మధ్యప్రదేశ్‌లోకి 100 మంది మావోయిస్టుల చొరబాటు

బాలాఘాట్‌ : ఛత్తీస్‌గఢ్‌, మహారాష్ట్ర నుంచి దాదాపు 100 మంది మావోయిస్టులు మధ్యప్రదేశ్‌ రాష్ట్రంలోకి చొరబడ్డారు. ఈ విష‌యాన్ని అక్కడి పోలీసు ఉన్నతాధికారులు వెల్లడించారు. తమ బేస్‌ క్యాంప్‌ను విస్తరించే క్రమంలో గడిచిన కొన్ని నెలలుగా ఈ చొరబాట్లు చోటుచేసుకున్నట్లు తెలిపారు. విశ్వసనీయ సమాచారంతో బాలాఘాట్‌, గిరిజన జనాభా అధికంగా ఉన్న ప్రాంతాల్లో ఆరు కంపెనీల పారామిలటరీ బలగాలను మోహరించినట్లు చెప్పారు. మావోయిస్టు గ్రూప్‌న‌కు చెందిన ఆరు దళాలు బాలాఘాట్‌, మాండ్ల జిల్లాల్లో కార్యకలాపాలను విస్తరిస్తున్నాయన్నారు. మాండ్లలో కతియా మోంచా దళం గతేడాదే వచ్చినట్లుగా తెలిపారు.

మాండ్ల-బాలాఘాట్‌ సుదీర్ఘ సరిహద్దును కలిగిఉన్నాయి. మధ్యప్రదేశ్‌ హోంమంత్రి నరోత్తం మిశ్రా గడిచిన నెలలో బాలాఘాట్‌ సందర్శన సందర్భంగా మీడియాతో మాట్లాడుతూ.. మావోయిస్టుల ఆచూకీకి ఆరు కంపెనీల పారామిలటరీ బలగాలను మోహరిస్తున్నట్లు తెలిపారు. బలాఘాట్‌లో నవంబర్‌, డిసెంబర్‌ 2020లో జరిగిన ఎన్‌కౌంటర్‌లో ఛత్తీస్‌గఢ్‌ నుంచి వచ్చిన ఇద్దరు మహిళా మావోయిస్టులు, మహారాష్ట్ర నుంచి వచ్చిన మరో మహిళా మావోయిస్టు హతమైనట్లు పోలీసులు వెల్లడించారు.