శనివారం 28 మార్చి 2020
National - Feb 19, 2020 , 03:09:42

గాంధీ.. గాడ్సే కలిసుండలేరు!

గాంధీ.. గాడ్సే కలిసుండలేరు!
  • నితీశ్‌ కుమార్‌ నాకు తండ్రిలాంటివారు
  • గాంధీజీ సిద్ధాంతాలు పాటిస్తున్నామంటూ గాడ్సేకు మద్దతిచ్చేవారి పక్షాన నిలిచారు
  • మా ఇద్దరి మధ్య విభేదాలు నిజమే
  • ఎన్నికల వ్యూహకర్త ప్రశాంత్‌ కిషోర్‌

పాట్నా, ఫిబ్రవరి 18: రాజకీయ నేతగా మారిన ఎన్నికల వ్యూహకర్త ప్రశాంత్‌ కిషోర్‌ బీహార్‌ ముఖ్యమంత్రి నితీశ్‌కుమార్‌పై విమర్శల దాడి చేశారు. గాంధీజీ సిద్ధాంతాలు పాటిస్తున్నామని నితీశ్‌ చెప్తుంటారని, కానీ అధికారం కోసం ఆయన గాడ్సేకు మద్దతిచ్చే వారి(బీజేపీ) పక్షాన నిలిచారని వ్యాఖ్యానించారు. జేడీ(యూ) నుంచి బహిష్కరణకు గురైన ప్రశాంత్‌ కిషోర్‌ మొదటిసారిగా మంగళవారం పాట్నాలో మీడియా సమావేశంలో మాట్లాడారు. జేడీ(యూ)లో చేరకముందు నుంచే నితీశ్‌ తనకు తండ్రిలాంటి వారని ఆయన గురించి చెడుగా మాట్లాడలేనని అన్నారు. అయితే ఆయనతో విభేదాలు తలెత్తిన మాట నిజమేనని అంగీకరించారు. గాంధీ సిద్ధాంతాలకు కట్టుబడి ఉంటామని చెప్పుకొనే నితీశ్‌ బీజేపీతో జతకట్టారని విమర్శించారు. ‘గాంధీజీ, జయప్రకాశ్‌ నారాయణ్‌, రామ్‌ మనోహర్‌ లోహియా సిద్ధాంతాలను ఎన్నటికీ విడువబోనని నితీశ్‌జీ తరచుగా చెప్తుంటారు.. అదే సమయంలో ఆయన గాడ్సే సిద్ధాంతాలను నమ్మే వారితో కలిసి సాగుతున్నారు. గాంధీ, గాడ్సే కలిసి ఉండలేరు. మీరు బీజేపీతో జత కట్టాలనుకుంటే నాకెలాంటి అభ్యంతరం లేదు. కానీ మీరు రెండు సిద్ధాంతాలతో ముందుకు సాగలేరు’ అని పేర్కొన్నారు. ఈ అంశంపై తనకు, నితీశ్‌కు మధ్య చాలాకాలంపాటు చర్చలు జరిగాయని ప్రశాంత్‌ చెప్పారు. ఓ పార్టీ నాయకునిగా మీరు (నితీశ్‌) ఏవైపు ఉన్నారో స్పష్టం చేయాల్సిన అవసరముందని పేర్కొన్నారు. ‘ఎన్నికల వ్యూహకర్తగా వివిధ రాజకీయ పార్టీలతో నాకున్న అనుబంధం అందరికీ తెలిసిందే. 


