సాధారణంగా ఇండస్ట్రీలో నాని కథల ఎంపికపై చాలా నమ్మకం ఉంది. ఈయన ఓ కథ ఓకే చేశాడంటే కచ్చితంగా మినిమమ్ గ్యారెంటీ అనే నమ్మకం అందరిలోనూ వచ్చేసింది. అయితే కొన్నిసార్లు ఆయన కూడా కథలను సరిగ్గా అంచనా వేయలేక వదిలేసిన సందర్భాలు ఉన్నాయి. అనివార్య కారణాలతో కొన్ని సినిమాలు వదిలేస్తే.. మరికొన్ని డేట్స్ కుదరక వదిలేశాడు. అలా ఇన్నేళ్ళ ఆయన కెరీర్లో దాదాపు 10 సినిమాల వరకు నాని నో చెప్పాడు. నేచురల్ స్టార్ వదిలేసిన సినిమాల్లో చాలా వరకు విజయాలే ఉన్నాయి. మరి అవేంటి.. నాని ఎందుకు ఆ సినిమాలను వదిలేశాడు చూద్దాం..
ఓసారి పని చేసిన దర్శకులతో సాధారణంగా మళ్లీ మళ్లీ వర్క్ చేయడానికి ఎందుకో కానీ నాని పెద్దగా ఇష్టపడడు. ఆయన కోసం గతంలోనూ కొందరు దర్శకులు ప్రయత్నించారు కానీ కుదర్లేదు. ప్రస్తుతం టక్ జగదీష్ మాత్రమే శివ నిర్వాణతో మరోసారి చేస్తున్నాడు. కానీ తనకు కృష్ణగాడి వీర ప్రేమగాథ లాంటి సినిమా ఇచ్చిన హను రాఘవపూడి మరో కథ చెప్తే ఎందుకో నో చెప్పాడు. ఇదే కథను ఇప్పుడు దుల్కర్ సల్మాన్ హీరోగా చేస్తున్నాడు హను. స్వాంతంత్య్రం పూర్వం కథతో ఈ సినిమా వస్తుంది. కేవలం హను ట్రాక్ రికార్డు కారణంగానే నాని ఈ సినిమాను వదిలేశాడని ఇండస్ట్రీలో ప్రచారం జరుగుతుంది.
ఇప్పుడు విడుదలైన శర్వానంద్ శ్రీకారం సినిమా కథ కూడా ముందుగా నాని దగ్గరికే వచ్చింది. కొత్త దర్శకుడు కిషోర్ ఈ కథకు నాని అయితే బాగుంటాడని అనుకున్నాడు. అయితే ఆయన ఇతర సినిమాలతో డేట్స్ క్లాష్ కారణంగా నో చెప్పాడని తెలుస్తుంది. కానీ కథ నచ్చేసరికి తనే తన మిత్రుడు శర్వానంద్ను రిఫర్ చేశాడని ప్రచారం జరుగుతుంది. వ్యవసాయం నేపథ్యంలో తెరకెక్కిన ఈ సినిమాకు టాక్ బాగానే ఉంది.
సమంత అక్కినేనితో మూడోసారి నటించే అవకాశం వదిలేశాడు నాని. ఇప్పటికే ఈమెతో ఈగ, ఎటో వెళ్లిపోయింది మనసు సినిమాలు చేశాడు నాని. 96 రీమేక్ తెలుగులో నాని, సమంతతోనే చేయాలనుకున్నాడు దిల్ రాజు. కథ కూడా చెప్పించాడు.. ఆయనకు ఎందుకో కానీ ఈ కథ కనెక్ట్ కాలేదు. చివరికి నాని జడ్జిమెంట్ కరెక్ట్ అయింది. నాని వదిలేసిన జాను సినిమాను శర్వానంద్ చేశాడు. ఆయనకు మరో ఫ్లాప్ ఇచ్చింది ఈ చిత్రం.
నాని వరస ఫ్లాపుల్లో ఉన్నపుడు ఆయనకు అవసరమైన విజయాన్ని అందించిన దర్శకుడు నాగ్ అశ్విన్. ఎవడే సుబ్రమణ్యంతో మంచి హిట్ ఇచ్చాడు ఈ కుర్ర దర్శకుడు. ఆయన తెరకెక్కించిన మహానటిలో నాగేశ్వరరావు పాత్ర కోసం ముందు నానిని అడిగారు. కానీ ఆయన కాదనే సరికి ఏఎన్నార్ మనవడు నాగ చైతన్య చేశాడు.
