మంగళవారం 26 మే 2020
Medak - Mar 09, 2020 , 03:52:32

రైతు సంక్షేమ బడ్జెట్‌

రైతు సంక్షేమ బడ్జెట్‌
  • రుణమాఫీతో జిల్లాలోని 78,000 మంది రైతులకు ప్రయోజనం
  • జిల్లా రైతులకు 675 కోట్ల రుణమాఫీ వర్తింపు
  • 25,000 లోపు రుణం ఉన్న రైతులు 11 వేల మంది
  • రైతుబంధుతో అదనంగా 20వేల మంది రైతులకు రూ.17వేల కోట్ల లబ్ధి
  • రైతుబంధుకు అదనపు కేటాయింపులతో రైతులకు ఎంతో లాభదాయకం
  • 57 ఏండ్లకే ఆసరా పింఛన్ల్ల వర్తింపుతో 10వేల మందికి పైగా ప్రయోజనం
  • జేజేలు పలికిన రైతులు, వివిధ వర్గాల ప్రజలు
  • సాగునీటి రంగానికి అధిక నిధులు
  • మల్లన్న సాగర్‌...కొండపోచమ్మ ప్రాజెక్టుల నీటితో మెతుకుసీమ సస్యశ్యామలం
  • ఘణపూర్‌ ప్రాజెక్టు, మంజీరా, హల్దీల పరీవాహక ప్రాంతాల్లో రెండుపంటలు
  • జిల్లాలో పెరగనున్న సాగు విస్తీర్ణం

రైతులు ఆర్థికంగా ఎదిగేందుకు ప్రభుత్వం అన్ని రకాల చర్యలు తీసుకుంటున్నది. రాష్ట్ర ఆర్థిక శాఖ మంత్రి తన్నీరు హరీశ్‌రావు ఆదివారం శాసనసభలో ప్రవేశపెట్టిన బడ్జెట్‌తో రైతులకు ఎంతో ప్రయోజనం చేకూరనున్నది. జిల్లాలో లక్ష రూపాయల్లోపు రుణం ఉన్న 78,000 మంది రైతులకు రూ.675 కోట్ల రుణమాఫీ కానున్నది. 25,000 లోపు రుణాలు ఉన్న రైతులు 11,000 మంది రైతులు ఉన్నట్లు వ్యవసాయశాఖ అధికారులు తెలిపారు. జిల్లాలో కొత్త పాసు పుస్తకాలు తీసుకున్న 20వేల మంది రైతులకు రూ.17వేల కోట్లు అదనంగా రైతుబంధు వర్తించనున్నది. 57 ఏండ్లకు ఆసరా పింఛన్లు ఇస్తుండటంతో జిల్లాలో 10,982 మంది లబ్ధి పొందనున్నారు. కల్యాణలక్ష్మి, షాదీముబారక్‌లకు నిధులు అధికంగా కేటాయించారు. వ్యవసాయ ఆధారిత జిల్లాగా మెతుకుసీమకు పేరుంది. సీఎం కేసీఆర్‌ తీసుకున్న నిర్ణయంతో సాగునీటి రంగానికి అధిక నిధులు కేటాయించారు. మల్లన్నసాగర్‌, కొండపోచమ్మ ప్రాజెక్టులతో మెతుకుసీమలో అదనంగా రెండు లక్షల ఎకరాలకు సాగు నీరు అందనున్నది. మంజీరా, హల్దీ , ఘణపూర్‌ ప్రాజెక్టు పరీవాహక ప్రాంత రైతులకు రెండు పంటలు పండనున్నాయి. చెరువులను, కుంటలను నింపుకుంటూ మంజీరా, హల్దీ  వాగులు భవిష్యత్తులో జీవనదులుగా మారనున్నాయి. అన్నదాతల శ్రేయస్సు కోసం కేటాయించిన బడ్జెట్‌పై జిల్లా రైతులు హర్షం వ్యక్తం చేస్తున్నారు.

