సోమవారం 25 మే 2020
National - Apr 01, 2020 , 09:58:51

బీఎస్-4 వాహనాల విక్రయానికి గడువు పెంపు

బీఎస్-4 వాహనాల విక్రయానికి గడువు పెంపు

హైదరాబాద్ : కరోనా వ్యాప్తి నిరోధానికి ఏప్రిల్ 14 తేదీ వరకూ లాక్‌డౌన్‌ పాటిస్తున్ననేపథ్యంలో రిజిస్ట్రేషన్ల ప్రక్రియకు బ్రేక్‌ పడింది. వాహనదారులకు సుప్రీం కోర్టు గుడ్ న్యూస్‌ అందించింది. బీఎస్-4 వాహనాల విక్రయానికి ఏప్రిల్ 24వ తేదీ వరకు గడువు పొడగిస్తూ నిర్ణయం తీసుకున్నది. గతంలో బీఎస్-4 వాహనాలను మార్చి 31 వరకే విక్రయించాలని సుప్రీం కోర్టు ఆదేశించింది. అయితే కరోనా వైరస్ వ్యాప్తి నియంత్రణలో భాగంగా దేశవ్యాప్తంగా లాక్‌డౌన్‌ను విధించింది. 

ఈ నేపథ్యంలో ఆటో మొబైల్ డీలర్స్ అసోసియేషన్ లు, ఉత్పత్తిదారుల సంఘం ఈ విషయమై సుప్రీంకోర్టు ఆశ్రయించాయి. దీంతో సానుకూలంగా స్పందించిన సుప్రీం కోర్టు.. లాక్‌డౌన్ ఏప్రిల్ 14వ తేదీతో ముగియనుందని, అనంతరం పదిరోజుల వరకు(అంటే ఏప్రిల్ 24 వరకు) వాహనాలను విక్రయించుకోవచ్చని సుప్రీం కోర్టు స్పష్టం చేసింది. షోరూముల్లో బీఎస్-4 వాహనాల్లో 12వేల వాణిజ్య వాహనాలు, 15వేల ప్యాసింజర్ కార్లు, మరో 7 లక్షల ద్విచక్ర వాహనాలు పేరుకుపోయాయని,వినియోగదారులెవరూ షోరూమ్‌లకు రావడంలేదని పిటిషన్ దారులు కోర్టుకు వివరించారు. అయితే కోర్టు దీనిపై స్పందిస్తూ దేశ పర్యావరణ పరిస్థితిని మీరూ అర్థం చేసుకోవాలని, కరోనా వైరస్‌ను అడ్డం పెట్టుకోవాలని చూడొద్దని కోర్టు అభిప్రాయపడింది. లాక్‌డౌన్ మూలంగా రిజిష్టర్ చేసుకోలేని వారు లాక్‌డౌన్ తర్వాత రిజిస్ట్రేషన్ చేసుకోవచ్చని అత్యున్నత న్యాయ స్థానం సూచించింది.

అసలు బీఎస్‌ ప్రమాణాల వల్ల ప్రయోజనం ?

వాహనాల్లో ఇంధన వినియోగ సామర్థ్యం, కాలుష్యం విడుదలకు సంబంధించిన ప్రమాణాలే బీఎస్ (భారత్ స్టేజీ). బీఎస్–4తో పోలిస్తే బీఎస్–6 వాహనాలు పదో వంతు సల్ఫర్ ను, ఐదో వంతు మాత్రమే నైట్రోజన్ డయాక్సైడ్ ను విడుదల చేస్తాయి. దీని వల్ల వాహనాల కాలుష్యాన్ని కొంత మేర నియంత్రించవచ్చు. మన దేశంలో 2000వ సంవత్సరంలో ఈ ప్రమాణాలను అమలు చేయడం మొదలుపెట్టారు. మొదట ఆ ఏడాది బీఎస్‌–1 కేటగిరీ నిబంధనలు తెచ్చారు. 2010 నాటికి బీఎస్‌–3 నిబంధనలు అమలు చేశారు. తర్వాత చాలా జాప్యం జరిగింది. దానిపై సుప్రీంకోర్టులో కేసులు పడటంతో 2017 ఏప్రిల్ 1 నుంచి బీఎస్‌–4 వాహనాలను తప్పనిసరి చేయాలని ఆదేశించింది. అంతేగాకుండా అంతర్జాతీయ ప్రమాణాలను అందుకునేందుకు బీఎస్–5ను తప్పించి..2020 ఏప్రిల్ 1వ తేదీ నుంచి నేరుగా బీఎస్–6 నిబంధనలు అమలు చేయాలని స్పష్టం చేసింది.

