సోమవారం 13 జూలై 2020
National - Apr 28, 2020 , 01:32:34

కోలుకున్న వారి నుంచి సోకదు

కోలుకున్న వారి నుంచి సోకదు

  • ప్లాస్మా థెరపీలో వాళ్లే కీలకం
  • 24 గంటల్లో 1,396 కొత్త కేసులు 
  • ఒక్క కేసు నమోదు కాని 16 జిల్లాలు

న్యూఢిల్లీ: కరోనా నుంచి కోలుకున్న వారి నుంచి ఇతరులకు వైరస్‌ సోకే ప్రమాదం లేదని కేంద్ర పభుత్వం స్పష్టం చేసింది. వారి రక్తం నుంచి సేకరించే ప్లాస్మా ద్వారా మరింత మంది కరోనా రోగులు కోలుకునే అవకాశమున్నదని పేర్కొంది. ఈ నేపథ్యంలో కోలుకున్న వారిని దూరంగా ఉంచడం లేదా వారిపట్ల వివక్ష చూపడం తగదని కేంద్ర ఆరోగ్యశాఖ హితవుపలికింది. దేశవ్యాప్తంగా వైరస్‌ బారినపడిన వారిలో 6,184 మంది కోలుకున్నారని తెలిపింది. మొత్తం కేసులతో పోల్చితే కోలుకున్నవారు 22.17 శాతమని చెప్పింది. కాగా, ఆదివారం నుంచి సోమవారం వరకు గత 24 గంటల్లో 1,396 కొత్త వైరస్‌ కేసులు నమోదైనట్లు కేంద్రం చెప్పింది. దీంతో మొత్తం కేసుల సంఖ్య 27,892కి, మొత్తం మరణాలు 872కి చేరినట్లు పేర్కొంది. గతంలో పాజిటివ్‌ కేసులున్న 16 జిల్లాల్లో గత 28 రోజులుగా ఒక్క కొత్త కేసు కూడా నమోదు కాలేదని కేంద్ర ఆరోగ్యశాఖ సంయుక్త కార్యదర్శి లవ్‌ అగర్వాల్‌ తెలిపారు. 25 రాష్ర్టాలు, కేంద్రపాలిత ప్రాంతాల్లోని 85 జిల్లాల్లోనూ గత 14 రోజులుగా కొత్త వైరస్‌ కేసులు నమోదు కాలేదన్నారు. ఆర్టీ పీసీఆర్‌ పరీక్షల కోసం ఐసీఎంఆర్‌ వద్ద తగినన్ని కిట్లు ఉన్నాయని చెప్పారు. ఏ ప్రాంతం లేదా జన సమూహంపై వైరస్‌ వ్యాప్తి నిందలు వేయడం తగదని లవ్‌ అగర్వాల్‌ తెలిపారు. అలాగే వైరస్‌ నియంత్రణకు కృషి చేస్తున్న వైద్యులు, శానిటైజర్‌ సిబ్బందిపై దాడులకు పాల్పడకూడదన్నారు. ఏప్రిల్‌ 25 వరకు ప్రభుత్వం, స్వచ్ఛంద సంస్థలు కలిసి ప్రతిరోజు 1.5 కోట్ల మందికి వండిన ఆహారాన్ని అందిస్తున్నాయని సాధికారిత బృందం-5 చైర్‌పర్సన్‌ పరమ్‌ అయ్యర్‌ పేర్కొన్నారు.

‘ఆయుష్‌ క్వాత్‌'తో రోగ నిరోధక శక్తి మెండు

హైదరాబాద్‌, నమస్తే తెలంగాణ: మనుషుల్లోని రోగ నిరోధక శక్తి ఒక్కటే కరోనా వైరస్‌ నుంచి కాపాడుతుందని, ఆయుర్వేద ఉత్పత్తులపై ప్రజలకు అవగాహన కల్పించి అమ్మకాలను ప్రోత్సహించాలని కోరుతూ రాష్ర్టాలు, కేంద్రపాలిత ప్రాంతాలకు కేంద్ర ఆయుష్‌ మంత్రిత్వశాఖ లేఖ రాసింది. తులసి ఆకులు, దాల్చినచెక్క, ఎండు అల్లం పొడి, నల్ల మిరియాల మిశ్రమంతో రోగ నిరోధక శక్తి గణనీయంగా పెరుగుతుందని తెలిపింది. ఈ మిశ్రమాన్ని ‘ఆయుష్‌ క్వాత్‌, ఆయుష్‌ కుదినీర్‌, ఆయుష్‌ జోషంద’ వంటి పేర్లతో విక్రయించాలని ఉత్పత్తిదారులకు రాసిన లేఖలో సూచించింది. కాగా, ఇప్పటికే ఆయుర్వేద ఉత్పత్తుల్ని ప్రారంభించామని, పొడులు, మాత్రల రూపంలో తయారు చేస్తున్నట్లు ఏమిల్‌ ఫార్మా ఎండీ కేకే శర్మ తెలిపారు.


logo