మాతృత్వపు మధుర క్షణాల కోసం ప్రతి మహిళా ఆత్రుతగా ఎదురుచూస్తూ ఉంటుంది. నెలలు నిండుతున్న కొద్దీ శారీరకంగా సమస్యలు ఎదురవుతున్నా పుట్టబోయే బిడ్డ కోసం అన్నిటినీ భరిస్తుంది. అయితే, ఆరోగ్యంగా ఉన్నప్పుడే అమ్మదనాన్ని పరిపూర్ణంగా ఆస్వాదించగలుగుతారు. అది యోగాభ్యాసంతోనే సాధ్యం. గర్భిణిగా ఉన్న సమయంలో కలిగే శారీరక సమస్యలకు చెక్ పెట్టే గోముఖాసనం సాధన చేయండి. నిపుణుల సలహా తీసుకున్న తర్వాతే ఆసనం ప్రయత్నించండి.
ముందుగా నిటారుగా తాడాసన స్థితిలో నిల్చోవాలి.రెండు కాళ్ల మధ్య రెండు అడుగుల ఎడం ఉండేలా చూసుకోవాలి. తర్వాత చిత్రంలో చూపించిన విధంగా ఎడమ చేతిని భుజం కిందుగా వెనుకకు తీసుకొని మోచేయి దగ్గర వంచాలి. ఎడమ అరచేయి రెండు భుజ ఫలకాల మధ్యలో ఉండేలా చూసుకోవాలి.
ఇప్పుడు కుడిచేతిని భుజం పైభాగం నుంచి వెనుకకు తీసుకొని మోచేతి దగ్గర వంచి కుడి అరచేతి వేళ్లతో, ఎడమ చేతి వేళ్లను ఇంటర్లాక్ చేయాలి.
ఈ సమయంలో ఎడమ మోచేయి నేలను చూస్తున్నట్టుగా, కుడి మోచేయి పైకప్పును చూస్తున్నట్టుగా పెట్టాలి. తల వెన్నెముకకు సమాంతరంగా ఉండేలా చూసుకోవాలి.
గోముఖాసన స్థితిలో 15 నుంచి 30 సెకన్లు ఉండాలి. సాధారణ స్థాయిలో శ్వాస తీసుకోవాలి.
గోముఖాసనం వల్ల మెడ బలంగా తయారవుతుంది. ఆర్థరైటిస్ నుంచి ఉపశమనం లభిస్తుంది. మోచేతులు, మణికట్టు బలంగా మారుతాయి.
కండ్ల్లు తిరుగుతున్నట్టుగా ఉన్నప్పుడు ఈ ఆసనం వేయకూడదు.
పొట్టలో అసౌకర్యంగా ఉన్నా.. వ్జైనా నుంచి రక్తస్రావం అవుతున్నా ఆపేయాలి.
అనితా అత్యాల
ప్రెగ్నెన్సీ యోగా నిపుణురాలు
హైదరాబాద్, 6309800109