికల ఛాంపియన్ షిప్-2021కు పేట ముస్తాబవుతున్నది. 29 రాష్ర్టాల నుంచి పాల్గొననున్న క్రీడాకారులకు మరిచిపోలేని ఆతిథ్యం ఇచ్చేందుకు సిద్ధమవుతున్నది. సాంస్కృతిక కార్యక్రమాలతో పండుగ వాతావారణాన్ని తలపించనున్నది. గుంటకండ్ల సావిత్రమ్మ మెమోరియల్ ఆధ్వర్యంలో రాష్ట్ర కబడ్డీ అసోసియేషన్ సహకారంతో ఈ నెల 22 నుంచి నాలుగు రోజుల పాటు ఈ టోర్నీ కొనసాగనున్నది. దేశంలోనే తొలిసారిగా అవుట్ డోర్లో నిర్వహించనున్న ఈ పోటీల్లో 60 జట్లు పాల్గొననుండగా.. 15వేల మంది వీక్షించేలా స్థానిక పోలీస్ పరేడ్ గ్రౌండ్లో ఏర్పాట్లు సాగుతున్నాయి. రాష్ట్ర విద్యుత్ శాఖ మంత్రి గుంటకండ్ల జగదీశ్రెడ్డి శుక్రవారం సాయంత్రం గ్రౌండ్లో తిరిగి ఏర్పాట్లను పరిశీలించారు. మరోవైపు స్థానిక క్రీడాకారుల్లో స్ఫూర్తి నింపేలా శనివారం నుంచి నియోజకవర్గ వ్యాప్తంగా కబడ్డీ పోటీలు నిర్వహిస్తున్నారు.
మంత్రి జగదీశ్రెడ్డి చొరవతో సూర్యాపేట జాతీయ కబడ్డీ పోటీలకు వేదికగా మారింది. 2015 సంవత్సరంలో రాష్ట్ర స్థాయి అండర్ 19, అండర్ 14 క్రీడలు నిర్వహించగా 2016లో జాతీయ స్థాయి అండర్ 19 కబడ్డీ, 2017లో రాష్ట్ర స్థాయి సీనియర్ వాలీబాల్ పోటీలు జరిగాయి. 2017లోనే అండర్ 20 రాష్ట్రస్థాయి అథ్లెటిక్స్ను ఘనంగా నిర్వహించారు. వీటితో పాటు నూతనకల్, హుజూర్నగర్, కోదాడ తదితర ప్రాంతాల్లోనూ రాష్ట్రస్థాయి పోటీలు నిర్వహించారు. తాజాగా సూర్యాపేట జిల్లా కేంద్రం జాతీయస్థాయి కబడ్డీ క్రీడలకు ముస్తాబైంది. తెలంగాణ సంస్కృతి, సంప్రదాయాలు ప్రతిబింబించేలా పలు సాంస్కృతిక కార్యక్రమాలు నిర్వహించనున్నారు.
ఆరు కోర్టులు.. 60జట్లు.
పోలీస్ పరేడ్ గ్రౌండ్లో ఆరు కోర్టులు సిద్ధమయ్యాయి. ఇప్పటికే మైదానాన్ని చదును చేసి విద్యుత్ లైనింగ్ పూర్తి చేశారు. కోర్టులో ఫోం ప్లేట్లు వేస్తున్నారు. 30బాలురు, 30బాలికలు మొత్తం 60జట్లు, 720మంది క్రీడాకారులు హాజరుకానున్నారు. వీరితో పాటు 120మంది కోచ్లు, మేనేజర్లు, 10మంది వ్యాఖ్యాతలు, 100మంది టెక్నిషియన్లు రానున్నారు. కోర్టుల ప్రాంగణం చుట్టూ దాదాపు 20వేల మంది కూర్చునేలా సీటింగ్ ఏర్పాటు చేశారు. డే అండ్ నైట్ కొనసాగే ఈ పోటీలకు భారీ ఎత్తున లైటింగ్ ఏర్పాటు చేస్తున్నారు.