హైదరాబాద్, ఏప్రిల్ 21 (నమస్తే తెలంగాణ): దేశంలో ఉద్ధృతంగా వ్యాపిస్తున్న కరోనా బారినుంచి కాపాడేందుకు వ్యాక్సినేషన్ ప్రక్రియ వేగంగా కొనసాగుతున్నది. కానీ సరిపడా వ్యాక్సిన్లు అందుబాటులో లేకపోవడంతో ఇబ్బందులు ఎదురవుతున్నాయి. ఈ కొరతను అధిగమించేందుకు కేంద్ర ప్రభుత్వం విదేశీ టీకాలను అనుమతించేందుకు సిద్ధమైంది. దరఖాస్తు చేసిన మూడు రోజుల్లోనే అనుమతి ఇవ్వాలని నిర్ణయించింది. ఇప్పటికే భారత్ బయోటెక్ అభివృద్ధిచేసిన కొవాగ్జిన్, బ్రిటన్కు చెందిన ఆక్స్ఫర్డ్-ఆస్ట్రాజెనెకా సంస్థ భారత్కు చెందిన సీరమ్ ఇన్స్టిట్యూట్తో కలిసి తయారు చేసిన కొవిషీల్డ్ను వినియోగిస్తున్నారు. రష్యా అభివృద్ధి చేసిన స్పుత్నిక్-వీ టీకాకు ఇటీవలే అత్యవసర వినియోగానికి అనుమతులు ఇచ్చారు. వచ్చేనెల నుంచి ఇది అందుబాటులోకి వస్తుందని స్పుత్నిక్-వీ భారత దేశ భాగస్వామ్య సంస్థ డాక్టర్ రెడ్డీస్ ప్రకటించింది. జాన్సన్ అండ్ జాన్సన్ సంస్థ తయారు చేసిన టీకాతోపాటు విదేశీ వ్యాక్సిన్లు మోడర్నా, ఫైజర్ సైతం త్వరలో అందుబాటులోకి వస్తాయని నిపుణులు అంచనా వేస్తున్నారు. ఈ వ్యాక్సిన్లపై ఎలాంటి సంకోచం అవసరం లేదని, అవన్నీ సమర్థమైన టీకాలేనని నిపుణులు స్పష్టం చేస్తున్నారు.
కొవాగ్జిన్
హైదరాబాదీ ఫార్మా దిగ్గజం భారత్ బయోటెక్ అభివృద్ధి చేసింది. దీనిని ఇనాక్టివేటెడ్ వైరస్ విధానంలో అభివృద్ధిచేశారు. ఈ పద్ధతిలో కరోనా వైరస్ను నిర్వీర్యంచేసి టీకా తయారుచేస్తారు. వ్యాక్సిన్ వేసుకొన్న తర్వాత శరీరంలోని రోగనిరోధక వ్యవస్థ స్పందించి.. నిజమైన వైరస్ వచ్చినట్టు భావించి ప్రతిరక్షకాలను ఉత్పత్తి చేస్తుంది. ఆ తర్వాత ఎప్పుడైనా కరోనా వైరస్ సోకితే ఇవి వెంటనే అడ్డుకుంటాయి. దీని సామర్థ్యం 81 శాతం. దీనిని సాధారణ ఫ్రిజ్ ఉష్ణోగ్రతల వద్ద నిల్వ చేయవచ్చు.
కొవిషీల్డ్
బ్రిటన్కు చెందిన ఆక్స్ఫర్డ్ వర్సిటీ, ఆస్ట్రాజెనెకా సంస్థలు సంయుక్తంగా ఈ టీకాను అభివృద్ధి చేశా యి. మనదేశానికి చెందిన సీరం ఇన్స్టిట్యూట్ దీని ని ఉత్పత్తి చేస్తున్నది. పూర్తి కొవిడ్-19 వైరస్ కాకుండా దాని కొమ్ము (స్పైక్) ఆధారంగా ఈ టీకాను అభివృద్ధి చేశారు. సాధారణ జలుబు కలిగించే అడినో వైరస్లో కొవిడ్-19 వైరస్లోని స్పైక్ ప్రొటీన్ను (జన్యుపదార్థం) ప్రవేశపెడతారు. అడినో వైరస్ కరోనా మాదిరిగా స్పైక్ను ఉత్పత్తి చేస్తుంది. ఈ టీకాను వేసినప్పుడు మన శరీరం కరోనా వైరస్ వచ్చినట్టుగా భావించి ప్రతిరక్షకాలను ఉత్పత్తిచేస్తుంది. ఈ టీకా సామర్థ్యం 81.3 శాతంగా పేర్కొంటున్నారు. దీనిని సాధారణ ఫ్రిజ్ ఉష్ణోగ్రతల వద్ద నిల్వ చేయవచ్చు.