- మెదక్‌ ప్రతినిధి, నమస్తే తెలంగాణ


మెదక్‌ ప్రతినిధి, నమస్తే తెలంగాణ : రాష్ట్ర ప్రభుత్వం ప్రవేశపెట్టిన బడ్జెట్‌ అన్ని వర్గాల ప్రజలకు సమప్రాధాన్యం కల్పించింది. ఇది సకల జనుల బడ్జెట్‌.. సంక్షేమ పథకాలకు పెద్ద ఎత్తున నిధులను కేటాయించారు. గత ఎన్నికల్లో ఇచ్చిన ప్రతి హామీని నెరవేర్చేలా ఈ బడ్జెట్‌ ఉంది. ఇవాళ బడ్జెట్‌పై అన్ని వర్గాల ప్రజలు హర్షం వ్యక్తం చేస్తున్నారు. ఆదివారం శాసనసభలో తొలిసారిగా ఆర్థిక మంత్రి హరీశ్‌రావు 2020-21 వార్షిక బడ్జెట్‌ను ప్రవేశపెట్టారు. బడ్జెట్‌పై జిల్లా వ్యాప్తంగా అన్ని వర్గాల ప్రజలు హర్షం వ్యక్తం చేస్తున్నారు. ముఖ్యంగా  వ్యవసాయం, సాగునీరు, విద్యా, వైద్యం, సంక్షేమ పథకాలతోపాట ఇతర రంగాలకు బడ్జెట్‌లో అధిక ప్రాధాన్యత ఇచ్చింది. డబుల్‌ బెడ్‌ రూం ఇండ్ల నిర్మాణాలకు..ఇంటి దగ్గర ఖాళీ స్థలం ఉంటే సొంతగా ఇల్ల్లు కట్టుకోవడానికి నిధులను కేటాయించింది. అందరికీ విద్య అందించాలనే లక్ష్యంతో ఈచ్‌ వన్‌ టీచ్‌ వన్‌ కార్యక్రమానికి నిధులు. బీడువారిన పొలాలకు త్వరలోనే కాళేశ్వరం ప్రాజెక్టు ద్వారా గోదావరి జలాలు అందించనుంది. రైతులకు లక్ష రూపాయల రుణమాఫీకి నిధులు కేటాయించడంతో  పాటు ఈ నెల నుంచి అమలుకు శ్రీకారం చుట్టనున్నారు. గ్రామాల్లో ప్రతి ఐదువేల(క్లస్టర్‌) ఎకరాలకు ఒకటి చొప్పున రూ. 12 లక్షలతో రైతు వేదికల నిర్మాణం.. 


