భువనేశ్వర్: పాముకు పాలు పోసి పెంచితే ఎప్పటికైనా ప్రాణం తీస్తుందంటారు. కానీ ఓ యువకుడు మాత్రం ఏకంగా అపస్మారక స్థితిలో ఉన్న పాము నోట్లో నోరు పెట్టి ఊపిరే ఊదాడు. అయితే ఇక్కడ పాము ఆ యువకుడి ప్రాణాలు తీయలేదు. కానీ ఆ యువకుడు మాత్రం చావుబతుకుల్లో ఉన్న పాముకు ప్రాణం పోశాడు. ఒడిశా రాష్ట్రం మల్కన్గిరి జిల్లాలో ఈ ఘటన చోటుచేసుకుంది.
వివరాల్లోకి వెళ్తే.. తన దారిన తాను వెళ్తున్న ఓ యువకుడికి దారి వెంట అపస్మారక స్థితిలో ఒక పాము కనిపించింది. ఆ పాముకు శ్వాస అందడంలేదని గమనించి ఓ స్ట్రా సాయంతో దాని నోట్లోకి ఊపిరి ఊదడం మొదలుపెట్టాడు. ఇది చూసి స్థానికులు చాలామంది అక్కడ గుమిగూడారు. యువకుడు దాదాపు 15 నిమిషాలు శ్రమించిన తర్వాత పాము స్పృహలోకి వచ్చింది.
అది చూసి సదరు యువకుడితోపాటు అక్కడ పోగైన జనం కూడా సంతోషించారు. అనంతరం ఆ పామును సమీప అటవీ ప్రాంతంలో వదిలేశారు. ప్రస్తుతం ఈ ఘటనకు సంబంధించిన దృశ్యాలు సోషల్ మీడియాలో వైరల్గా మారాయి.