శుక్రవారం 03 ఏప్రిల్ 2020
National - Mar 21, 2020 , 09:54:25

కనికా కరోనా.. బ్యాంకు ఉద్యోగుల్లో ఆందోళన

కనికా కరోనా.. బ్యాంకు ఉద్యోగుల్లో ఆందోళన

లక్నో : బాలీవుడ్‌ సింగర్‌ కనికా కపూర్‌ వహించిన నిర్లక్ష్యం దేశాన్ని భయపెట్టిస్తోంది. ఇప్పటికే కనికా కపూర్‌తో దగ్గరగా తిరిగిన వారంతా స్వీయ నిర్బంధంలోకి వెళ్లిపోయారు. అయితే రెండు రోజుల క్రితం లక్నోలోని బ్యాంక్‌ ఆఫ్‌ బరోడా(లాతూష్‌ రెడ్‌ బ్రాంచ్‌) మేనేజర్‌ మనోజ్‌ కుమార్‌.. కనికాను ఆమె నివాసంలో కలిశారు. సుమారు అరగంట పాటు ఆమెతో మాట్లాడారు మనోజ్‌ కుమార్‌. తనకు కరోనా సోకిందని కనికా ప్రకటించడంతో బ్యాంకు ఉద్యోగులు తీవ్ర భయాందోళనకు గురువుతున్నారు. మనోజ్‌తో పాటు బ్యాంకు ఉద్యోగులకు కరోనా సోకి ఉండొచ్చనే అనుమానం వారిలో మొదలైంది. స్వీయ నిర్బంధంలోకి వెళ్లాలని మనోజ్‌ను మిగతా ఉద్యోగులు కోరినప్పటికీ ఆయన తిరస్కరించారు. 

విదేశాల నుంచి వచ్చి దావత్‌లకు.. 

‘బేబీ డాల్‌' సింగర్‌గా పేరున్న కనికాకపూర్‌ (41) ఈ నెల 10న లండన్‌ నుంచి ముంబైకి విమానంలో వచ్చారు. మరుసటి రోజు విమానంలో ఉత్తరప్రదేశ్‌ రాజధాని లక్నోకు చేరుకున్నారు. అక్కడే ఓ ఫైవ్‌స్టార్‌ హోటల్‌లో జరిగిన దావత్‌కు హాజరయ్యారు. ఇదే పార్టీలో రాజస్థాన్‌ మాజీ సీఎం వసుంధర రాజే, ఆమె కుమారుడు, ఎంపీ దుష్యంత్‌ సింగ్‌ కూడా పాల్గొన్నారు. నాలుగు రోజుల కిందట జలుబు, జ్వరం వంటి లక్షణాలు కనిపించడంతో కనికాకపూర్‌ వైద్యపరీక్షలు చేయించుకున్నారు. నివేదికలో కరోనా పాజిటివ్‌ అని వచ్చిందని, తాను నిర్బంధంలోకి వెళ్తున్నానని ఆమె శుక్రవారం తన ఇన్‌స్టాగ్రామ్‌లో ప్రకటించారు. ప్రస్తుతం ఆమెతోపాటు కుటుంబ సభ్యులు లక్నోలోని సంజయ్‌ గాంధీ మెడికల్‌ ఇన్‌స్టిట్యూట్‌లో చేరారు.తన కూతురు ఈ నెల 13, 14, 15వ తేదీల్లో వరుసగా మూడు దావత్‌లకు  హాజరయ్యిందని,  250-300 మందిని ఆమె కలుసుకొన్నట్టు కనిక తండ్రి రాజీవ్‌ కపూర్‌ తెలిపారు.


logo