కన్నడ చలన చిత్ర పరిశ్రమలో తనకంటూ ప్రత్యేక అధ్యాయం లిఖించుకున్నారు కన్నడ కంఠీరవ రాజ్ కుమార్. 1954లో వచ్చిన బెదర కన్నప్ప సినిమా ద్వారా పూర్తి స్థాయి నటుడిగా ఎంట్రీ ఇచ్చిన రాజ్కుమార్ అక్కడి నుండి మెల్లగా ఒక్కొక్కటిగా అవకాశాలు అందుకుంటూ ముందుకు సాగారు. ఆయనకు కన్నడ నాటే కాదు దేశ వ్యాప్తంగా మంచి పేరుంది. రాజ్ కుమార్ కెరీర్ లో ఎన్నో గొప్ప సినిమాలున్నప్పటికీ, బంగారద మనుష్య (బంగారు మనిషి), కస్తూరి నివాస, గంధద గుడి, జీవన చైత్ర ఆయనకు మరింత పేరు తెచ్చిపెట్టాయి.
రాజ్ కుమార్ నటుడిగానే కాకుండా సింగర్గాను అలరించారు. 1954 నుంచి 2006 వరకు మొత్తంగా తన కెరీర్ లో 206 సినిమాలతో కన్నడ సినిమాను శ్వాసించి శాసించిన మహా నటుడు రాజ్ కుమార్. తన స్వంత సంస్థలైన వజ్రేశ్వరి కంబైన్స్, దాక్షాయణి కంబైన్స్ బ్యానర్ల పై 100వ సినిమా భాగ్యదా బాగీలు, అలానే 200వ సినిమా దేవతా మనుష్య సినిమాలు చేసి మంచి విజయాలు అందుకున్నారు రాజ్ కుమార్.ఆయన ఎన్నో అవార్డులు, రివార్డులు అందుకున్నారు. పద్మ భూషణ్, కర్ణాటక రత్న, దాదా సాహెబ్ ఫాల్కే, కెంటకీ కల్నేల్ ఇలా ఎన్నో అవార్డులు దక్కించుకున్నారు. 2006, ఏప్రిల్ 12న రాజ్ కుమార్ అందరిని విడిచి అనంతలోకాలకేగారు. నేడు ఆయన 91వ జయంతి కావడంతో పలువురు అభిమానులు, ప్రేక్షకులు ఆయనను స్మరించుకుంటున్నారు.
మెగాస్టార్ చిరంజీవి తన ట్విట్టర్లో రాజ్కుమార్తో దిగిన ఫొటోని షేర్ చేస్తూ.. గొప్పతనం ఆయన సింప్లిసిటీలో ఉంటుంది. అన్నావరు మాటలు,ఆయన పనులు చూసి ఎంతో నేర్చుకున్నాను. నా జీవితంపై ఆయన ప్రభావం ఎంతో ఉంది. డాక్టర్ రాజ్కుమార్ జయంతి సందర్భంగా నిజమైన బంగారద మనుష్య (బంగారు మనిషి)ను గుర్తు చేసుకుంటున్నాను అని చిరు తన ట్వీట్లో పేర్కొన్నారు.