గురువారం 09 జూలై 2020
National - Jun 21, 2020 , 13:34:34

దేశంలో 68 ల‌క్ష‌లు దాటిన‌ క‌రోనా ప‌రీక్ష‌లు!

దేశంలో 68 ల‌క్ష‌లు దాటిన‌ క‌రోనా ప‌రీక్ష‌లు!

న్యూఢిల్లీ: ‌దేశంలో క‌రోనా మ‌హ‌మ్మారి విజృంభ‌ణ కొన‌సాగుతూనే ఉన్న‌ది. ప్ర‌తిరోజు ప‌ది వేల‌కుపైగా కొత్త కేసులు న‌మోద‌వుతున్నాయి. కేసులు పెరుగుతుండ‌టంతో అధికారులు దేశంలోని వివిధ ల్యాబ్‌లలో నిర్వ‌హించే క‌రోనా నిర్ధార‌ణ ప‌రీక్ష‌ల సంఖ్యను కూడా పెంచారు. శ‌నివారం మ‌ధ్యాహ్నం నుంచి ఆదివారం మ‌ధ్యాహ్నం వ‌ర‌కు గ‌త 24 గంట‌ల వ్య‌వ‌ధిలో  దేశవ్యాప్తంగా 1,90,730 మందికి క‌రోనా నిర్ధార‌ణ ప‌రీక్ష‌లు చేశారు. ఇండియ‌న్ కౌన్సిల్ ఆఫ్ మెడిక‌ల్ రిసెర్చ్ (ICMR) ఈ వివ‌రాల‌ను వెల్ల‌డించింది. 

కాగా, దేశంలో ఒకేరోజు 1.90 ల‌క్ష‌ల‌కుపైగా క‌రోనా నిర్ధార‌ణ ప‌రీక్ష‌లు నిర్వ‌హించ‌డం ఇదే తొలిసార‌ని ICMR తెలిపింది. కొత్త‌గా నిర్వ‌హించిన ప‌రీక్ష‌ల‌తో క‌లిపి దేశంలో ఇప్ప‌టివ‌ర‌కు మొత్తం 68,07,226 మందికి క‌రోనా ప‌రీక్ష‌లు చేసిన‌ట్ల‌య్యింద‌ని వెల్ల‌డించింది. కాగా, దేశ‌వ్యాప్తంగా మొత్తం 953 ల్యాబోరేట‌రీల్లో క‌రోనా ప‌రీక్ష‌లు జ‌రుగుతున్నాయి. అందులో 699 ప్ర‌భుత్వ ల్యాబొరేట‌రీలు కాగా, 254 ప్రైవేటు ల్యాబొరేట‌రీలు ఉన్నాయి.  

అదేవిధంగా దేశంలో క‌రోనా మ‌హ‌మ్మారి బారి నుంచి కోలుకుంటున్న బాధితుల సంఖ్య కూడా రోజురోజుకు పెరుగుతున్న‌ది. గ‌త 24 గంట‌ల్లో 13,925 మంది క‌రోనా బారి నుంచి బ‌య‌ట‌ప‌డగా.. ఇప్ప‌టి వ‌ర‌కు కోలుకున్న మొత్తం క‌రోనా బాధితుల సంఖ్య 2,27,755కు చేరింది. దీంతో దేశంలో క‌రోనా రిక‌వరీ రేటు 55.49 శాతానికి పెరిగింది. 


logo