దానిని నేనెప్పుడూ రహస్యంగా ఉంచలేదు. కానీ మరో పార్టీ ఏజెంటుగా నేను జేడీ(యూ)లో చేరలేదు. అబద్ధాలతో ఇతరులను ఎదుర్కొనవచ్చని అనుకుంటే.. ఆ పని నాకు తండ్రిలాంటి నితీశ్‌కుమార్‌ చేశాడని చెప్తాను’ అంటూ ప్రశాంత్‌ తీవ్ర ఆరోపణలు చేశారు. ‘బీజేపీకి దూరమైన నితీశ్‌ 2014లో ఒంటరిగా లోక్‌సభ ఎన్నికల్లో  పోటీ చేసి, కేవలం రెండు సీట్లు గెలుపొందారు. అయినప్పటికీ నితీశ్‌ బీహార్‌ ప్రజల ఆశాదీపంగానే ఉన్నారు. కానీ నేటి పరిస్థితి చూడండి.. వచ్చే బీహార్‌ అసెంబ్లీ ఎన్నికల్లో ఎన్డీయే పక్షనేతగా నితీశ్‌ ఉంటారని మరో పార్టీకి చెందిన ఓ గుజరాతీ నాయకుడు (అమిత్‌షా)భరోసా ఇస్తున్నాడు. అంటే ఇంతకుముందు నితీశ్‌ బీహార్‌ వాసులకు నాయకునిగా కాకుండా ఓ సంస్థకు మేనేజర్‌గా పనిచేసినట్టా?. తమ నాయకుడు మరొకరిపై ఆధారపడటాన్ని బీహార్‌ వాసులు సహించలేరు. ఒకప్పుడు బీహార్‌లో బీజేపీ తరఫున ప్రచారం చేయకుండా మోదీని అడ్డుకున్న నితీశ్‌.. ఇటీవల ఢిల్లీ అసెంబ్లీ ఎన్నికల్లో బీజేపీకి మద్దతుగా అమిత్‌షా, నడ్డా అనుచరునిలాగా ప్రచారం చేయడం దయనీయం’ అంటూ విచారం వ్యక్తం చేశారు. బీహార్‌ ప్రయోజనాల కోసమే బీజేపీతో స్నేహం చేస్తున్నామన్న నితీశ్‌ వాదనను ప్రశాంత్‌ తోసిపుచ్చారు. ‘ఏం సాధించారు. ఎన్నో ఏండ్లుగా డిమాండ్‌ చేస్తున్నప్పటికీ రాష్ర్టానికి ప్రత్యేక హోదా వచ్చిందా? పాట్నా యూనివర్సిటీకి కేంద్ర హోదా కల్పించాలంటూ మోదీ ముందు చేతులు జోడించి వేడుకున్నా.. మోదీ కనీసం హామీ కూడా ఇవ్వలేదు’ అంటూ మండిపడ్డారు.


కొత్త పార్టీ పెట్టే యోచన లేదు

పశ్చిమ బెంగాల్‌ సీఎం మమతా బెనర్జీ, ఢిల్లీ సీఎం అరవింద్‌ కేజ్రీవాల్‌తో ప్రశాంత్‌ కిషోర్‌ ఇటీవల సన్నిహితంగా ఉంటున్న నేపథ్యంలో ఆయన కొత్త పార్టీ పెట్టనున్నారన్న ఊహాగానాలు వినిపిస్తున్నాయి. అయితే తనకు అలాంటి ఆలోచన ఏదీ లేదని ప్రశాంత్‌ స్పష్టంచేశారు. బీహార్‌ రాష్ర్టాన్ని అన్ని రంగాల్లో తీర్చిదిద్దేందుకు ‘బాత్‌ బీహార్‌ కీ’ పేరుతో ఒక కార్యక్రమం చేపట్టనున్నట్టు వెల్లడించారు. ఈ నెల 20 నుంచి ఈ కార్యక్రమాన్ని ప్రారంభిస్తున్నామని చెప్పారు. వంద రోజుల్లో కోటి మంది యువతను కలుస్తామని చెప్పారు. మరోవైపు, ప్రశాంత్‌ కిషోర్‌ వ్యాఖ్యలపై జేడీయూ ఆగ్రహం వ్యక్తం చేసింది. రాజకీయాల్లో జోక్యం చేసుకోవడానికి బదులు కిషోర్‌ తన సమయాన్ని తన ‘వ్యాపారానికి’ కేటాయించుకోవడం మంచిదని హితవు చెప్పింది. కిషోర్‌కు రాజకీయాలు చేతకావని జేడీయూ ప్రతినిధి కేసీ త్యాగి విమర్శించారు. కిషోర్‌ అనేక పార్టీలతో కలిసి పనిచేశారని, అది అనైతికమని చెప్పారు.


logo