కరోనాపై 4న అఖిలపక్ష భేటీ

న్యూఢిల్లీ: కరోనా పరిస్థితిపై చర్చించేందుకు డిసెంబర్‌ 4న అఖిలపక్ష సమావేశానికి కేంద్ర ప్రభుత్వం పిలుపునిచ్చింది. ప్రధాని నరేంద్ర మోదీ నేతృత్వంలో జరిగే ఆన్‌లైన్‌ భేటీలో లోక్‌సభ, రాజ్యసభలోని అన్ని రాజకీయ పార్టీల ఫ్లోర్‌ లీడర్లతో ఆయన మాట్లాడనున్నారు. శుక్రవారం ఉదయం 10.30 గంటలకు ప్రారంభమయ్యే అఖిలపక్ష సమావేశాన్ని సమన్వయం చేస్తున్న పార్లమెంటరీ వ్యవహారాల మంత్రిత్వ శాఖ ఈ మేరకు ఆయా పార్టీలకు ఆహ్వానాలు పంపినట్లు అధికారులు తెలిపారు. మరోవైపు కరోనా టీకా, దాని సామర్థ్యానికి సంబంధించిన సమాచారాన్ని ప్రజలందరికీ అర్థమయ్యే సులువైన భాషలో ఇవ్వాలని  ఫార్మా సంస్థలకు ప్రధాని మోదీ సూచించారు. వ్యాక్సిన్లు అభివృద్ధి చేస్తున్న పుణెలోని జెనోవా బయోఫార్మా, హైదరాబాద్‌లోని బయోలాజికల్‌ ఈ, డాక్టర్‌ రెడ్డీస్‌ సంస్థల ప్రతినిధి బృందాలతో సోమవారం ఆన్‌లైన్‌లో మాట్లాడారు.