రైతాంగానికి 24 గంటల పాటు ఉచిత కరెంట్‌, సీఎం కేసీఆర్‌ రైతు బిడ్డ కావడం చేత ఇవాళ వ్యవసాయ రంగానికి పెద్దపీట వేశారు. ఆర్టీసీ కార్మికుల రిటైర్‌మెంట్‌ వయస్సును 60 ఏండ్లకు పెంచడంతో పాటు ఆ సంస్థకు పెద్ద ఎత్తున నిధులను కేటాయింపులు చేశారు. గ్రామాల అభివృద్దికి ప్రత్యేకంగా నిధులను కేటాయించారు. నూతన మున్సిపల్‌ చట్టం, వైద్యరంగంలో విప్లవాత్మక మార్పులు, కల్యాణలక్ష్మి, షాదీముబారక్‌, బీసీ, మైనార్టీలకు భారీగా నిధులను కేటాయించడంతో అన్ని వర్గాల ప్రజలు హర్షం వ్యక్తం చేస్తున్నారు.  రైతులు ఆర్థికంగా ఎదిగేందుకు ప్రభుత్వం అన్ని రకాల చర్యలు తీసుకుంటుందని, రైతు సంక్షేమం కోసం ఈ బడ్జెట్‌లో కేటాయింపులే దీనికి నిదర్శనమని రైతన్నలు హర్షం వ్యక్తం చేస్తున్నారు. జిల్లాలో 3,77,000 ఎకరాలకు సంబంధించి 2,25,000 మంది రైతులు ఉన్నారు. గడిచిన వానకాలం సీజన్‌లో 2,04,000 మంది రైతులకు రూ.188 కోట్లు రైతుబంధు ఇవ్వగా, యాసంగిలో 1,72,000 మంది రైతులకు రూ.159 కోట్లను చెల్లించింది. ఇప్పుడు అదనంగా రైతుబంధుకు రూ.2వేల కోట్లు బడ్జెట్‌లో కేటాయించింది. రుణమాఫీకి సంబంధించి జిల్లాలో రూ.లక్ష లోపు రుణం ఉన్న 78,000 మంది రైతులకు రూ.675 కోట్ల రుణమాఫీ కానున్నది. ఇందులో ప్రత్యేకంగా రూ.25వేల లోపు రుణాలు ఉన్న రైతులు 11,000 మంది ఉన్నట్లు వ్యవసాయశాఖ అధికారలు తెలిపారు. దీంతో వారికి ఏకకాలంలో ప్రభుత్వం రుణమాఫీ చేయనున్నది. ఇందుకుగాను రూ.25కోట్లను ప్రభుత్వం ఈ నెలాఖరు వరకు విడుదల చేయనున్నది. మొత్తం రైతుల రుణమాఫీ కోసం రూ.6,225 కోట్లు బడ్జెట్‌లో కేటాయించడంతో రైతన్నలు హర్షం వ్యక్తం చేస్తున్నారు. సీఎం కేసీఆర్‌ సాగునీటి రంగానికి అధిక నిధులు కేటాయించడంతో మల్లన్నసాగర్‌, కొండపోచమ్మ ప్రాజెక్టులతో మెతుకుసీమలో అదనంగా రెండు లక్షల ఎకరాలకు సాగు నీరు అందనున్నది.  


10,982 మందికి ప్రయోజనం..

ఈ ఆర్థిక సంవత్సరం నుంచే అసరా పింఛన్లు 57ఏండ్లకే వర్తింపచేయాలని ప్రభుత్వం నిర్ణయించి బడ్జెట్‌లో నిధులు కేటాయించింది. దీంతో 10,982 మందికి రూ. 2,21,41,721లు ప్రభుత్వంపై అదనపు భారం పడనున్నది. జిల్లాలో ప్రతినెలా 99,747 మంది లబ్ధిదారులకు అసరా పింఛన్‌ కింద రూ.21కోట్ల 77లక్షలను ప్రభుత్వం చెల్లిస్తుంది. మహిళా స్వయం సహకార సంఘాలకు వడ్డీలేని రుణాల కింద రూ.1200 కోట్లను కేటాయించడంతో జిల్లాలో అదనంగా మహిళా సంఘాలకు లబ్ధి చేకూరనున్నది. 


సంక్షేమ అభివృద్ధి రంగాలకు పెద్దపీట.. 

బడ్జెట్‌లో సంక్షేమ అభివృద్ధి రంగాలకు పెద్దపీట వేయడంతో జిల్లాకు మరింత ప్రయోజనం చేకూరనున్నది. కల్యాణలక్ష్మి, షాదీముబారక్‌ కింద ఆడపిల్లలకు రూ.లక్షా 116లను అందిస్తున్నది. 2019-20 ఆర్థిక సంవత్సరంలో 2,043 మంది లబ్ధిదారులకు రూ.20కోట్ల 40 లక్షలను ప్రభుత్వం అందించింది. షాదీముబారక్‌ కింద 268 మంది లబ్ధిదారులకు రూ.2కోట్ల 64 లక్షలు చెల్లించింది. దీంతో జిల్లాలోని లబ్ధిదారులకు మరింత ప్రయోజనం కలుగనున్నది. అదేవిధంగా మిషన్‌భగీరథ, హరితహారం, మిషన్‌కాకతీయ, విద్యుత్‌శాఖ, రహదారులు, విద్య, వైద్యం, గ్రామీణాభివృద్ధి, డబుల్‌ బెడ్‌ రూం ఇండ్ల నిర్మాణం, పరిశ్రమలు తదితర రంగాలకు బడ్జెట్‌లో నిధులు కేటాయించడంతో అన్ని వర్గాల ప్రజలు హర్షం వ్యక్తం చేస్తున్నారు. 