నాగార్జునతో దేవదాస్ సినిమాలో నటించే కంటే ముందుగానే మరో ఆఫర్ కూడా వచ్చింది నానికి. వంశీ పైడిపల్లి తెరకెక్కించిన ఊపిరి సినిమాలో కార్తి చేసిన పాత్ర కోసం ముందుగా నానిని అడిగారు. ఆయన ఎందుకో నో అన్నాడు. ఆ తర్వాత ఆ పాత్ర కోసం జూనియర్ ఎన్టీఆర్ను అడిగారు. కానీ కాళ్లు పట్టే సన్నివేశాలున్నాయని నో చెప్పాడు. ఆ తర్వాత కార్తి చేశాడు.. సినిమాకు బాగానే హెల్ప్ అయింది ఈ పాత్ర. కానీ ఊపిరికి నాని, నాగార్జున చేసుంటే సినిమా రేంజ్ మరింత పెరిగుండేది అంటారు అభిమానులు.
కెరీర్ కొత్తలో కూడా కొన్ని సినిమాలు వదిలేసుకున్నాడు నాని. నాగార్జున లాంటి నిర్మాతకు కూడా ఓ సందర్భంలో నో చెప్పాల్సి వచ్చింది. కారణం తెలియదు కానీ విరించి వర్మ తొలి సినిమా ఉయ్యాలా జంపాల కథను ముందు నానికే చెప్పాడు కానీ ఈయన నో చెప్పాడు. అయితే వెంటనే తన రెండో సినిమాను నానితోనే చేశాడు విరించి. అదే మజ్ను. ఈ సినిమా విజయం సాధించింది.
అనిల్ రావిపూడితో వర్క్ చేసే అవకాశం కూడా వదిలేసుకున్నాడు నాని. అప్పట్లో సాయి ధరమ్ తేజ్ హీరోగా అనిల్ తెరకెక్కించిన సుప్రీమ్ కథ ముందు నానికి చెప్పాడని ఇండస్ట్రీలో వార్తలున్నాయి. అయితే ఆ సినిమా సమయంలో నాని మరో రెండు సినిమాలకు డేట్స్ ఇచ్చాడు. కథ నచ్చినా కూడా ఆ కారణంతోనే సుప్రీమ్ వదిలేసుకున్నాడు. కానీ ఎప్పటికైనా అనిల్ రావిపూడితో సినిమా చేస్తానంటున్నాడు నాని.
నితిన్ కమ్ బ్యాక్ సినిమా ఇష్క్ తర్వాత వెంటనే వచ్చిన మరో హిట్ గుండెజారి గల్లంతయిందే. ఈ కథను చాలా మంది హీరోలకు చెప్పాడు దర్శకుడు విజయ్ కుమార్ కొండ. అందులో కొందరు స్టార్స్ ఉన్నారు. కొందరు అప్ కమింగ్ హీరోలు కూడా ఉన్నారు. అప్పటికి అప్ కమింగ్ హీరో అయిన నాని కూడా ఈ సినిమాకు నో చెప్పాడు. కథ నచ్చలేదో లేదంటే ఆ టైమ్ లో కథను సరిగ్గా అంచనా వేయలేదో తెలియదు కానీ గుండెజారి గల్లంతయిందే నాని మిస్ చేసుకున్నాడు. అదే నితిన్ కు మరో విజయాన్ని అందించింది.
నాని తన కెరీర్ లో మాస్ కథలు అంతగా చేయలేదు. అలాంటి సమయంలో ఈయనకు వచ్చిన ఆఫర్ తడాఖా. సునీల్, నాగ చైతన్య హీరోలుగా వచ్చిన ఈ సినిమాను డాలీ తెరకెక్కించాడు. అయితే ముందుగా ఇందులో నాగ చైతన్య పాత్ర కోసం నానిని అడిగారు కానీ ఆయన యాక్షన్ డోస్ ఎక్కువైందనే కారణంతో నో చెప్పినట్లు ఇండస్ట్రీలో ప్రచారం జరిగింది. తడాఖా సునీల్, చైతూ కెరీర్ లో మంచి మాస్ హిట్ గా నిలిచిపోయింది.
నానితో అప్పటికే పిల్ల జమీందార్ లాంటి సూపర్ హిట్ సినిమాను తెరకెక్కించిన అశోక్ వెంటనే మరో కథ కూడా చెప్పాడు. అదే సుకుమారుడు. ఈ సినిమాను కూడా నానితోనే చేయాలనుకున్నా.. అందులో పిల్ల జమీందార్ ఛాయలు ఎక్కువగా కనిపించడంతో నో చెప్పాడు నాని. అదే కథను ఆది సాయికుమార్ తో సుకుమారుడుగా చేసాడు అశోక్. నాని అంచనా తప్పు కాలేదు. ఈ సినిమా అంతగా ఆకట్టుకోలేదు.