నేడు భారత్, ఇంగ్లండ్ ఆఖరి టీ20
రాత్రి 7 గంటల నుంచి స్టార్ స్పోర్ట్స్లో..
ఆధిక్యం చేతులు మారుతూ సాగుతున్న టీ20 సిరీస్ చివరి అంకానికి చేరింది. చెరో రెండు విజయాలతో సమఉజ్జీలుగా కనిపిస్తున్న భారత్, ఇంగ్లండ్ నేడు ఫైనల్ ఫైట్లో తలపడనున్నాయి. యంగ్ గన్స్ గర్జనతో టీమ్ఇండియా జోరుమీదుంటే.. ప్రపంచ నంబర్వన్ సత్తా ఏంటో చాటాలని మోర్గాన్ సేన యోచిస్తున్నది. మిడిలార్డర్ దంచికొడుతున్నా.. కీలక మ్యాచ్లో టాప్ రాణించకపోతే టీమ్ఇండియాకు కష్టాలు తప్పకపోవచ్చు!
అహ్మదాబాద్: నువ్వా నేనా అన్నట్లు సాగుతున్న ఐదు మ్యాచ్ల టీ20 సిరీస్ తుది దశకు చేరుకుంది. ఐసీసీ ర్యాంకింగ్స్లో తొలి రెండు స్థానాల్లో ఉన్న జట్లు శనివారం ప్రపంచంలోని అతిపెద్ద క్రికెట్ మైదానంలో అమీతుమీ తేల్చుకోనున్నాయి. టీమ్ఇండియాకు సొంతగడ్డ అనుకూలత కలిసొచ్చే చాన్స్ ఉన్నా.. ఒకే స్టేడియంలో ఇప్పటికే ఆరు మ్యాచ్లు ఆడిన ఇంగ్లండ్ కూడా పిచ్పై ఓ అంచనాకు వచ్చే ఉంటుంది. ఈ సిరీస్లోని నాలుగు టీ20ల్లో మూడింట ఛేజింగ్ చేసిన జట్లే విజయం సాధించడంతో మరోసారి టాస్ కీలకం కానుంది. ఈ ఏడాది చివర్లో భారత్ వేదికగా జరుగనున్న టీ20 ప్రపంచకప్నకు ఇది సన్నాహక సిరీస్గా ఉపయోగపడుతుందని అంటున్న ఇంగ్లండ్ జట్టు అందుకు తగ్గట్లే ఒత్తిడిని జయించడంపై దృష్టి పెట్టింది. ఇక గత మ్యాచ్లో చక్కటి విజయంతో మంచి జోరుమీదున్న కోహ్లీసేన అదే ఊపులో సిరీస్ పట్టేయాలని తహతహలాడుతున్నది. కొత్త ఆటగాళ్లు అదరగొడుతుండటంతో భారత్ బెంచ్ బలం పెరిగినా.. టాప్లో పవర్ఫుల్ ఇన్నింగ్స్ల కొరత కనిపిస్తున్నది. ఇక మరోవైపు 10వ నంబర్ ఆటగాడి వరకు హిట్టర్లతో దట్టంగా ఉన్న ఇంగ్లిష్ జట్టు గత మ్యాచ్లో ఓ మోస్తరు స్కోరు ఛేదించలేక చతికిలబడటం ఇంగ్లండ్ మేనేజ్మెంట్ను కలవరపెడుతున్నది. మొత్తానికి లోపాలను సరిదిద్దుకొని ఫుల్స్వింగ్తో సత్తాచాటాలని ఇరుజట్లు ఉవ్విళ్లూరుతున్నాయి. మరి మొతెరాలో మోత మోగించేదెవరో చూడాలి!
టీమ్ఇండియా గత ఏడు టీ20 సిరీస్ల్లో ఓటమి ఎరుగకుండా ముందుకు సాగుతున్నది. 2019 తర్వాత భారత్ ఆరు సిరీస్లు నెగ్గి ఒకదాన్ని ‘డ్రా’ చేసుకుంది.
గత ఎనిమిది టీ20 సిరీస్ల్లో ఇంగ్లండ్కు పరాజయం ఎదురు కాలేదు. 2018 నుంచి ఏడు సిరీస్లు చేజిక్కించుకున్న మోర్గాన్ సేన ఒకదాన్ని ‘డ్రా’గా ముగించింది.
ఇరు జట్ల మధ్య ఇప్పటి వరకు జరిగిన 18 మ్యాచ్ల్లో చెరో తొమ్మిది గెలిచాయి.
తుది జట్లు (అంచనా)
భారత్: కోహ్లీ (కెప్టెన్), రోహిత్, ఇషాన్, పంత్, సూర్యకుమార్, శ్రేయస్, హార్దిక్ పాండ్యా, సుందర్/నటరాజన్, శార్దూల్ ఠాకూర్, భువనేశ్వర్, రాహుల్ చాహర్.
ఇంగ్లండ్: మోర్గాన్ (కెప్టెన్), రాయ్, బట్లర్, మలన్, బెయిర్స్టో, స్టోక్స్, సామ్ కరన్, జోర్డాన్, ఆర్చర్, రషీద్, వుడ్.