బోడుప్పల్, జూన్ 15 : కోట్లాది రూపాయల వెచ్చింపు, ఎకరాల విస్తీర్ణంలో ఏర్పాటయ్యే స్లాటర్ హౌస్లకు కాలం చెల్లింది. పెరుగుతున్న జనాభాకనుగుణంగా అతితక్కువ ఖర్చుతో చెంగిచర్ల జంతువధశాలకు చెందిన శాస్త్రవేత్తలు మోడ్రన్ మినీ స్లాటర్ హౌస్ రూపకల్పనకు శ్రీకారం చుట్టారు. ఏడాదికాలంగా శాస్త్రవేత్తల కృషి ఫలితంగా రూ.3 కోట్ల వ్యయంతో నిర్మించే స్లాటర్ హౌస్(జంతు వధశాల)లు ఇప్పుడు రూ.10 లక్షలకే మినీ స్లాటర్హౌస్ యంత్రాలు త్వరలో మార్కెట్లోకి రానున్నాయి. ప్రభుత్వ నిబంధనలకు లోబడి, పూర్తి సాంకేతికతతో కూడిన సేవలు వినియోగదారులకు అందించనున్నాయి. మోడ్రన్ మినీ స్లాటర్హౌస్ డెమో యూనిట్ను కేఎస్ఎన్ ఫ్యాబ్రికేటర్స్ సహకారంతో చెంగిచర్ల ఎన్ఆర్సీయంలో రూపొందించారు. మాంస రిటైల్ రంగంలో మినీ స్లాటర్ హౌస్ యంత్రాలు సరికొత్త మార్పులకు శ్రీకారం చుట్టనున్నాయి.
మోడ్రన్ మినీ స్లాటర్హౌస్తో వినియోగదారులకు ఎంతో మేలు జరగనుంది. పొల్యూషన్ కంట్రోల్ బోర్డు నిబంధనలకు లోబడి ఇద్దరి వ్యక్తులతో అతి తక్కువ స్థలం(4/4 ఫీట్ల వెడల్పు,7 ఫీట్ల ఎత్తు)లో మినీ స్లాటర్హౌస్ను ఏర్పాటు చేసుకోవచ్చు. కేవలం 8 గంటల్లో 10 జంతువుల విడిభాగాలను అతితక్కువ నీటితో శుభ్రపరుచుకోవచ్చు. వధించిన జంతువుల(గొర్రెలు,మేకలు) వ్యర్థాలను నింపేందుకు అందులోనే కంటెయినర్ ఏర్పాటు చేశారు. నాణ్యమైన, శుభ్రమైన మాంస ఉత్పత్తులను ప్రజలకు అందించే లక్ష్యంతో మోడరన్ మినీ స్లాటర్ హౌస్లను రూపొందించినట్లు శాస్త్రవేత్తలు డాక్టర్ రామకృష్ణ, డాక్టర్ గిరీష్పాటిల్, డాక్టర్ ఎస్బి బార్బుజే తెలిపారు. వధించిన జంతువుల నుంచి వచ్చే వ్యర్థాలతో అపరిశుభ్రతకు తావులేకుండా గోబర్ గ్యాస్ ఉత్పత్తి చేసేలా దీన్ని నిర్మించినట్లు చెప్పారు. వధించిన మాంసాన్ని రెండు గంటల్లో విక్రయించాలి. లేకుంటే ఫ్రిడ్జ్లో భద్రపరుచుకునేలా దీన్ని మలిచారు.
మోడరన్ మినీ స్లాటర్హౌస్ కొనుగోలుకు నాబార్డు ద్వారా రుణం పొందే అవకాశం ఉన్నదని డాక్టర్ రామకృష్ణ తెలిపారు. ఇప్పటికే కేంద్ర వ్యవసాయశాఖ మంత్రి గిరిరాజ్సింగ్కు ప్రతిపాదనలు పంపామని వెల్లడించారు. ఓసీ, బీసీ వర్గాలకు 33 శాతం సబ్సిడీ, ఎస్సీ, ఎస్టీలకు 90 శాతం రాయితీ కింద మోడ్రన్ మినీ స్లాటర్హౌస్లను అందించేందుకు కేంద్రానికి ప్రతిపాదనలు పంపించినట్లు పేర్కొన్నారు. ప్రతి యంత్రం కొనుగోలుదారులకు సంబంధించిన ఇద్దరికి చెంగిచర్ల ఎన్ఆర్సీఎంలో ప్రత్యేక శిక్షణ ఇవ్వనున్నట్లు ఆయన చెప్పారు.