గురువారం 21 జనవరి 2021
National - Jan 03, 2021 , 22:56:40

కొవాగ్జిన్‌కు డీసీజీఐ అనుమతి దేశానికే గర్వకారణం

కొవాగ్జిన్‌కు డీసీజీఐ అనుమతి దేశానికే గర్వకారణం

హైదరాబాద్‌: తెలంగాణ రాజధాని హైదరాబా‌ద్‌లోని ఫార్మా మేజర్‌ భారత్‌ బయోటెక్‌ అభివృద్ధి చేసిన వ్యాక్సిన్‌ కొవాగ్జిన్‌ను అత్యవసర వినియోగం కోసం డైరెక్టర్‌ జనరల్‌ రెగ్యులేటరీ ఆఫ్‌ ఇండియా) (డీసీజీఐ) లైసెన్సింగ్‌ అనుమతి మంజూరు చేసింది. ఇలా కొవాగ్జిన్‌ అత్యవసర వినియోగానికి డీసీజీఐ ఆమోదం తెలపడం పట్ల భారత్‌ బయోటెక్‌ ఎండీ కృష్ణ ఎల్ల గర్వ కారణం అని అభిప్రాయ పడ్డారు. 

తమ వ్యాక్సిన్‌కు డీసీజీఐ అనుమతివ్వడం హర్షణీయం అని కృష్ణ ఎల్ల పేర్కొన్నారు. ఈ అనుమతి భారత శాస్త్రీయ పరిశోధనా సామర్థ్యానికి తార్కాణమని అభివర్ణించారు. 

దేశ పర్యావరణహిత ఆవిష్కరణల పథంలో ఇదో మైలురాయిగా నిలిచిపోతుందని కృష్ణ ఎల్ల వ్యాఖ్యానించారు. వివిధ రకాల వైరల్‌ ప్రొటీన్లను తట్టుకునేలా కొవాగ్జిన్‌ రూపొందించినట్లు చెప్పారు. కొవాగ్జిన్‌ బలమైన రోగనిరోధక ప్రతిస్పందనలను ఉత్పత్తి చేస్తుందన్నారు. 

డీసీజీఐ అనుమతి కొత్త ఉత్పత్తుల అభివృద్ధికి ఊతమిచ్చేలా ఉందని కృష్ణ ఎల్ల సంతోషం వ్యక్తం చేశారు. కొవిడ్‌-19 నిర్మూలనకు భారత్‌ బయోటెక్‌ రూపొందించిన స్వదేశీ టీకా కొవాగ్జిన్‌కు నిపుణుల కమిటీ శనివారం పచ్చజెండా ఊపిన విషయం తెలిసిందే. 

అనంతరం కొవాగ్జిన్‌కు షరతులతో కూడిన అత్యవసర వినియోగానికి అనుమతి ఇవ్వాలని డీసీజీఐకు నిపుణుల కమిటీ సిఫారసు చేసింది. నిపుణుల కమిటీ సిఫారసుల మేరకు అన్ని అంశాలను పరిగణనలోకి తీసుకున్న డీసీజీఐ.. తాజాగా కొవాగ్జిన్‌ తయారు చేయడానికి లైసెన్సింగ్‌ అనుమతి జారీ చేసింది.

లోకల్ టు గ్లోబల్.. వార్త ఏదైనా.. అన్నీ ఒకే యాప్లో. నమస్తే తెలంగాణ ఆండ్రాయిడ్ యాప్ డోన్లోడ్ చేసుకోండి.


logo