సోమవారం 30 మార్చి 2020
Nalgonda - Jan 20, 2020 , 02:06:47

యాదాద్రిలో భక్తుల సందడి

యాదాద్రిలో భక్తుల సందడి


యాదగిరిగుట్ట, నమస్తే తెలంగాణ: యాదాద్రి శ్రీ లక్ష్మీసమేతుడైన నరసింహస్వామి దర్శనానికి బారులు తీరిన భక్తులతో సముదాయాలు. మొక్కు పూజల నిర్వహణతో మండపాలు కిక్కిరిసిపోయాయి. సెలవుకావడంతో ఇలవేల్పు దర్శనం కోసం వచ్చిన భక్తులతో యాదాద్రి మరోమారు పోటెత్తింది. ఎటు చూసినా.. క్షేత్ర సందర్శనకు వచ్చిన భక్తులే కనిపించారు. కుటుంబసభ్యులతో వచ్చిన భక్తులు నారసింహుడిని దర్శించాలని గంటలకొద్దీ క్యూ కట్టారు. ఆర్జిత పూజల కోలాహలం తెల్లవారుజాము మూడుగంటల నుంచి మొదలైంది. నిజాభిషేకంతో ఆరాధనలు ప్రారంభించారు. ఉత్సవమూర్తులకు అభిషేకం జరిపారు. ఉదయం మూడుగంటలకు సుప్రభాతం నిర్వహించిన అర్చకులు శ్రీలక్ష్మీనరసింహుడిని ఆరాధిస్తూ ప్రత్యేకపూజలు చేశారు. హారతి నివేధనలు అర్పించారు. శ్రీసుదర్శన హోమం ద్వారా శ్రీవారిని కొలిచారు. సుదర్శన ఆళ్వారును కొలుస్తూ హోమం జరిపారు. ప్రతీరోజు నిర్వహించే నిత్యకల్యాణోత్సవంలో భక్తులు అధిక సంఖ్యలో పాల్గొన్నారు. దేవేరులను ముస్తాబు చేసి గజవాహనంపై ముఖ మండపంలోనే ఊరేగించారు. శ్రీలక్ష్మీసమేతుడైన నారసింహుడిని ఆరాధిస్తూ సుమారు గంటన్నరకుపైగా కళ్యాణ తంతును జరిపారు. కల్యాణమూర్తులను ముస్తాబు చేసి బాలాలయ ముఖ మండపంలో భక్తులకు అభిముఖంగా అధిష్టించి కల్యాణతంతు నిర్వహించారు. ఉదయం నుంచి రాత్రివరకు నిరాటంకంగా దర్శనాలు కొనసాగాయి. సాయంత్రం వేళ అలంకార జోడు సేవలు నిర్వహించారు. మండపంలో అష్టోత్తర పూజలు జరిపారు. రూ.100 టిక్కెట్‌పై బాలాలయం ముఖ మండపంలో 10నిమిషాల పాటు పూజలో పాల్గొనే ఈ పూజలకు అధరణ పెరుగుతున్నది. శ్రీపర్వతవర్ధినీ సమేత రామలింగేశ్వరునికి రుద్రాభిషేకం జరిపారు. నవగ్రహాలకు తైలాభిషేకం జరిపారు. అమ్మవారికి కుంకుమార్చనలు నిర్వహించారు.

వైభవంగా వత్ర పూజలు..

యాదాద్రి ఆలయంలో అత్యంత ప్రతిష్టాత్మకంగా జరుపుకునే శ్రీసత్యనారాయణ స్వామివారి వత్ర పూజల్లో భక్తులు పాల్గొన్నారు.  సామూహిక వ్రతాలు పెద్ద ఎత్తున జరిగాయి. వ్రత పూజల ద్వారా రూ. 84,000 ఆదాయం సమకూరింది. శ్రీసత్యనారాయణుడిని ఆరాధిస్తూ భక్తి శ్రద్దలతో పూజలు నిర్వహించారు.

బంగారు పుష్పాల బహూకరణ..

యాదాద్రి శ్రీలక్ష్మీనరసింహస్వామికి హైదరాబాద్‌కు చెందిన భక్తుడు బంగారు పుష్పాలను బహూకరించారు. కాప్రాకు చెందిన నాగమల్లారెడ్డి, ఇంద్ర దంపతులు 27 తులాల బంగారు పుష్పాలను ఆదివారం ఆలయాధికారులకు అందజేశారు.

రూ. 16,88,522 ఆదాయం

శ్రీవారి ఖజానాకు రూ. 16,88,522 ఆదాయం సమకూరినట్లు ఆలయ అధికారులు తెలిపారు.


logo