రిలయన్స్‌ ఆధ్వర్యంలో ప్రపంచంలోనే అతిపెద్ద జూ.. ఎక్కడంటే..?

న్యూఢిల్లీ:  గుజరాత్‌ రాష్ట్రానికి మరో గుర్తింపు రానుంది. ఇప్పటికే ప్రపంచంలోనే ఎత్తైన విగ్రహం యునిటీ ఆఫ్‌ స్టాచ్యూతో అంతర్జాతీయ ఖ్యాతి గడించిన ఆ రాష్ట్రంలో రిలయన్స్‌ ఇండస్ట్రీస్‌ లిమిటెడ్‌ (ఆర్‌ఐఎల్‌) ఆధ్వర్యంలో మరో నిర్మాణం ప్రారంభం కాబోతున్నది. జామ్‌నగర్‌లో ప్రపంచంలోనే అతిపెద్ద జంతుప్రదర్శనశాల (జూ)ను నిర్మించేందుకు రిలయన్స్‌ సంస్థ సన్నాహాలు చేస్తున్నది. జామ్‌నగర్‌లో రిఫైనరీని నిర్వహిస్తున్న ఆర్‌ఐఎల్ ఈ అతిపెద్ద జూను అభివృద్ధి చేస్తున్నట్లు రాష్ట్ర ప్రభుత్వ అధికారి ధ్రువీకరించారు. 

‘అసోచాం ఫౌండేషన్‌ వీక్‌ 2020’లో భాగంగా నిర్వహించిన వర్చువల్‌ కాన్ఫరెన్స్‌లో సీఎంఓ అదనపు కార్యదర్శి ఎంకే దాస్‌ గుజరాత్‌పై ప్రెజెంటేషన్‌ ఇస్తూ ఈ ప్రకటన చేశారు. జంతువుల సంఖ్య, జాతులపరంగా జామ్‌నగర్‌లో  ఒకేచోట ప్రపంచంలోనే అతిపెద్ద జూ రాబోతున్నదని దాస్‌ వెల్లడించారు. ఈ జూ ఏర్పాటుకు సెంట్రల్ జూ అథారిటీ (సీజెడ్‌ఏ) ఆమోదం తెలిపింది. సీజెడ్‌ఏ వార్షిక నివేదిక ప్రకారం.. రిలయన్స్ ఇండస్ట్రీస్ లిమిటెడ్ గుజరాత్‌లోని జామ్‌నగర్‌ వద్ద ‘గ్రీన్స్ జూలాజికల్ రెస్క్యూ అండ్ రిహాబిలిటేషన్ కింగ్‌డమ్‌’ అనే పేరుతో మెగా జూను జూను ఏర్పాటు చేయబోతున్నది. ఈ జూ 250.1 ఎకరాల విస్తీర్ణంలో ఉంటుంది. ఇది ముకేశ్‌ అంబానీ చిన్న కొడుకు అనంత్ అంబానీ కలల ప్రాజెక్టు. ఈ జూను కంపెనీ రిఫైనరీ ప్రాజెక్టుకు దగ్గరగా ఉన్న మోతీ ఖవ్‌డీ వద్ద నిర్మించనున్నారు. ఈ ప్రాజెక్ట్‌ మాస్టర్ (లేఅవుట్) ప్రణాళికతోపాటు సమర్పించిన డిటైల్డ్ ప్రాజెక్ట్ రిపోర్ట్ (డీపీఆర్)ను  ఫిబ్రవరి 12, 2019న నిర్వహించిన సెంట్రల్ జూ అథారిటీ 33 వ సమావేశంలో  ఆమోదించారు. కొవిడ్‌-19 కారణంగా ఆలస్యమైన ఈ ప్రాజెక్ట్ ఎలాంటి ఆటంకాలు లేకుంటే రాబోయే రెండేళ్లలో పూర్తవుతుందని ఆర్ఐఎల్ డైరెక్టర్ (కార్పొరేట్ వ్యవహారాలు) పరిమళ్‌ నాథ్వానీ వెల్లడించారు. 

లోకల్ టు గ్లోబల్.. వార్త ఏదైనా.. అన్నీ ఒకే యాప్లో నమస్తే తెలంగాణ ఆండ్రాయిడ్ యాప్ డౌన్లోడ్ చేసుకోండి.