‘శివ’ అని సూచిస్తున్న అనంతమైన ఈ శూన్యం ఒక పరిమితి లేని ‘నిరాకార స్వరూపం’. దానికి మొదలూ, చివరా లేవు, అది శాశ్వతమైంది. మనిషి అవగాహన, రూపానికి పరిమితమైపోయింది కాబట్టి, మన సంస్కృతి, సంప్రదాయాల్లో ఈ శివత్వానికి ఎన్నో అద్భుతమైన స్వరూపాలను సృష్టించుకున్నాం.
నిగూఢమూ, అగోచరమూ అయిన ఈశ్వరునిగా, మంగళకరుడైన ‘శంభు’నిగా, అమాయకత్వంతో మనల్ని నిర్వీర్యులని చేసే ‘భోళాశంకరునిగా’, సకల వేదాలూ, శాస్ర్తాలూ, తంత్రాలూ బోధించిన గొప్ప గురువు ‘దక్షిణామూర్తి’గా, ఎవరినైనా ఇట్టే క్షమించేసే ‘ఆశుతోషు’నిగా, ఆ సృష్టికర్త రక్తాన్నే శరీరానికి అలుముకున్న ‘కాలభైరవుని’గా, ప్రశాంతతకు ప్రతిరూపమైన ‘అచలేశ్వరుని’గా, బ్రహ్మాండ నృత్యకారుడైన ‘నటరాజు’గా.. ఇలా ఈ జీవితానికి ఎన్నెన్ని పార్శ్వాలుంటాయో అవన్నీకూడా ఆయనకి ఆపాదింపబడ్డాయి. సాధారణంగా ప్రపంచంలో ఎక్కడ చూసినా ‘దైవత్వం’గా ప్రజలు భావించే వాటినన్నిటినీ మంచిగా సూచిస్తారు. కానీ, ‘శివ పురాణం’ చదివితే శివుణ్ణి మంచివాడని కాని, చెడ్డవాడని కానీ అనలేం.
సర్వస్వమూ ఆయనే. ఆయనే కురూపి, ఆయనే అత్యంత సుందరమూర్తి. ఉత్తమోత్తముడూ, నియమబద్దుడు. దేవతలూ, రాక్షసులూ మొదలు సమస్త జీవరాశులూ ఆయన్ని కొలుస్తాయి. శివుణ్ణి గురించి మనం జీర్ణించుకోలేని కథలనన్నిటినీ, నాగరికతగా పిలువబడేది తుడిచి పారేసింది. కానీ, శివతత్త్వమంతా అక్కడే ఉంది! జీవితంలో ఒకదాని కొకటి విరుద్ధమైన పార్శ్వాలన్నీ శివుని వ్యక్తిత్వంలో నెలకొల్పబడ్డాయి. ఈ సమస్త సృష్టిలోని జటిలమైన లక్షణాల సమాహారాన్ని ‘శివ’ అనబడే ఈ వ్యక్తిలో ఎందుకు సమ్మిళితం చేశారంటే, ఈ ఒక్కరినే పూర్తిగా అంగీకరించగలిగితే, ఈ జీవితాన్ని దాటేసినట్టే! ‘శివ పురాణం’లోని కథల్ని జాగ్రత్తగా పరిశీలిస్తే అందులో సాపేక్ష సిద్ధాంతం, పరిమాణ యాంత్రిక శాస్త్రం (quantum Mechanics), అంతేకాదు ఆధునిక భౌతికశాస్త్రమంతా కథలరూపంలో ఎంతో అందంగా చెప్పారని గ్రహిస్తారు.
కాలక్రమంలో ఎక్కడో ఆ కథల్లోంచి శాస్త్రం విస్మరించబడి కథలు మాత్రమే కొనసాగించబడ్డాయి. అవికూడా ఒక తరం నుండి మరొక తరానికి, హాస్యాస్పదం అనిపించేలా, అతిశయోక్తులతో చిలువలు-పలువలుగా అల్లబడ్డాయి. ఆ కథల్లోకి విజ్ఞానాన్ని తిరిగి జొప్పించగలిగితే, శాస్ర్తాన్ని మళ్ళీ ఎంతో అందంగా చెప్పవచ్చు. మానవ ప్రకృతినిలోని చేతనని ఉత్కృష్ట శిఖరాలకి తీసుకెళ్ళగల మహోన్నతమైన విజ్ఞానఖనియైన ఈ ‘శివ పురాణం’ అందమైన కథలుగా చెప్పబడింది. ‘యోగం’ అనేది ఎటువంటి కథల ఆధారం లేకుండా ఒక శాస్త్రంగా చెప్పబడింది. కానీ, కొద్దిగా తరచి చూస్తే, శివపురాణమూ, యోగశాస్త్రమూ అవిభాజ్యమన్న విషయం ప్రస్ఫుటమవుతుంది. ఒకటి కథలంటే మక్కువున్న వారికీ, రెండవది ప్రతిదాన్నీ శాస్త్రీయ దృక్పథంతో మాత్రమే చూడాలనుకునే వారికీ! ఐతే, ఈ రెండిటిలోని మౌలిక విషయాలు ఒక్కటే.
ఈ మహాశివరాత్రి సందర్భంగా సద్గురు ఆధ్వర్యంలోని ఈశా కేంద్రం అందిస్తున్న దివ్యరుద్రాక్షను పూర్తి ఉచితంగా పొందడానికి ఇదీ లింక్. isha.co/Rudraksh-Tel
సద్గురు
జగ్గీ వాసుదేవ్