శుక్రవారం 25 సెప్టెంబర్ 2020
National - Aug 24, 2020 , 03:23:23

అనుమతి అక్కర్లేదు

అనుమతి అక్కర్లేదు

  • అంతర్రాష్ట్ర రవాణాపై కేంద్రం వెల్లడి
  • సినిమా, టీవీ షూటింగ్‌లకు అవకాశం
  • నియమాలు పాటించాలి.. సందర్శకులు వద్దు
  • మార్గదర్శకాలు జారీచేసిన కేంద్ర ప్రభుత్వం

హైదరాబాద్‌,నమస్తే తెలంగాణ: అంతర్రాష్ట్ర ప్రయాణాలకు ఎలాంటి అనుమతులు అక్కర్లేదని కేంద్ర ప్రభుత్వం ప్రకటించింది. అంతర్రాష్ట్ర సరుకు రవాణా, ప్రయాణాలపై కొన్ని రాష్ర్టాలు ఆంక్షలు విధిస్తున్న నేపథ్యంలో కేంద్రం ఈ అంశంపై మరోసారి స్పష్టతనిచ్చింది. ఈ మేరకు శనివారం కేంద్ర హోం మంత్రిత్వశాఖ కార్యదర్శి అజయ్‌ భల్లా అన్ని  రాష్ర్టాలు, కేంద్ర పాలిత ప్రాంతాల ప్రభుత్వ ప్రధాన కార్యదర్శులకు సర్క్యులర్‌ జారీచేశారు. తెలంగాణ రాష్ట్ర ప్రభుత్వ ప్రధాన కార్యదర్శి సోమేశ్‌కుమార్‌కు కూడా అది అందింది. ఇప్పటికీ కొన్ని రాష్ర్టాలు ఇతర రాష్ర్టాల వ్యక్తుల ప్రయాణాలు, సరుకుల రవాణాపై అంక్షలు విధించి ఇబ్బంది పెడుతున్నట్లు తమ దృష్టికి వచ్చిందని కేంద్రం ఈ సర్యులర్‌లో పేర్కొన్నది. వెంటనే ఆంక్షలను ఎత్తివేయాలని ఆదేశించింది.  మరోవైపు సినిమాలు, టీవీ సీరియళ్ల చిత్రీకరణకు (షూటింగ్‌) కేంద్ర ప్రభుత్వం అనుమతినిచ్చింది. కరోనా నేపథ్యంలో షూటింగ్‌ సమయంలో పాటించాల్సిన నిర్దిష్ట విధివిధానాలను ప్రకటించింది. అన్‌లాక్‌ 3.0 గడువు ఈ నెల 31తో ముగియనుండటంతో కేంద్ర ప్రసారంశాఖ ఈ మార్గదర్శకాలు విడుదలచేసింది. షూటింగ్‌ సమయంలో ప్రతిఒక్కరూ కొవిడ్‌-19 నిబంధనలు పాటించాలని, కెమెరా ముందు యాక్టింగ్‌ చేస్తున్నవారు తప్ప మిగతా సిబ్బంది అంతా తప్పనిసరిగా మాస్కులు ధరించాలని, భౌతిక దూరం పాటించాలని స్పష్టంచేసింది. సందర్శకులను ఎట్టి పరిస్థితుల్లోనూ సెట్స్‌లోకి అనుమతించరాదని పేర్కొంది. షూటింగ్‌లో పాల్గొనేవారు ఆరోగ్యసేతు యాప్‌ వాడాలని, హెయిర్‌ స్టైలిస్టులు, మేకప్‌ సిబ్బంది పీపీఈ కిట్లు ధరించాలని సూచించింది. సాధ్యమైనంత తక్కువ మంది షూటింగ్‌లో పాల్గొనేలా జాగ్రత్తలు తీసుకోవాలని, ఉమ్మడి వస్తువులను వాడే విషయంలో జాగ్రత్తగా వ్యవహరించాలని కోరింది. హోటళ్లు, తదితర ప్రదేశాల్లో శానిటైజ్‌ చేసిన తర్వాత షూటింగ్‌ నిర్వహించాలని స్పష్టం చేసింది.

కేంద్రం జారీ చేసిన ఇతర మార్గదర్శకాలు

  •  హై రిస్క్‌ కలిగిన వారు (వృద్ధులు, పిల్లలు. వ్యాధులు ఉన్నవారు) అదనంగా జాగ్రత్తలు తీసుకోవాలి. స్టూడియోల్లో వేర్వేరు యూనిట్లకు వేర్వేరు సమయాలు కేటాయించాలి.
  •  ప్రవేశం, నిష్క్రమణ మార్గాలు వేర్వేరుగా ఉండాలి. ప్రవేశ ద్వారాల వద్ద థర్మల్‌ స్కానర్లను ఏర్పాటు చేయాలి.
  • సెట్లు, మేకప్‌ గదులు, టాయిలెట్లను తరచుగా శానిటైజ్‌ చేయాలి. 
  • షూటింగ్‌ వస్ర్తాలు, విగ్గులు, మేకప్‌ సామాన్లను ఇతరులతో పంచుకోవద్దు. 
  • కెమెరాలు, పరికరాలను ఒకరికంటే ఎక్కువ ఉపయోగిస్తే కచ్చితంగా సిబ్బంది గ్లౌజులు ధరించాలి.


logo