గోడ కూలి ఇద్దరు జవాన్లు మృతి, మరొకరికి గాయాలు

శ్రీనగర్‌: జమ్ముకశ్మీర్‌లో గోడ కూలి ఇద్దరు జవాన్లు మరణించారు. శుక్రవారం సాయంత్రం పొద్దుపోయిన తర్వాత కథువాలోని ముచ్చేదిలో జరిగిన ఈ ఘటనలో మరో జవాను తీవ్రంగా గాయపడ్డారు. కథువాకు 150 కిలోమీటర్ల దూరంలో ఉన్న బిల్లావర్‌ పోలీస్టేషన్‌ పరిధిలోని ముచ్చేదిలో ఆర్మీ జవాన్లు బ్యారక్‌లో పనిచేస్తున్నారు. ఆ సమయంలో అకస్మాత్తుగా వారిపై గోడ కూలిపడింది. దీంతో సుబేదార్‌ ఎన్‌ సింగ్‌, నాయక్‌ పర్వేజ్‌ కుమార్‌, సిపాయి మంగళ్‌ సింగ్‌ తీవ్రంగా గాయపడ్డారు. వారిని బిల్లావర్‌లోని దవాఖానకు తీసుకెళ్లగా, ఎస్‌ఎన్‌ సింగ్‌, పర్వేజ్‌ అప్పటికే మరణించారని డాక్టర్లు వెల్లడించారు. మెరుగైన చికిత్స కోసం మంగళ్‌ సింగ్‌ను పఠాన్‌కోట్‌కు తరలించారు. మృతిచెందిన ఎన్‌సింగ్‌ స్వస్థలం హర్యానాలోని సోనేపట్‌ కాగా, పర్వేజ్‌ది సాంబా, గాయపడిన మంగళ్‌ సింగ్‌ హర్యానాలోని పానిపట్‌కు చెందినవారు.