ఇది రైతు సంక్షేమ బడ్జెట్‌..

ఆర్థిక శాఖ మంత్రి హరీశ్‌రావు ప్రవేశపెట్టిన 2020-21 బడ్జెట్‌లో అత్యధిక ప్రాధాన్యత రైతులకు కేటాయించినందుకు చాలా సంతోషంగా ఉన్నది. తెలంగాణ ప్రభుత్వం రూ.లక్షలోపు రుణాలు ఉన్నటువంటి రైతులకు రుణమాఫీ చేయడంతో రైతన్నలకు ఎంతో మేలు చేకూరనున్నది. తెలంగాణ ప్రభుత్వం రైతుల కోసం సంక్షేమ బడ్జెట్‌ను కేటాయించింది.

- కిష్టయ్య రైతు, ఔరంగాబాద్‌, మెదక్‌ మండలం


రైతుబంధుతో వ్యసాయానికి చేయూత..

రైతులకు టీఆర్‌ఎస్‌ ప్రభుత్వం బడ్జెట్‌లో రైతుబంధు నిధులు కేటాయించారు. రైతులను వ్యవసాయ రంగంలో ప్రోత్సహించే విధంగా బడ్జెట్‌ను రూపొందించారు. రాష్ట్ర ప్రభుత్వం రైతుబంధు పథకాన్ని ప్రవేశపెట్టి ఎకరాకు రూ.5వేల చొప్పున అందిస్తున్నది. సీఎం కేసీఆర్‌ సారుకు రుణపడి ఉంటాం. 

- గోపాల్‌గౌడ్‌, ముత్తాయిపల్లి, హవేళిఘనపూర్‌


అన్ని రంగాలకు పెద్దపీట వేసిన సీఎం కేసీఆర్‌..

టీఆర్‌ఎస్‌ ప్రభుత్వ హయాంలో వైద్య, విద్య, సాగు, విద్యుత్‌తో పాటు అన్ని రంగాల అభివృద్ధికి బడ్జెట్‌లో నిధులు కేటాయించడం హర్షణీయం. టీఆర్‌ఎస్‌ ప్రభుత్వం రైతుబంధు, రైతుబీమా, రుణమాఫీకి బడ్జెట్‌లో నిధులు కేటాయించడంతో రైతులకు ఎంతోలబ్ధి చేకూరనున్నది.

- మేకల సునీత, హవేళిఘనపూర్‌ 


రైతులకు అండగా నిలుస్తున్నది..

రైతుల సంక్షేమం కోసం నిరంతరం శ్రమిస్తున్న టీఆర్‌ఎస్‌ ప్రభుత్వం రైతుబీమా, రైతుబంధు పథకాలను అమలు చేస్తూ రైతులకు అండగా నిలుస్తున్నది.  రైతుబంధు, రైతుబీమాతో పాటు రైతు రుణమాఫీ కోసం బడ్జెట్‌లో రూ.6,225కోట్లు కేటాయించడం సంతోషకరమైన విషయం. దీంతో రైతులకు మేలు కలుగుతుంది. 