స్పుత్నిక్-వీ
దీనిని రష్యాలోని గమలేయా ఇన్స్టిట్యూట్ శాస్త్రవేత్తలు రూపొందించారు. ఆ దేశానికి చెందిన రష్యన్ డైరెక్ట్ ఇన్వెస్ట్మెంట్ ఫండ్ (ఆర్డీఐఎఫ్) మార్కెటింగ్ చేస్తున్నది. ఇటీవలే ఈ టీకా అత్యవసర వినియోగానికి డ్రగ్ కంట్రోల్ జనరల్ ఆఫ్ ఇండియా (డీసీజీఐ) అనుమతి ఇచ్చింది. దీంతో దేశంలో అనుమతి పొందిన మూడో టీకాగా నిలిచింది. రెండు డోసుల్లో వేర్వేరు వాహక వైరస్లను వినియోగించడం ఈ టీకా ప్రత్యేకత. తొలి డోస్లో ‘ఆర్ఏడీ-26’ వైరస్ను వాహకంగా వాడగా, రెండో డోస్లో ‘ఆర్ఏడీ-5’ వైరస్ను వెక్టార్గా వినియోగించారు. మొదటి డోస్ వేసుకున్న తర్వాత రెండో డోస్ ఇస్తారు. ఇలా వేర్వేరు వెక్టార్లను వినియోగించడం వల్ల మంచి ఫలితాలు వస్తున్నాయని, రోగనిరోధక శక్తి పెరుగుతుందని రష్యా శాస్త్రవేత్తలు చెప్తున్నారు. ఈ టీకాను సైతం ఫ్రిజ్ ఉష్ణోగ్రతల వద్ద నిల్వ చేయగలగడం ప్రత్యేకత. జ్వరం, తలనొప్పి, జలుబు వంటి సాధారణ సైడ్ ఎఫెక్ట్స్ మాత్రమే కనిపిస్తున్నాయని నిపుణులు చెప్తున్నారు. స్పుత్నిక్-వీ ని ఇప్పటికే 60 దేశాలు ఆమోదించాయి. దీని సామర్థ్యం 91.8 శాతంగా చెప్తున్నారు. హైదరాబాదీ ఫార్మా దిగ్గజం డాక్టర్ రెడ్డీస్ సంస్థ ఈ వ్యాక్సిన్ను భారత్లో ఉత్పత్తి చేస్తున్నది.
జాన్సన్ అండ్ జాన్సన్
ఇది సింగిల్ డోస్ టీకా. ఇది కూడా కోవిషీల్డ్ మాదిరిగా స్పైక్ ప్రొటీన్ లక్ష్యంగా తయారుచేశారు. అడినోవైరస్లో కొవిడ్-19 వైరస్ స్పైక్ ప్రొటీన్ను జొప్పించి దీనిని అభివృద్ధి చేశారు. ఈ టీకాను సైతం సాధారణ ఫ్రిజ్ ఉష్ణోగ్రతల వద్ద నిల్వ చేయవచ్చు. ఇది సింగిల్ డోస్ టీకా మాత్రమే. ఇదే ఈ టీకా ప్రత్యేకత. ఒకే డోస్లో 66 శాతం సామర్థ్యంతో పనిచేసినట్టు సంస్థ ప్రకటించింది. అమెరికాలో 72 శాతం, దక్షిణాఫ్రికాలో 57 శాతం సమర్థతతో పనిచేసినట్టు తెలిపింది. అయితే ఈ టీకా తీసుకున్న తర్వాత రక్తం గడ్డకడుతున్నట్టు అనేక దేశాల్లో ఫిర్యాదులు వస్తున్నాయి. ఈ నేపథ్యంలో ఇప్పటికే అమెరికా సహా పలు దేశాలు జాన్సన్ అండ్ జాన్సన్ టీకాపై నిషేధం విధించాయి.
ఫైజర్
అమెరికాకు చెందిన ఫైజర్, జర్మనీకి చెందిన బయో-ఎన్టెక్ సంస్థలు సంయుక్తంగా దీనిని అభివృద్ధి చేశాయి. ఇది కూడా ఎం-ఆర్ఎన్ఏ వైరస్. కొవిడ్-19 వైరస్లోని ఎం-ఆర్ఎన్ఏను వాహక వైరస్లో ప్రవేశపెట్టి టీకాను అభివృద్ధి చేశారు. ఈ వ్యాక్సిన్ అసిమ్టమాటిక్ కేసుల్లో 94 శాతం, తీవ్ర లక్షణాలు ఉన్నవారిలో 97 శాతం ప్రభావవంతంగా పనిచేస్తున్నట్టు సంస్థ చెప్తున్నది. అమెరికా, జర్మనీ, ఇజ్రాయెల్ సహా పలు దేశాలు ఈ టీకాను వినియోగిస్తున్నాయి. మొదటి డోస్ వేసుకున్న 21 రోజుల తర్వాత బూస్టర్ డోస్ వేయాల్సి ఉంటుంది. అయతే ఫైజర్ టీకాను ‘-75 డిగ్రీల’ వద్ద నిల్వ, రవాణా చేయాల్సి రావడం పెద్ద మైనస్.
మోడర్నా
దీనిని అమెరికాకు చెందిన నేషనల్ ఇన్స్టిట్యూట్ ఆఫ్ అలర్జీ అండ్ ఇన్ఫెక్షన్ స్టడీస్ (ఎన్ఐఏఐడీ), బయోమెడికల్ అడ్వాన్స్డ్ రీసెర్చ్ అండ్ డెవలప్మెంట్ అథారిటీ (బీఏఆర్డీఏ), మోడర్నా సంస్థలు కలిసి అభివృద్ధి చేశాయి. కొవిడ్-19 వైరస్లోని ‘ఎం-ఆర్ఎన్ఏ’ను వాహక వైరస్లో జొప్పించి తయారుచేశారు. ఇప్పటికే అమెరికా సహా పలు దేశాలు ఈ టీకాను వినియోగిస్తున్నాయి. ఈ వ్యాక్సిన్ 94 శాతం సమర్థతతో పనిచేస్తున్నది. ఈ టీకాలను ‘-20’ డిగ్రీ సెంటిగ్రేడ్ ఉష్ణోగ్రతల మధ్య రవాణా చేయాల్సి ఉంటుంది. మొదటి డోస్ వేసకున్న తర్వాత 28 రోజులకు బూస్టర్ డోస్ ఇవ్వాల్సి ఉంటుంది.