‘మన అంచనాలకు అందని ఒక వ్యక్తిని ఇప్పుడు మీకు పరిచయం చేయబోతున్నాను. తన రూటే సపరేటు. తను ఎప్పుడు ఎక్కడ ఉంటాడో ఎప్పుడు ఏ వేషంలో ఉంటాడో ఆ దేవుడికే ఎరుక..’ అంటూ చిరంజీవి వాయిస్ ఓవర్లో ‘సన్ ఆఫ్ ఇండియా’ చిత్ర టీజర్ విడుదలైంది. డా॥ మోహన్బాబు కథానాయకుడిగా నటిస్తున్న ఈ చిత్రాన్ని శ్రీలక్ష్మీప్రసన్న పిక్చర్స్, 24 ఫ్రేమ్స్ ఫ్యాక్టరీ పతాకంపై విష్ణు మంచు నిర్మిస్తున్నారు. డైమండ్ రత్నబాబు దర్శకుడు. ఈ చిత్ర టీజర్ను శుక్రవారం హీరో సూర్య విడుదల చేశారు. ఇందులో మోహన్బాబు పాత్ర చిత్రణ శక్తివంతంగా కనిపిస్తోంది. ‘నేను చీకట్లో ఉండే వెలుతుర్ని, వెలుతురులో ఉండే చీకటిని’…‘నేను కసక్ అంటే మీరందరూ ఫసక్’ అంటూ మోహన్బాబు చెప్పిన సంభాషణలు ఆకట్టుకునేలా ఉన్నాయి. దేశభక్తి ప్రధానంగా సందేశాత్మకంగా ఈ చిత్రాన్ని తెరకెక్కిస్తున్నారు. త్వరలో ఈ సినిమాకు సంబంధించిన మరిన్ని వివరాల్ని వెల్లడించనున్నారు.