శుక్రవారం 27 నవంబర్ 2020
National - Nov 09, 2020 , 08:30:34

అడ్డొస్తే కాళ్లు, చేతులు నరికేస్తాం.. విన‌క‌పోతే చంపేస్తాం!

అడ్డొస్తే కాళ్లు, చేతులు నరికేస్తాం.. విన‌క‌పోతే చంపేస్తాం!

కోల్‌క‌తా: ప‌శ్చిమ బెంగాల్ బీజేపీ అధ్య‌క్షుడు దిలీప్ ఘోష్ వివాదాస్ప‌ద వ్యాఖ్య‌‌లు చేశారు. త‌మ పార్టీ కార్యక‌లాపాల‌కు అడ్డంకులు సృష్టిస్తే కాళ్లు, చేతులు న‌‌రికేస్తామ‌ని, అయినా విన‌క‌పోతే చంపుతామ‌ని అధికార తృణ‌మూల్ కాంగ్రెస్ పార్టీ మ‌ద్ద‌తుదారుల‌ను హెచ్చ‌రించారు. ప‌శ్చిమ బెంగాల్ అసెంబ్లీకి వ‌చ్చే ఏడాది ఎన్నిక‌లు జ‌రిగాయి. ఎన్నిక‌ల స‌న్నాహ‌కాల్లో భాగంగా రాష్ట్రంలో బీజేపీ ర్యాలీలు నిర్వ‌హిస్తున్న‌ది. ఇందులో భాగంగా ఆ పార్టీ రాష్ట్ర అధ్యక్షుడు దీలీప్ ఘోష్ మాట్లాడుతూ.. పార్టీ కార్య‌క‌లాపాల‌కు ఇబ్బందులు సృష్టిస్తున్న దీదీ మ‌ద్ద‌తుదారులు త‌మ ప‌ద్ధ‌తులు మార్చుకోవాల‌ని హెచ్చ‌రించారు. లేన‌ట్ల‌యితే ద‌వాఖాన‌ల‌‌కు వ‌రుస క‌ట్టాల్సి వ‌స్తుంద‌ని చెప్పారు. ఎక్కువ చేస్తే కాళ్లు, చేతులు విరిచేస్తామ‌న్నారు.  అప్ప‌టికీ దారికిరాక‌పోతే శ్మ‌శానానికి వెళ్తారని వివాదాస్ప‌ద వ్యాఖ్య‌లు చేశారు. ప‌శ్చిమ‌బెంగాల్ ముఖ్య‌మంత్రి మ‌మ‌తా బెన‌ర్జీ దీదీగా గుర్తింపు పొందిన విష‌యం తెలిసిందే. 

కేంద్ర హోంమంత్రి అమిత్ షా బెంగాల్ ప‌ర్య‌ట‌న త‌ర్వాత రాష్ట్ర బీజేపీ నేత‌లు మ‌రింత దూకూడు పెంచారు. అమిత్ షా ప‌ర్య‌ట‌న జ‌రిగిన రెండు రోజుల త‌ర్వాత దిలీప్ ఈ వ్యాఖ్య‌లు చేయ‌డం గ‌మ‌నార్హం. రాష్ట్రంలోని 294 సీట్ల‌లో 200 స్థానాలు గెలుపొందాల‌ని ఆయ‌న పార్టీ నేత‌ల‌కు దిశానిర్ధేశం చేశారు. ఈ క్ర‌మంలో మ‌మ‌తా బెన‌ర్జీ ప్ర‌భుత్వానికి రోజులు ద‌గ్గ‌ర‌ప‌డ్డాయ‌ని చెప్పారు. రాష్ట్రంలో ఎన్నిక‌లు శాంతియుతంగా జ‌రిగేలా కేంద్ర బ‌ల‌గాలు చూస్తాయ‌ని చెప్పారు. బీహార్‌లో జంగిల్ రాజ్‌ను త‌రిమికొట్టామ‌ని, ఇక్క‌డ కూడా ప్ర‌జాస్వామ్యాన్ని పున‌రుద్ధ‌రిస్తామ‌ని ప్ర‌క‌టించారు.