ఇంద్రధనుస్సు విరబూసిన సంబురం
కొమ్మలన్నీ చిగురు పెదాలై
నవ్వుతున్న నిత్య వసంతం!
ఆశ్రితులు గూళ్ళు కడుతూ
ఎవరి పనుల్లో వాళ్ళు
తలమునకలవుతుంటే
గొడుగు నీడయిన చెట్టు
దీపాన్ని కాపుగాసే అరచేయంత అడ్డుగోడ!
ఆ తాత నాటిన విత్తనం
అప్పుడే ఫలాలిస్తున్నది
నిన్నటి మొక్క ఇవ్వాళ పూవయింది!
నిజమే ఎవరన్నారో గానీ..
పచ్చని చెట్టు ప్రగతి కలల మెట్టు
ఏ ఎడారి తీరానికో వలసబోయిన పిట్టరెక్క
మాయిముంత జాడ దొరకబట్టి
గూడు చేరిన గూటి పాట!
ఏ కొమ్మకయినా
చిగురు పూయించు సారం ఈ నేలది
కట్టెలమ్మిన చోట
పూలమ్ము అదృష్టం ఈ మట్టిది
ఈ చెట్టు ముప్పెమూడు పువ్వుల
నిత్య పున్నమి..!
గజ్జెల రామకృష్ణ
8977412795