రైతు ఆందోళనపై 22 ఎఫ్‌ఐఆర్‌లు : రైతు నాయకులపై కేసులు

న్యూఢిల్లీ : కేంద్రం తీసుకొచ్చిన నూతన వ్యవసాయ చట్టాలను నిరసిస్తూ జనవరి 26 న రైతుల ట్రాక్టర్ ర్యాలీ తీవ్ర ఉద్రిక్తంగా మారింది. రైతు పరేడ్‌లో జరిగిన అవాంతరాలపై ఢిల్లీ పోలీసులు ఇవాళ ఉదయం నుంచి సమీక్ష జరుపుతున్నారు. మంగళవారం జరిగిన హింసలో 300 మంది సైనికులు గాయపడినట్లు పోలీసులు తెలిపారు. ఇప్పుడు ఆందోళనకారులపై చర్యలు తీసుకోవడం ప్రారంభమైంది. ఇప్పటివరకు 200 మందిని అదుపులోకి తీసుకున్నారు. హింస, విధ్వంసం ఘటనలపై 22 ఎఫ్ఐఆర్లు నమోదయ్యాయి. హత్యాయత్నం, దోపిడీ వంటి విభాగాల్లోని సెక్షన్ల కింద కేసులు నమోదు చేస్తున్నారు. మొత్తం కేసు దర్యాప్తును క్రైం బ్రాంచ్‌కు అప్పగించారు. దుండగులను గుర్తించడానికి సీసీటీవీ ఫుటేజీని స్కాన్ చేయడంలో క్రైం బ్రాంచ్‌ పోలీసులు నిమగ్నమై ఉన్నారు.

ఢిల్లీ పోలీసులు నమోదు చేసిన ఎఫ్ఐఆర్‌లలో ఒకదానిలో ఆరుగురు రైతు నాయకుల పేర్ల నమోదు చేశారు. రాకేశ్ తికాయట్, దర్శన్ పాల్, రాజిందర్ సింగ్, బల్బీర్ సింగ్ రాజేవాల్, బుటాసింగ్ బుర్జ్‌గిల్, జోగిందర్ సింగ్ ల పేర్లు ఒక ఎఫ్‌ఐఆర్‌లో పోలీసులు రాశారు. ట్రాక్టర్ ర్యాలీ పరిస్థితులను ఉల్లంఘించినందుకు వారిపై కేసు నమోదైంది. అంతకుముందు కేంద్ర హోం మంత్రి అమిత్‌షా నివాసంలో ఉన్నతస్థాయి సమావేశం జరిగింది. ఈ సమావేశానికి కేంద్ర హోం శాఖ కార్యదర్శి సహా పలువురు ఉన్నతాధికారులు హాజరయ్యారు. రైతు ట్రాక్టర్‌ ర్యాలీలో జరిగిన ఘర్షణలపై ఢిల్లీ పోలీసులు కేంద్ర హోం మంత్రి అమిత్‌షాకు నివేదిక అందజేసినట్లు సమాచారం. 

ఇవి కూడా చదవండి..

తైవాన్‌కు సాయంలో ట్రంప్ బాటలో బైడెన్‌

చరిత్రలో ఈ రోజు.. కరెంటు బుగ్గకు పేటెంట్ దక్కిందీరోజే..

లోకల్ టు గ్లోబల్.. వార్త ఏదైనా.. అన్నీ ఒకే యాప్లో నమస్తే తెలంగాణ ఆండ్రాయిడ్ యాప్ డౌన్లోడ్ చేసుకోండి.