- విష్ణు, కుసంగి గ్రామం, టేక్మాల్‌


పేదల సంక్షేమానికి అధిక నిధులు 

పేదల సంక్షేమానికి బడ్జెట్‌లో అధిక ప్రాధాన్యత కల్పించారు. ఆసరా పింఛన్లు, విద్య, వైద్య, రవాణా రంగాలను అభివృద్ధి చేసేందుకు నిధులు మంజూరు చేశారు. హరితహారం, డబుల్‌ బెడ్‌ రూం ఇండ్ల మంజూరు, వ్యవసాయ అభివృద్ధికి పంటలు రుణాలు మాఫీ చేయడంతో పాటు రైతులను ప్రోత్సహించేందుకు బడ్జెట్‌లో నిధులు మంజూరు చేశారు.

- ఏసు రైతు, ఆవుసులపల్లి


అన్ని రంగాలకు ప్రాధాన్యం

 అసెంబ్లీలో ఆర్థిక మంత్రి హరీశ్‌రావు ప్రవేశపెట్టిన రాష్ట్ర బడ్జెట్‌ సంతృప్తికరంగా ఉంది. అన్ని రంగాలకు ప్రాధాన్యం ఇచ్చారు. రైతుబంధు, రైతుబీమా, రుణమాఫీ, విద్య, వైద్య గృహ నిర్మాణాలకు సముచిత బడ్జెట్‌ను కేటాయించారు. సొంత స్థలం ఉన్నవారికి ఇల్లు నిర్మించుకునేందుకు నిధులు మంజూరు చేస్తామన్నది చాలా సంతోషంగా ఉంది. గ్రామాల అభివృద్ధికి అధిక నిధులు కేటాయించడం సంతోషంగా ఉంది. -గిరి రైతు, రంగంపేట, నర్సాపూర్‌


‘రైతుబీమా’ వరం

రైతులకు భరోసా కల్పించే సంక్షేమ పథకాలను ప్రవేశ పెట్టి, వాటిని అమలు చేయడంతో సీఎం కేసీఆర్‌ రైతుల పాలిట పెద్దన్నగా నిలుస్తున్నాడు. బడ్జెట్‌లో రైతు బంధు, రైతుబీమా పథకాలకు అధికంగా నిధులు కేటాయించడం చాలా సంతోషం. రైతు బీమా కింద రైతు మరణిస్తే ఆ కుటుంబానికి రూ.5 లక్షల బీమా డబ్బులు అందజేస్తున్నది.  

- రామకిష్టయ్య, చిన్నఘనపూర్‌


ఆడపిల్లలకు ‘కల్యాణలక్ష్మి’ ఒక వరం. 

ప్రభుత్వం ప్రవేశపెట్టిన రాష్ట్ర బడ్జెట్‌లో ‘కల్యాణలక్ష్మి’ పథకంలో బీసీలకు అదనంగా రూ.650 కోట్లను కేటాయించడం సంతోషకరం. దీంతో ఎంతో మంది పేదవారికి ఉపయోగకరంగా ఉంటుంది. ప్రభుత్వం తీసుకున్న నిర్ణయం అభినందనీయం. సీఎం కేసీఆర్‌కు రుణపడి ఉంటాం.  

- మొగులయ్య వ్యాపారి, నర్సాపూర్‌ 


రైతులకు భరోసానిచ్చిన బడ్జెట్‌

2020-2021 రాష్ట్ర వార్షిక బడ్జెట్‌ రైతులకు పూర్తి భరోసానిచ్చే విధంగా ఉంది. రైతులను ఆదుకునే దిశగా అంశాల వారీగా వ్యవసాయ రంగానికి నిధులు కేటాయించి సీఎం కేసీఆర్‌ ప్రభుత్వం మరోసారి రైతు పక్షపాతి ప్రభుత్వమని నిరూపించుకుంది. రైతుబంధు, రైతుబీమా పథకాలకు బడ్జెట్‌లో నిధులను కేటాయించడాన్ని స్వాగతించాల్సిన అవసరం ఉంది. ప్రాజెక్టుల నిర్మాణానికి, సబ్సిడీ విత్తనాలకు బడ్జెట్‌లో నిధులు కేటాయించారు. రైతుల ఆకాంక్షలు ప్రతిబింబించేలా బడ్జెట్‌ ప్రవేశపెట్టిన ప్రభుత్వానికి రైతులు రుణపడి ఉంటారు. 

