నితిన్, కీర్తి సురేష్ జంటగా వెంకీ అట్లూరి డైరెక్టన్లో వచ్చిన రొమాంటిక్ ఎంటర్టైనర్ రంగ్ దే. ఈ సినిమాకు తొలి రోజు యావరేజ్ టాక్ వచ్చినా కూడా కలెక్షన్స్ మాత్రం బాగానే వచ్చాయి. ముఖ్యంగా తొలి మూడు రోజుల్లో రూ.12 కోట్ల షేర్ వసూలు చేసింది నితిన్ సినిమా. నాలుగో రోజు హోలీ సెలవు రావడంతో కోటిన్నరకు పైగా షేర్ వసూలు చేసింది. అయితే ఐదో రోజు మాత్రం ఈ సినిమాకు బ్రేకులు పడ్డాయి. చాలాచోట్ల రంగ్ దే వసూళ్లు గణనీయంగా పడిపోయాయి. ఐదో రోజు కేవలం రూ.73 లక్షల షేర్ మాత్రమే వసూలు చేసింది ఈ సినిమా. ఇప్పటి వరకు తెలుగు రాష్ట్రాల్లో రూ.12.67 కోట్ల షేర్ వసూలు చేసింది రంగ్ దే.
ప్రపంచ వ్యాప్తంగా రూ.15 కోట్లకు చేరువలో షేర్ వచ్చింది. అయితే ఈ సినిమా బ్రేక్ ఈవెన్ సాధించాలంటే మరో రూ.9 కోట్లు వసూలు చేయాలి. అలా చేస్తే కానీ నితిన్ హిట్ కొట్టలేడు. అయితే ప్రస్తుతం ఉన్న పరిస్థితులు చూస్తుంటే ఈ సినిమాకు అన్ని కోట్లు రావడం దాదాపు అసాధ్యంగా కనిపిస్తోంది. ఇప్పటికే చాలా చోట్ల రంగ్ దే కలెక్షన్స్ పడిపోయాయి. తొలి 4 రోజులు మంచి వసూళ్లు సాధించిన ఈ సినిమా ఐదో రోజు నుంచి తగ్గుముఖం పట్టింది. వీకెండ్ అద్భుతంగా వర్కవుట్ చేస్తే తప్ప నితిన్ సినిమా సేఫ్ జోన్లోకి వెళ్లడం కష్టం. తెలుగు రాష్ట్రాల్లో రూ.22 కోట్ల బిజినెస్ చేసింది ఈ సినిమా. అలాగే ఓవర్సీస్ రెస్టాఫ్ ఇండియా కలిసి మరో రెండున్నర కోట్ల బిజినెస్ చేసింది.
రూ.24 కోట్ల లక్ష్యంతో బరిలోకి దిగిన రంగ్ దే.. ఈ 5 రోజుల్లో రూ.14.5 కోట్ల షేర్ వసూలు చేసింది. ఎలా చూసుకున్నా మరో రూ.9 కోట్లకు పైగానే బాకీ ఉన్నాడు నితిన్. పైగా ఈ వారం నాగార్జున వైల్డ్ డాగ్, కార్తి సుల్తాన్ సినిమాలు విడుదలవుతున్నాయి. ఈ రెండింటిలో ఏ ఒక్క సినిమాకు పాజిటివ్ టాక్ వచ్చినా నితిన్కు మరిన్ని తిప్పలు తప్పవు. మొత్తానికి ఈ దిగ్బంధనం నుంచి నితిన్ ఎలా బయట పడతాడో చూడాలి.
లోకల్ టు గ్లోబల్ వార్తల కోసం.. నమస్తే తెలంగాణ ఫేస్బుక్, ట్విటర్ పేజీలను ఫాలో అవ్వండి