శివ‌సేన‌లో చేరిన సినీ న‌టి ఊర్మిళ‌..

హైద‌రాబాద్‌: బాలీవుడ్ న‌టి ఊర్మిళ మటోండ్క‌ర్‌.. ఇవాళ శివ‌సేన పార్టీలో చేరారు. ముంబైలో ఆ పార్టీ అధ్య‌క్షుడు, మ‌హారాష్ట్ర సీఎం ఉద్ద‌వ్ థాక‌రే స‌మ‌క్షంలో ఆమె పార్టీ కండువా క‌ప్పుకున్నారు. శివ‌సేనలో చేర‌నున్న‌ట్లు గ‌త కొన్ని రోజుల నుంచి ఊర్మిళ‌పై ప్ర‌చారం సాగుతున్న‌ది. అయితే ఆ ఊహాగానాల‌కు ఆమె తెర‌దించారు. గ‌త లోక్‌స‌భ ఎన్నిక‌ల్లో కాంగ్రెస్ పార్టీ త‌ర‌పున ఊర్మిళ పోటీ చేసి ఓడిపోయారు. ముంబై నార్త్ నియోజ‌క‌వ‌ర్గం నుంచి నుంచి పోటీ చేసిన ఆమె ఆ ఎన్నిక‌ల్లో ఓడారు. పార్టీలో ఉన్న అంత‌ర్గ‌త క‌ల‌హాల వ‌ల్లే తాను ఓడిన‌ట్లు ఆమె ఆరోపించారు. దీంతో కాంగ్రెస్ పార్టీ గ‌త ఏడాదే ఆమె రాజీనామా చేశారు. బాంద్రాలోని సీఎం థాక‌రేకు చెందిన మాతోశ్రీ నివాసంలో ఇవాళ జ‌రిగిన కార్య‌క్ర‌మంలో ఊర్మిళ శివ‌సేన పార్టీలో చేరారు. గ‌వ‌ర్న‌ర్ కోటాలో ఊర్మిళ‌కు ఎమ్మెల్సీ ప‌ద‌వి ద‌క్కే అవ‌కాశాలు ఉన్నాయి.