- అంజయ్య, టేక్మాల్‌


అన్ని వర్గాల బడ్జెట్‌ ఎమ్మెల్సీ శేరి సుభాశ్‌రెడ్డి

ప్రభుత్వం ప్రవేశపెట్టిన బడ్జెట్‌ అన్ని వర్గాలను దృష్టిలో పెట్టుకొని రూపొందించడం సంతోషకరం. పేదల జీవన ప్రమాణాలను, భద్రత ను పెంచేలా బడ్జెట్‌ ఉంది. రైతులను రాజు చేయాలనే సంకల్పం బడ్జెట్‌లో స్పష్టం కనిపించింది. ప్రాజెక్టుల నిర్మాణానికి పెద్ద మొత్తం నిధులు కేటాయించడం ఆనందకరం. మహిళ, విద్యా, వైద్యం, శిశు సంక్షేమ, మైనార్టీలు, పట్టణాలకు, పల్లెలకు పెద్ద మొత్తం నిధులు కేటాయించడం హర్షణీయం. అన్ని వర్గాల ప్రజలను అభివృద్ధి పరిచే విధంగా బడ్జెట్‌ ఉంది.


సామాన్యులకు మేలు ఎమ్మెల్యే పద్మాదేవేందర్‌రెడ్డి

బడ్జెట్‌ సామాన్య ప్రజలకు మేలు చేసేదిగా ఉన్నది. ప్రజల అవసరాలు, అభివృద్ధికి అనుగుణంగా రూపొందించారు. సాగునీరు, ఆసరా పింఛన్లకు ప్రాధాన్యతనిచ్చి, పేదరైతులను ఆదుకునేందుకు కృషి చేశారు. గతంలో లేని విధంగా బడ్జెట్‌ ప్రవేశపెట్టడం విశేషం. ఇంత భారీ స్థాయిలో కేటాయించడం నిజంగా ప్రభుత్వం గొప్పతనం. సంక్షేమ పథకాల అమలు, సాగునీటి ప్రాజెక్టుల రూపకల్పన చేయడం అందుకు తగిన నిధులను కేటాయించి భవిష్యత్‌ తరాలకు ఒక మంచి రాష్ర్టాన్ని అందించేందుకు కృషి చేయడం హర్షణీయం. 


రైతులకు ఎంతో మేలు నర్సాపూర్‌ ఎమ్మెల్యే మదన్‌రెడ్డి 

తెలంగాణ ప్రభుత్వం రైతులకు మేలు చేస్తున్నది. వ్యవసాయానికి మరోసారి పెద్దపీటేసింది. పంటపెట్టుబడులతో రైతులంతా సంతోషంగా ఎవుసం చేసుకుంటున్నారు. బడ్జెట్‌లో రైతుల రుణమాఫీ, రైతుబంధు, రైతుబీమాకు పెద్ద ఎత్తున నిధులు కేటాయించారు. సీఎం కేసీఆర్‌ తీసుకుంటున్న ప్రతి నిర్ణయం రైతు శ్రేయస్సు కోసమే. రైతుల బాగు కోసం అహర్నిశలు కృషి చేస్తున్నారు. వ్యవసాయం, విద్య,వైద్యం, అభివృద్ధి ఇలా అన్ని విధాలుగా ఆలోచిస్తూ ప్రభుత్వం ముందుకు సాగడం అభినందనీయం. 