ధరలు తగ్గిస్తున్నారు.

బీఎస్‌-4 (భారత్ స్టేజీ 4) కేటగిరీ వాహనాలు విక్రయించవద్దని..బీఎస్‌-6 వాహనాలు మాత్రమే అమ్మాలని గతంలో సుప్రీంకోర్టు ఆదేశించింది. దీంతో ఇప్పటికే ఉన్న బీఎస్‌-4 వాహనాల స్టాక్ ను అమ్మేసుకునేందుకు డీలర్లు ధరలు తగ్గిస్తున్నారు.2017లో దేశవ్యాప్తంగా బీఎస్–3 వాహనాల అమ్మకాలు, రిజిస్ట్రేషన్లకు పెట్టిన గడువు ముగిసినప్పుడు కూడా ఇలాంటి పరిస్థితే తలెత్తింది. సుప్రీంకోర్టు గడువు పెంచుతుందేమోనన్న ఆశతో చాలా మంది డీలర్లు స్టాక్ ఉంచుకున్నారు. అయితే కోర్టు గడువు ఇవ్వకపోవడంతో ఉన్న వాహనాలను అమ్ముకునేందుకు భారీగా డిస్కౌంట్లు ప్రకటించారు. ద్విచక్ర వాహనాలను అయితే ఏకంగా రూ.20 వేల నుంచి రూ.25 వేల వరకు తగ్గించి ఇచ్చారు. దాంతో జనం షోరూమ్ ల ముందు బారులు తీరారు. కొన్ని చోట్ల పోలీసులను కూడా రంగంలోకి దింపాల్సి వచ్చింది. ఇప్పుడు  వాహనాలపై డిస్కౌంట్లు మాత్రం మొదలయ్యాయి. 

హోండా కంపెనీ తన ప్రీమియం మోడళ్లపై రూ.3 లక్షల వరకు, సాధారణ మోడళ్లపై రూ.లక్ష వరకు డిస్కౌంట్లు ప్రకటించింది. స్కోడా కంపెనీ మోడళ్లను బట్టి రూ. రెండున్నర లక్షల దాకా రాయితీలు ఇస్తున్నది .మారుతీ సుజుకీ రూ.75 వేల వరకు తగ్గింపును ఆఫర్ చేస్తుండగా. టాటా మోటార్స్ కూడా రూ.85 వేల దాకా తగ్గింపు ఇస్తున్నది. ద్విచక్ర వాహనాల కంపెనీలు అధికారికంగా ధరల తగ్గింపును ప్రకటించకున్నా షోరూమ్ లలో డిస్కౌంట్లు ఇస్తున్నాయి. కార్లు, ఇతర ఫోర్ వీలర్లపై రూ.లక్ష వరకు, ద్విచక్ర వాహనాలపై రూ.10 వేల వరకు తగ్గింపు అందిస్తుండగా ,వాహనాలు అమ్ముడుపోకుంటే డిస్కౌంట్లను మరింత పెంచే యోచనలో తయారీ సంస్థలు ఉన్నాయి. దేశవ్యాప్తంగా బీఎస్–4 వాహనాలను ధర తగ్గించి అమ్ముతున్నారు. కార్ల వంటి ఫోర్ వీలర్స్ మాత్రమేకాకుండా ద్విచక్ర వాహనాలు కూడా తక్కువ ధరకు ఇస్తున్నారు.



logo