తిరువనంతపురం: మూర్చతో బిల్డింగ్ పైనుంచి కిందకు పడబోయిన సహచరుడ్ని ఒక వ్యక్తి కాపాడాడు. కేరళలో జరిగిన ఈ ఘటనకు సంబంధించిన వీడియో సామాజిక మాధ్యమాల్లో వైరల్ అయ్యింది. బిను అలియాస్ బాబు, బాబురాజ్ అనే ఇద్దరు వడకరలోని కేరళ బ్యాంకు శాఖలో పని చేస్తున్నారు. ప్రావిడెంట్ ఫండ్ చెల్లింపు కోసం భవనం తొలి అంతస్తులో ఉన్న ఆ బ్యాంకు శాఖ బయట వారు ఎదురు చూస్తున్నారు. ఇంతలో పిట్టగోడ అంచుకు ఆనుకుని ఉన్న బాబుకు మూర్చ రావడంతో ఒక్కసారిగా కిందకు పడిపోసాగాడు.
గమనించిన బాబురాజ్ వెంటనే స్పందించి అతడి కాళ్లు పట్టుకున్నాడు. ఇంతలో అక్కడున్న వారు వచ్చి సహాయం చేసి బాబును పైకి లాగారు. దీంతో ఆయనకు ప్రాణాపాయం తప్పింది. ఆ భవనం మొదటి అంతస్తు కింద కరెంట్ తీగలు ఉన్నాయని, ఒకవేళ బాబు అక్కడి నుంచి పడి ఉంటే ప్రాణాలకు ముప్పు కలిగేదని అక్కడి వారు తెలిపారు. సమయస్ఫూర్తితో వ్యవహరించి బాబును కాపాడిన బాబురాజ్ను వారు ప్రశంసించారు.
మరోవైపు బ్యాంకు సీసీటీవీలో రికార్డైన ఈ వీడియో సామాజిక మాధ్యమాల్లో వైరల్ అయ్యింది. పలువురు నెటిజన్లు బాబురాజ్ను కొనియాడారు. సమయస్ఫూర్తితో తక్షణం స్పందించి బాబు కాళ్లను పట్టుకుని రక్షించేందుకు అతడు చేసిన సాహసాన్ని పలువురు ప్రశంసించారు.