టీఆర్‌ఎస్‌ ప్రభుత్వంతోనే ఆర్టీసీ ప్రగతిపథం

నష్టాల్లో ఉన్న ఆర్టీసీ సంస్థను లాభాల్లోకి తెచ్చేందుకు టీఆర్‌ఎస్‌ సర్కారు కృషి మరిచిపోలేనిది. తమను కార్మికులుగా కాకుండా ఉద్యోగులుగా సముచిత గౌరవాన్ని కల్పించింది. మా సమస్యలను పరిష్కరించేందుకు ఎంప్లాయీస్‌ బోర్డును ఏర్పాటు చేయడం సంతోషకరం. మాకు ఉద్యోగ విరమణ వయస్సు 60ఏండ్లకు పెంచడం అభినందనీయం. గ్రామీణ, పట్టణ ప్రజలందరికీ మెరుగైన సేవలందించడమే గాక కార్గో, పార్సిల్‌ సర్వీసులను కొనసాగించడం అభినందనీయం.

- వాణి, మెదక్‌ ఆర్టీసీ డిపో కండక్టర్‌


పేదరైతులకు ఊరట హన్మంత్‌ రైతు, వరిగుంతం, కొల్చారం

బడ్జెట్‌లో టీఆర్‌ఎస్‌ ప్రభుత్వ మార్క్‌ స్పష్టంగా కనిపిస్తున్నది. ఇది అన్ని వర్గాలకు ఉపయోగపడే బడ్జెట్‌. సంక్షేమం కోసం పెద్ద ఎత్తున కేటాయింపులు జరిగాయి. నిరుపేదలకు బడ్జెట్‌లో సముచిత స్థానం లభించింది. ఇది రైతు ప్రభుత్వమని మరో సారి రుజువైంది. ఈ కేటాయింపులను చూస్తే అన్ని వర్గాలకు సముచిత స్థానం దక్కింది. సీఎం కేసీఆర్‌, మంత్రి హరీశ్‌రావులకు  కృతజ్ఞతలు.


సంక్షేమానికి ప్రాధాన్యం కొత్త ప్రభాకర్‌రెడ్డి, మెదక్‌ ఎంపీ

తెలంగాణ ప్రభుత్వం అభివృద్ధి, సంక్షేమానికి ప్రాధాన్యమిస్తూ ప్రగతి పద్దును ఆదివారం ప్రవేశపెట్టింది. కొత్త రాష్ట్రం ఏర్పడిన తర్వాత ఆదాయాన్ని పెంచుకుంటూ అభివృద్ధికి ప్రాధాన్యత కల్పిస్తున్నది. ముందు చూపుతో బడ్జెట్‌ రూపకల్పన జరిగింది. రాష్ట్ర ప్రగతి మరింత వేగవంతమవుతుంది. రైతులు, పేదలు, మహిళలు, మైనార్టీలు, ఉద్యోగ, కార్మిక వర్గాలకు అవసరమైన ప్రాధాన్యం కల్పించారు. రాష్ట్రం ప్రగతి వైపు పరుగు తీయడానికి  బడ్జెట్‌ బాగా ఉపయోగపడుతుంది.


ప్రతిపక్షాలు ప్రశంసించేలా సోలిపేట రామలింగారెడ్డి, దుబ్బాక ఎమ్మెల్యే  

రాష్ట్ర బడ్జెట్‌ పేదల మనస్సును గెలిచింది. ప్రతిపక్షాలకు  సైతం  ప్రశంసించేలా బడ్జెట్‌ ఉన్నది. తెలంగాణకు కేంద్రం నుంచి రావాల్సిన నిధులు పూర్తిగా తగ్గించినప్పటికీ అన్ని సంక్షేమ పథకాలు కొనసాగుతున్నాయి.  ఇంతా  ఆర్థిక మాంధ్యంలో బడ్జెట్‌ అన్ని వర్గాలవారికి సముచిత న్యాయం చేకూర్చింది. సీఎం కేసీఆర్‌ నేతృత్వంలో  అన్ని వర్గాల ప్రజలకు మేలు జరిగేలా బడ్జెట్‌ కేటాయింపు జరిగింది. మంత్రి హరీశ్‌రావు తొలిసారిగా ప్రవేశ పెట్టిన బడ్జెట్‌ దేశంలో ఆదర్శంగా నిలుస్తుంది. సాగురంగానికి పెద్దపీట వేసింది.


