అమెరికాలోని కొలరాడోలో ఓ దుండగుడి ఘాతుకం
పోలీసుసహా పదిమంది మృతి.. నిందితుడి అరెస్టు
బౌల్డర్ (కొలరాడో), మార్చి 23: అమెరికా మళ్లీ నెత్తురోడింది. కొలరాడో రాష్ట్రంలోని బౌల్డర్ పట్టణంలో ఉన్న ‘కింగ్ సూపర్స్’ సూపర్ మార్కెట్లో ఓ దుండగుడు విచక్షణారహితంగా జరిపిన కాల్పుల్లో 10 మంది మరణించారు. మృతుల్లో ఓ పోలీసు అధికారి కూడా ఉన్నారు. సోమవారం మధ్యాహ్నం సూపర్మార్కెట్లో రద్దీ ఉన్న సమయంలో ఈ కాల్పులు చోటుచేసుకొన్నాయి. నిందితుడిని అదుపులోకి తీసుకొన్నట్టు బౌల్డర్ పోలీస్ కమిషనర్ మారిష్హెరాల్డ్ తెలిపారు. అతడి వివరాలు మాత్రం వెల్లడించలేదు. అమెరికాలో ఈ ఏడాది ఇలాంటి రక్తపాతం జరుగటం ఇది ఏడోసారి.
యుద్ధవాతావరణం
కిక్కిరిసి ఉన్న సూపర్ మార్కెట్లో ఒక్కసారిగా కాల్పులు మొదలుకావటంతో అక్కడివారంతా భీతిల్లిపోయారు. ప్రాణాలు కాపాడుకొనేందుకు పరుగులు తీశారు. కొంతమంది మాల్లోనే మూలల్లో నక్కి కూర్చోగా, మరికొందరు అత్యవసర మార్గం నుంచి బయటపడి సమీప భవనాల్లో తలదాచుకొన్నారు. కాల్పులు ప్రారంభం కాగానే తొలుత స్పందించి మాల్లోకి ప్రవేశించిన పోలీసు అధికారి ఎరిక్ టాలీ (51) దుండగుడి కాల్పుల్లో మరణించాడని మారిష్ హెరాల్డ్ కన్నీళ్ల పర్యంతమయ్యారు.