న్యూఢిల్లీ : స్పుత్నిక్ వీ కోవిడ్ టీకాలను మార్కెట్లోకి రిలీజ్ చేసేందుకు మరింత సమయం పట్టనున్నది. ఓ ఛానల్కు ఇచ్చిన ఇంటర్వ్యూలో డాక్టర్ రెడ్డీస్ ల్యాబ్ ప్రతినిధి ఒకరు ఈ విషయం తెలిపారు. టీకాల దిగుమతి, క్వాలిటీ టెస్టింగ్ ఆలస్యం కావడం వల్ల.. స్పుత్నిక్ వీ టీకాలను మార్కెట్లోకి రిలీజ్ చేయడానికి మరింత సమయం పట్టే అవకాశాలు ఉన్నట్లు తెలుస్తోంది. ప్రస్తుతం పైలట్ దశలో ఆ టీకాలను కొన్ని నగరాల్లో అందిన్తున్నారు. 28 నగరాల్లో స్పుత్నిక్ వీ టీకాలను అందుబాటులోకి తెచ్చేందుకు డాక్టర్ రెడ్డీస్ ల్యాబ్ ప్రయత్నిస్తున్నది. అయితే మరిన్ని నగరాలకు విస్తరించే అవకాశాలపై క్లారిటీ లేదని అపోలో హాస్పిటల్ వర్గాలు వెల్లడించాయి.
రెండు డోసుల స్పుత్నిక్ టీకాలు వేరువేరుగా ఉంటాయి. ఆడినోవైరస్ ద్వారా ఆ టీకాలను తయారు చేశారు. కానీ రెండు డోసుల్లో తేడా ఉంటుంది. 21 రోజుల వ్యవధిలో ఆ టీకాలను ఇవ్వాలి. బహుశా రెండు వేరువేరు డోసులు రాని కారణంగా.. స్పుత్నిక్ వీ పంపిణీ ఆలస్యం అవుతున్నట్లు భావిస్తున్నారు. రష్యాకు చెందిన స్పుత్నిక్ వీ టీకాలను ఇండియాలో రెడ్డీస్ ల్యాబ్ సరఫరా చేస్తున్న విషయం తెలిసిందే.