ప్రజలు మెచ్చేలా బడ్జెట్‌ ఎఫ్‌డీసీ చైర్మన్‌ ప్రతాప్‌రెడ్డి

ప్రజలు మెచ్చిన బడ్జెట్‌ను ఆర్థిక మంత్రి హరీశ్‌రావు ప్రవేశపెట్టారు. రైతు శ్రేయస్సు కోసం అనేక నిధులు కేటాయించి మరోసారి రైతు ప్రభుత్వంగా గుర్తింపు పొందింది. రూ. 25వేలు అప్పు ఉన్న రైతుకు ఒకేసారి రుణమాఫీ చేయడం జరుగుతుందన్నారు. పేద ప్రజలు ఇల్లు కట్టుకోవడానికి రూ. 11వేల కోట్లు నిధులు వేచ్చించడం హర్షణీయం. అన్ని వర్గాల ప్రజలను దృష్టిలో పెట్టుకొని బడ్జెట్‌ను రూపొందించారు. సీఎం కేసీఆర్‌ కలలు కన్న బంగారు తెలంగాణ  నిజమయ్యేలా కొత్త బడ్జెట్‌ ఉంది.


రైతులకు ఎంతో మేలు చింతల నర్సింహులు, జిల్లా రైతు సమన్య సమితి సభ్యుడు

తెలంగాణ ప్రభుత్వం రైతులకు మేలు చేస్తున్నది. వ్యవసాయానికి మరోసారి పెద్దపీటేసింది. పంటపెట్టుబడులతో రైతులంతా సంతోషంగా ఎవుసం చేసుకుంటున్నారు.  ఈ బడ్జెట్‌ తర్వాత మాకు సీఎం సారు ఇంకేం చేద్దామనుకుంటుండోనని చూస్తున్నాం. మేమైతే బేఫికర్‌గా ఉన్నాం. ప్రతిఒక్కరికీ సముచిత స్థానాన్ని ఇస్తూ నిధులు కేటాయించారు. వ్యవసాయం, విద్య,వైద్యం, అభివృద్ధి ఇలా అన్ని విధాలుగా ఆలోచిస్తూ ప్రభుత్వం ముందుకు సాగడం అభినందనీయం. 


ప్రజా ప్రయోజనకర బడ్జెట్‌ నారాగౌడ్‌ రైతు, ఎల్లాపూర్‌, పాపన్నపేట

ప్రజా ప్రయోజనకర బడ్జెట్‌ ఇది. రైతు బంధు, 24 గంటల కరెంటు, ఆసరా, గృహ నిర్మాణాల కోసం పెద్ద ఎత్తున నిధులు కేటాయిం చారు. సీఎం కేసీఆర్‌, మంత్రి హరీశ్‌రావు సమక్షంలో రూపొందించిన ఈ బడ్జెట్‌తో వచ్చే ఏడాదిలో రాష్ట్రం ఎంతో పురోభివృద్ధిని సాధిస్తుంది. 57ఏండ్లు నిండిన వారికి పింఛన్లు, ఇంటి స్థలం ఉన్నవారికి ఆర్థిక సహాయం, డబుల్‌ బెడ్‌రూం ఇండ్ల నిర్మాణానికి, రుణమాఫీకి నిధుల కేటాయింపులు జరిగాయి. అన్ని వర్గాలకు సమున్నత స్థానం కల్పించిన సీఎం కేసీఆర్‌, మంత్రి హరీశ్‌రావుకు ధన్యవాదాలు.


logo